Isaías 41 - Mam Huehuetenango New Ortography

Xi ttziyan Dios tu'n kytzoqpet qe aj Israel

1Chi Dios kyja': Aqeye tnam ttzi mar, che txulekuye nwitze; aqeye nasyon tz'okx kyipune, kytzaje tu'n qyolin ti'j ju yol lu; e tok qchmon qib' tu'n tok yol ti'j qu'n.

2¿Al u'n jaw jlet ju rey tuj tjawitz q'ij, aju kukx in kub' kyi'j txqantl tnam tu'n? ¿Alkye in xi q'onte kye nasyon tuj tq'ab' tu'n tkub' kyi'j tu'n ex tu'n kykyaj ten qe txqantl rey tjaq' tkawb'il? In che b'aj tpaẍu'n tu'nju t-spad ex in che b'aj t-sputun ik tza'n ttxa triw tu'n t-xob'l plech.

3Nno'k lpe' kyi'j qe nasyon tu'n tkub' kyi'j tu'n, ex minti' jun ti'xti in tk'ulb'a'n kyuj qe b'e jatum b'ajx tz'okx aj kyuj.

4¿Al u'n o b'ant jlu? ¿Al u'n b'aj nak'u'n ti'j alkye tu'n tb'ant kyu'n qe tnam tuj junjun tq'ijlalil atxix t-xe tnejel? Aqine Dios aju Kymane, aju b'aj nak'unte ti'j tkyaqil jlu. Aqine t-xe tnejel ex ax qine te b'ajsb'il.

5Qe tnam kykub'sa'n ttzi mar o kyil ex o tzaj tchi kyi'j; tkyaqil ttxa'npun tx'otx' tzaj lu'lun. Ch'ix kyul kanun ex lu che ul.

6Teyle junjun xjal at tnab'l ti'j aq'untl in b'aj tonin ju tuk'il ex in b'aj tkyuwsa'n tnab'l.

7Aju xjal b'inchal qe tilb'ilal in tkyuwsa'n tnab'l ju xjal tx'inol q'an pwaq tu'n tok kyi'j qe tilb'ilal; aju xjal tz'umsal saq pwaq tu'n martiy in tma'n teju xjal tx'inol k'uxb'il: B'a'n tten tmojb'ab'en k'uxb'il tu'na, ax in b'aj tkyuwsa'n ju tilb'ilal tu'n clav tu'ntzun mi'n tik' ch'uypaj.

8Kyb'intze, aqeye aj Israel tiyjil Jacob, aqeye nmajene sk'o'maj wu'ne, aqeye tiyjil Abraham aju wamiwoye.

9A qine in tzaj q'inte kyeye max ttxa'npun tx'otx', e tzaj ntxko'ne max kyuj qe lugar najchaq ex xi nma'ne kyeye kyja': Aqeye nmajene. Aqine in jaw sk'on kyeye ex b'ajx che el wik'une.

10Mi'n che xob'e porke lu qine atine kyuk'ile, mi'n b'aj kyk'u'je, aqine Kydiose. Kxel nq'o'ne kyipumale ex chin onile kyi'je, tzyu'n qeye wu'ne tu'n nb'anq'ab'e tu'nju tz'aqlxix qine.

11Kykyaqil qeju in tzaj kyq'oj kyi'je, kb'el kych'ixwi ex knajel kynab'l, ex qeju in che q'ojin kyi'je, b'i'x che najel te jumajx.

12Che okel tene jyol kye aj q'oj kyi'je ex mlay che knet kyu'ne, qeju in che q'on q'oj kyi'je che okel mer ik tza'n minti' otoq che ten.

13Porke aqine Dios aju Kymane, tzyu'n qeye wu'ne ex o nmaye kyeye kyja': Mi'n che xob'e, chin onile kyi'je.

14In tma'n Qman kyja': Aqeye aj Israel tiyjil Jacob, maske tal ch'in qeye ex minti' kyipune, mi'n che xob'e ok chin onile kyi'je. A qine Dios Xjan kye aj Israel, aqine kolpil kyeye.

15Che okel nq'o'ne ik tza'n jun makb'il aju nne'l b'ajunte tb'aq' triw ak'aj ex nimxix twitz te'; kb'ajel kyb'aju'ne qe witz ex che okel te quq kyu'ne ex qe tal witz ik che okel ik tza'n ttxa triw kyu'ne.

16Che jawix kyxo'ne twitz kya'j ik tza'n triw, che xel q'i'n tu'n kyq'iq' ex che b'ajel sputun tu'n kyq'iq' jb'al. Atzun kyeye che tzalajele wi'je, aqine Dios aju Kymane, ex chin jawil kynimsa'ne, aqine Kydiose Xjan, aqeye aj Israel.

17Qe xjal meb'a ex minti' ch'in at kye in che jyon ti'j a' te kyk'a', ex minti' in knet kyu'n; puro tzqij ti'j kyaq' tu'n txqetle'n, ex aqine Dios aju Kyman kxel nq'o'ne aju in che jyon ti'j. Mlay che kyaj nkoline, aqine Kydios aj Israel.

18Che jawil jlet qe nima wu'ne kyxol qe witz tz'la'j kyi'j, ex che jawil jlet qe twi a' tuj kymij chq'ajlaj; aju tzqij tx'otx' k'okel te sob'an wu'ne, ax ikx che jawil jlet qe twi a' wu'ne tuj tzqij tx'otx'.

19Tuj tzqij tx'otx' che b'elex wawa'ne qe wi'ten, qe ch'i'x tze', qe q'atxab' ex qe tze' olivo; tuj tx'otx' jatum minti' kynajb'il xjal che jawil ch'iy qe tzaj wu'ne, tuk'ix k'ol ex qe tzis,

20tu'ntzun kyke'yinte kykyaqil xjal ex tu'n kyb'inte ex tu'n ttzaj kyq'o'n kywi' ti'j ex tu'n tel kynik' ti'j, wu'ne o b'ant tkyaqil jlu, aqine Kydios aj Israel, xjan qine.

In che ok qe tilb'ilal kydios xjal tuj xjel tu'n Dios

21In tma'n Qman kyja', aju kyrey tiyjil Jacob: Kytzaje aqeye tilb'ilal, ex kyyek'untze qa b'a'n che kolin kyib'e, kytzaje tu'n kyklonte kyib'e.

22Kytzaje tu'n ttzaj kyma'ne aju tzul te tib'ajxi ex tu'n ttzaj kytx'olb'a'ne aju o b'aj ojtxi, ex kb'el qq'o'n qwi'ye ti'j; kyq'ontze tqanil qeye ti'j ju ti'xti tzul te tib'ajxi, tu'ntzun tel qnik'e ti'j jatum kpol b'aj.

23Kymantze qeye ti kb'ajel te tib'ajxi, kyyek'untze qeye qa axix tok dios qeye. Kyb'inchame alkye jaku b'ant kyu'ne, qa b'a'n ex qa mya b'a'n, noq tu'n ttzaj tchiylal qi'je ex tu'n qxob'e.

24Ex aqeye minti' ch'in b'a'n kyu'ne, ex aju kyaq'unb'ene te jumajx minti' tajb'en. Ik'b'ilxix kywitz qeju in che k'ulun kywitze.

25Ma jaw nsk'o'ne jun xjal tuj tx'otx' tuj tb'anq'ab' q'ij, lu tzul; ex max tuj tjawitz q'ij ktzajel na'n nb'iye tu'n. In che b'aj twab'an qe kawil ik tza'n in b'aj wab'at bar tx'otx', ex ik tza'n in b'aj xyoq'in xoq'l tu'n tqan ju b'inchal xar.

26¿Alkye o q'onte tqanil tej t-xe't jlu tu'ntzun qb'inteye? ¿Alkye otoq tzaj q'mante jlu ojtxi tu'ntzun qq'manteye qa ax tok tyol? Mi jun kyeye o q'mante tqanil lu ex mi jun o b'inte jun kyyole.

27Aqine in q'onte tqanil te tnam Sión atxix ojtxi ex xi nsama'ne jun nsanjele tu'n tpon tuj tnam Jerusalén q'olte tqanil b'a'n.

28Tej t-xi nke'yine, mi jun kyxol qe tilb'ilal pon tlaq'b'an tib'; ex mi a'l jun b'a'n tu'n tq'onte jun consej, ex misikyer jun jaku tzaj tzaq'wente jun nxjele.

29Kykyaqil minti' ch'in kyajb'en ex minti' jun ti'xti jaku b'ant kyu'n; tilb'ilal qe ex minti' ch'in jaku tz'el b'ant kyi'j.