Deuteronomio 30 - Mam Huehuetenango New Ortography

Qe tumel tu'n tb'ant kyten twitz Dios ex tu'n kykub' ky'iwlet

1Oktzun ttzaj kyib'aje tkyaqilju ma txi nma'ne kyeye, qa ky'iwb'il ex qa mya b'a'n, ex ok kyximane kyi'j jlu kyuj qe nasyon jatum che pol lajo'ne tu'n Qman Dios,

2qa ma che ajtz meltz'aje tuk'il kyuk'ix qe kyk'wa'le, ex qa tu'n tkyaqil kyanmiye ex tu'n tkyaqil kyk'u'je ma txi kynimane aju yol in xi nma'ne kyeye ja'lo,

3che ajetztzun q'i'ne juntl maj tu'n Qman Dios, ktzajel q'aq'an tk'u'j kyi'je, ex che ajetz chmo'ne tu'n juntl maj, noq jatum otoq che pon sputje tu'n kyuj txqantl nasyon.

4Maske otoq che ex lajo'ne tuj kytanmiye ex otoq che pon sputje kyuj lugar mas najchaq wen, ex che ajetz q'i'ne tu'n Qman Dios ex max ma chixin che ajetz chmo'ne tu'n.

5Che ajetz q'i'ne tu'n Qman Dios juntl maj tuj tx'otx' aju kyetzb'il kyxe'chele ojtxi, che okeltzune tajwil juntl maj, b'a'n k'elel tkyaqil te kyeye tu'n, ex kchmetel mas nim kyb'aje ik tza'n kye qtzan kyxe'chele.

6Kch'expetel kyanmiye tu'n Qman Dios ax ikx kye kyiyjile che ul itz'j te tib'ajxi, tu'ntzun kyk'ujlanteye Qman Dios tu'n tkyaqil kyk'u'je ex tu'n tkyaqil kyanmiye, tu'ntzun tten kychwinqlale.

7Kb'eltzun tq'o'n Qman Dios tkyaqil mya b'a'n lu kyib'aj qe aj q'oj kyi'je, aqeju o che el ik'unte kyeye ex o che b'aj yajla'ne kyu'n;

8atzun kyeye che ajetz meltz'aje tuk'il Qman, kxel kynimane, ex k'okel tilil kyu'ne tu'n kyjapun kykyaqil qe tmandamyent kyu'ne, aqeju in che'x nma'ne kyeye ja'lo.

9Che b'eltzun ky'iwla'ne tu'n Qman Dios ti'j tkyaqilju kb'antel kyu'ne, che ul itz'j nim kyk'wa'le ex nim kyalune ex kchmetel nim twitz kyawale. Ktzalajel Qman Dios kyi'je juntl maj, ex ok tb'incha' b'a'n kyeye, ik tza'n o tzalaj nej kyi'j qe kyxe'chele ex o tb'incha b'a'n kye.

10Tzul tq'o'n tkyaqil jlu kyeye qa ma txi kynimane Qman Dios, qa ma che japun qe tmandamyent ex qe tley kyu'ne, aqeju tz'ib'an tuj u'j te ley lu, ex qa ma che ajtz meltz'aje tuk'il tu'n tkyaqil kyk'u'je ex tu'n tkyaqil kyanmiye.

11Aju mandamyent in xi nma'ne kyeye ja'lo mya kyuw te kyeye, ex mya mlay b'ant kyu'ne.

12Mya max ta' tuj kya'j, tu'ntzun kymanteye kyja': ¿Alkye jun jaku jax tuj kya'j tu'n ttzaj tb'i'n ex tu'n ttzaj tma'n qe, tu'ntzun tjapun qu'n?

13Ax ikx mya max ta' jlajxi mar, tu'ntzun kymanteye kyja': ¿Alkye jun jaku tzik'x jlajxi mar tu'n ttzaj tb'i'n ex tu'n ttzaj tma'n qe, tu'ntzun tjapun qu'n?

14Niqa' ta' mandamyent kyuk'ile; ax ta' tuj kytzi'ye, ex ax ta' tuj kyanmiye, tu'ntzun tjapun kyu'ne.

15Kyb'intze ja'lo: Kb'el nq'o'ne kab'e tumel kywitze tu'n tjaw kysk'o'ne alkye kyajb'ile; qa chwinqlal ex qa kamik; qa tu'n kytene b'a'n ex qa tu'n kytene mya b'a'n.

16Qa ma txi kyb'i'ne aju in xi nma'ne kyeye ja'lo, qa ma kyk'ujlaye Qman Dios, qa ma che ok lpe'ye ti'j, qa ma che japun qe tmandamyent kyu'ne kyuk'ix qe tley ex qe tkawb'il, che anq'iltzune, kchmetel nim kyk'wa'le, ex che ky'iwlanjtzele tu'n tuj tx'otx' ktzajel tq'o'n kyeye tu'n kyoke te tajwil.

17Qatzun ma tz'el kypa'n kyib'e ti'j Qman, qa minti' ma txi kyb'i'ne tyol, qa ma txi kyq'o'ne amb'il tu'n kyxi lpe'ye kyi'j junxitl dios tu'n kyk'ulune kywitz ex tu'n kykub' ẍmeje'ye kywitz,

18b'i'x kxel nma'ne kyeye ja'lo, ax tok il ti'j che najele, ex mlay che tene nim q'ij tuj tx'otx' ktzyetel kyu'ne kyik'xlenxiye tuj nima Jordán.

19Tuj q'ij lu in che ok nq'o'ne kya'j tuk'ix tx'otx' te testiw kyi'je, qa ax tok ma txi nma'ne tu'n tjaw kysk'o'ne kyxol kab'e tumel lu: Qa chwinqlal ex qa kamik, qa ky'iwb'il ex qa mya b'a'n. Kyja'tzun kysk'on jawe chwinqlal, tu'ntzun kyanq'ine kyuk'ix qe kyiyjile che ul itz'j te tib'ajxi.

20Kyk'ujlame Qman Dios, kynimanxe, ex kukx che lpe'ke ti'j, porke a q'olte kychwinqlale, ex tu'n che tele nim q'ij twitz tx'otx' tzaj ttziyan tu'n ttzaj tq'o'n kye kyxe'chele Abraham, Isaac ex Jacob.