1 Crónicas 12 - Mam Huehuetenango New Ortography

Qe xjal mojl kyyol tuk'il David

1Tej otoq tz'el oq David twitz Saúl aju tky'ajal Cis, at jun k'loj xjal kyuw kyk'u'j tuj q'oj e je'x onil te David tuj tnam Siclag.

2Aqeju q'ojlel lu, q'i'ntoq qe xob'l plech kyu'n, b'a'n che xo'n ab'j tu'n xob'l ab'j, ex b'a'n che xo'n plech tu'n xob'l plech; b'a'n che xo'n tu'n kyb'anq'ab' ex tu'n kynayaj. Tiyjil Benjamín qe, at kyxilen tuk'il Saúl, ex atzun qe jlu:

3Ahiezer aju nejenel, tuk'ix Joás; aqe jlu tky'ajal Semaa qe, ex atzun najlqe tuj tnam Gabaa; Jeziel ex Pelet, aqe jlu tky'ajal Azmavet qe; Beraca ex Jehú aju aj Anatot,

4Ismaías aju aj Gabaón, a jlu jun kyxol qe 30 xinaq kyuw kyk'u'j tuj q'oj, ax nejenel kye; Jeremías, Jahaziel, Johanán, Jozabad aju aj Gedera,

5Eluzai, Jerimot, Bealías, Semarías, Sefatías aju aj Haruf,

6Elcana, Isías, Azareel, Joezer, tuk'ix Jasobeam, tiyjil Coré qe,

7Joela ex Zebadías, aqe jlu tky'ajal Jeroham qe, aju aj Gedor.

8Ax ikx aj kyq'on kyib' junjun tiyjil Gad tuj tkwent David tej tten tuj lugar te tkolb'il tib' tuj tzqij tx'otx'. Q'ojlel qe, kyuw kyk'u'j tuj q'oj ex xnaq'tzamni qe tu'n kyq'ojin, ex q'i'mlex kymaqb'il tuk'ix kylans; jawni qe, minti' in che xob'; ik kyten ik tza'n b'alun, ex kyuw che qelan kywi' qe witz ik tza'n masat.

9Ex atzun qe jlu: Ezer tb'i tnejel, Obadías tb'i tkab'in, Eliab tb'i toxin,

10Mismana tb'i tkyajin, Jeremías tb'i tjwe'yin,

11Atai tb'i tqaqin, Eliel tb'i twuqin,

12Johanán tb'i twajxaqin, Elzabad tb'i tb'elajin,

13Jeremías tb'i tlajin, ex Macbanai tb'i tjunlajin.

14Aqe jlu tiyjil Gad qe toktoq kyoklen te nejenel kye soldad; aju ch'in toklen tok, jun syent soldad at tuj tkwent, atzunju ma' toklen tok, jun mil soldad at tuj tkwent.

15Atzun qe jlu e ik'x tuj nima Jordán ttzi jb'alil tej otoq ch'iy nima ex otoq b'aj noj tuj tb'e, ex kykyaqil qeju ate' tuj chq'ajlaj ttzi nima Jordán tuj tjawitz q'ij ex tuj telex q'ij e je'l oq kyu'n.

16Ax ikx at junjun xinaq kyxol tiyjil Benjamín ex kyxol tiyjil Judá e je'x tu'n taj kyq'on kyib' tuk'il David tuj lugar te tkolb'il tib'.

17Atzunte David ex kanul kyi'j ex xi tma'n kye kyja': Qa ma che ule wuk'ile tu'n tten qmojb'ab'l qib' ex tu'n kyonine wuk'ile, jaku che k'mete wu'ne tu'n tkyaqil wanmiye; qatzun ma che ule noq tu'n kyok meltz'aje wi'je ex tu'n nxi kyq'o'ne tuj kyq'ab' aj q'oj wi'je, ex minti' jun wile ma nb'inchaye, ex jaku til Kydios qtzan qxe'chel ti k'okel kyi'je tu'n, chi David.

18Atzunte Amasai aju nejenel kye qe 30 xinaq, ul T-xew Dios tuk'il, jaw tq'ajq'ajel twi' kyuwxix ex tma:

Teya qo'ye, tat David, ex tuk'ila ato'ye, aya tky'ajal Isaí. Kuchiwt tu'n ttena tuj txub'txaj, kuchiwt tu'n ttena tuj txub'txaj kyuk'ix qeju onil teya, porke aju Tdiosa ma onin teya, chi Amasai.

19Ax ikx aj kyq'on kyib' junjun tiyjil Manasés tuj tkwent David tej t-xi' kyuk'il aj Filisteo tu'n tq'ojin ti'j Saúl. Ex minti' xi' David onil kyuk'il aj Filisteo, ex e yolin qe nejenel kye aj Filisteo ti'j, ex b'ant ti'j kyu'n tu'n mi'n t-xi' kyuk'il ex kyma kyja': Jaku b'ant tz'ok meltz'aj David qi'j, mya yajku tz'aj tq'on tib' tuk'il Saúl aju tpatrón; ex jaku qo naj.

20Aqeju xinaq tiyjil Manasés aj kyq'on kyib' tuj tkwent David tej t-xi' tuj Siclag, atzun qe jlu: Adnas, Jozabad, Jediaiel, Micael, Jozabad, Eliú ex Ziletai; aqe jlu nejenel qe kye soldad tiyjil Manasés ex at jun milchaq soldad tuj tkwent junjun.

21Atzun qe jlu e onin tuk'il David tej tq'ojin kyi'j txqan eleq', ex kykyaqil qe jlu kyuw kyk'u'j tuj q'oj ex ok tq'o'n David kyoklen te nejenel kye soldad.

22Ex tkyaqil q'ij in che ulxe txqantl xinaq onil tuk'il David, tejxi tchmet nimxix kyajlal soldad.

Qe t-soldad David

23Atzun jun kyajlal soldad jlu q'i'mlex kymakb'il in che ajb'en tuj q'oj, b'anin kyten tu'n kyq'ojin, ex ok kymojb'an kyib' tuk'il David tuj tnam Hebrón, tu'n tok kyq'o'n David te rey te t-xel Saúl, ik tza'nx otoq tma Qman.

24Kyxol tiyjil Judá at qaq mil tuk'il wajxaq syent xinaq q'i'mlex maqb'il kyu'n, tuk'ix kylans, ex b'anin kyten tu'n kyq'ojin.

25Kyxol tiyjil Simeón at wuq mil tuk'il jun syent xinaq kyuw kyk'u'j tuj q'oj ex b'anin kyten tu'n kyq'ojin.

26Kyxol tiyjil Leví at kyaje mil tuk'il qaq syent kyb'et.

27Ax ikx at ox mil tuk'il wuq syent tiyjil Aarón, ex aju nejenel kye, Joiada tb'i,

28tuk'ix Sadoc aju ku'xun kyuw tk'u'j tuj q'oj, tuk'ix 22 nejenel tuk'il, ax terman qe.

29Kyxol tiyjil Benjamín at ox mil aj kyq'on kyib' tuj tkwent David, atzun tnimal kyb'et ax e kyaj ten kytxlaj tiyjil Saúl, ex ax tiyjil Benjamín te Saúl.

30Kyxol tiyjil Efraín at winqin mil tuk'il wajxaq syent xinaq kyuw kyk'u'j tuj q'oj, ex in che yolin kyxjalil kyi'j qa at-xix kynab'l tu'n kyq'ojin.

31Kyxol mij tiyjil Manasés at wajxaq laj mil xinaq otoq che jaw sk'o'n tu'n kyxi' q'olte toklen David tu'n tok te rey.

32Kyxol tiyjil Isacar at kab' syent xinaq nejenel qe kyi'j kyxjalil, atzun qe xjal lu at kynab'l tu'n tel kynik' ti'j tq'ijlalil ex tu'n tel kynik' ti'j alkye tu'n kyb'inchante aj Israel.

33Kyxol tiyjil Zabulón at 50 mil soldad b'anin kyten tu'n kyxi' tuj q'oj, ex q'i'mlex tkyaqil txkaj makb'il kyu'n, aqeju in che ajb'en tuj q'oj, ex kyq'on kyib' tu'n kyonin ti'j David.

34Atzun kyxol tiyjil Neftalí at jun mil nejenel kyuk'ix 37 mil xinaq q'i'mlex kylans tuk'ix kymaqb'il in che ajb'en tuj q'oj.

35Kyxol tiyjil Dan at 28 mil tuk'il qaq syent soldad b'anin kyten tu'n kyq'ojin.

36Kyxol tiyjil Aser at 40 mil soldad at kynab'l, b'anin kyten tu'n kyq'ojin.

37Ax ikx kyxol qeju ate' jlajxi nima Jordán at jun syent tuk'il winqin mil xinaq; at junjun tiyjil Rubén qe, ex junjuntl tiyjil Gad, tuk'ix mijtl tiyjil Manasés, q'i'n tkyaqil txkaj makb'il kyu'n, aqeju in che ajb'en tuj q'oj.

38Kykyaqil soldad lu b'anin kyten tu'n kyxi' tuj q'oj. Tu'n tkyaqil kyanmi e je'x tu'n kypon max tuj tnam Hebrón tu'n tok kyq'o'n toklen David te rey kyib'aj kykyaqil aj Israel, ax ikx kye txqantl aj Israel ax kyximb'etz tu'n tok David te rey.

39Ox q'ij e ten tuk'il David ma chixin. E wa'n ex e k'an porke qe kyxjalil otoq b'aj kyb'incha'n tkyaqilju at tajb'en tu'n kywa'n ti'j.

40Ax ikx qe kyvesin, kyuk'ix qe tiyjil Isacar, qe tiyjil Zabulón ex qe tiyjil Neftalí, pon kyi'n arin, tuk'ix twitz higo tzqijsa'maj, twitz uva tzqijsa'maj, ta'l twitz uva, ex chib'j aseyt. Tkyaqil jlu pon kyi'n kyib'aj chej bur, camey, mul, ex kyib'aj wakẍ. Ax ikx pon kyi'n qe wakẍ ex qe ẍne'l te chib'j. O chmet nimku, tu'nju nimxix o che tzalaj qe aj Israel.