Jeremías 13 - Mam Huehuetenango New Ortography

Aju techal ti'j ju k'alb'il k'u'jb'aj q'aynaj

1Tzaj tma'n Qman weye: Txi'ya ex laq'ometza jun k'alb'il k'u'jb'aj b'inchamaj ti'j noq' lino, q'o'nka tk'u'ja, ex mi'n tz'ok tak'sa'na tu'n a'.

2Etz nlaq'o'ne k'alb'il k'u'jb'aj ik tza'nx otoq tzaj tma'n Qman weye ex ok nq'o'ne nk'u'je.

3Tzajtzun yolin juntl maj Qman wuk'ile ex tzaj tma'n kyja':

4Q'inxa ju k'alb'il k'u'jb'aj ma tz'etz tlaq'o'na, aju tok tk'u'ja, txi'ya ttzi nima Éufrates ex ewanxa tuj jun tpa'xil pik ma chixin, chi Qman weye.

5Inxtzune ttzi nima Éufrates ex xi we'wane k'alb'il k'u'jb'aj ik tza'nx otoq tzaj tma'n Qman weye.

6Tejtzun tel nim q'ij tzaj tma'n Qman weye: Txi'ya ttzi nima Éufrates ex q'intza k'alb'il k'u'jb'aj, aju xi nma'ne teya tu'n t-xi tewakja ma chixin.

7Inxtzune ttzi nima Éufrates ex jatz wi'ne k'alb'il k'u'jb'aj jatum otoq ku'x we'wane, ex otoq q'ay ex minti'toq ch'in tajb'en.

8Tzajtzun yolin Qman juntl maj wuk'ile ex tma kyja':

9Kyja'xtzun knajel wu'ne aju kynimb'il kyib' aj Judá tuk'ix nimxix kynimb'il kyib' aj Jerusalén.

10Aqeju tnam xjal lu b'inchal mya b'a'n qe, kyk'i' txi kyniman qe nleye, noq o'kx in kub' kykyuwsa'n kyanmi ex ma che'x lpe' kyi'j qe tilb'ilal tu'n kyajb'en kye ex tu'n kyk'ulun kywitz, ik kyten ik tza'n k'alb'il k'u'jb'aj lu, minti' ch'in tajb'en.

11Ik tza'n jun xjal nno'k tqitz'in jun k'alb'il k'u'jb'aj tmij, kyja'tzun e tena kykyaqil aj Israel wu'ne kyuk'ix kykyaqil aj Judá, e ok nchmo'ne wi'je tu'ntzun kyok te jun tnam etzan wu'ne, tu'n tel tqanil wi'je kyu'n, tu'n kyajb'en te nimal te nb'iye ex tu'n njaw nimsa'ne kyu'n. Ex minti' ma chinx kyniman. Aqine Dios in chin q'mante jlu.

Aju techal kyi'j qe ẍoq' nojni qe

12Ikx q'manxa kye: Ate Qman aju Kydios aj Israel in tma'n kyja': Qa ma ku'x q'ot ta'l twitz uva tuj jun ẍoq', il ti'j tu'n tnoj wen. Atzun kye aj Israel ktzajel kytzaq'we'n teya: ¿Myapetzun b'a'n qu'ne kykyaqil ẍoq' il ti'j tu'n kynoj tu'n ta'l twitz uva?

13Atzun teya kxel ttzaq'we'na kye: Chi Qman kyja': Kyja'xtzun kchyo'l kywi' kykyaqil qeju najlqe tuj tnam lu wu'ne; qe rey, aqeju in che kub' qe' tuj tq'uqb'il David, qe pal, qeju nno'k kyq'on kyib' te nsanjele ex kykyaqil qeju najlqe tuj Jerusalén.

14Ex che najel wu'ne ik tza'n in che pax qe ẍoq' jun ti'j juntl; tza'nx qe mamb'aj ax ikx qe k'wa'lb'aj che najel. Mlayx tzaj q'aq'an nk'u'je kyi'j; che najel wu'ne ex mlayx tzaj tz'ey nk'u'je kyi'j tu'n mi'n kynaj. Aqine Dios in chin q'mante jlu.

Tqanil kye aj Israel ti'j ju ktzajel kyi'j

15Aqeye aj Israel, ma b'aj yolin Qman. Mi'n jaw kyniman kyib'e, che txulekuye b'ilte tyol.

16Kynimsa'n jawe tb'i Qman aju Kydiose na'nxku ttzaj qlolj tu'n, na'nxku kyjaw tolje kywi witz tuj qlolj ex na'nxku tok te qloljxix aju spik'un in che ayone ti'j.

17Qatzun minti' ma txi kyb'i'ne jlu, chin oq'ele kyi'je tuj ewaj, tu'n tlaj kynimb'il kyib'e chin oq'ele nimxix, porke qe xjal etzan tu'n Qman che xel q'i'n pres.

Tqanil tu'n Dios te rey

18Q'manxa te rey ex te ttxu': Kyku'tze tuj kyq'uqb'ile ex che qekuye twitz tx'otx', porke aju kycoroniye tb'anilxix tjax tuj kywi'ye ma ku'tz tz'aq.

19Qe tnam ate' tuj tx'otx' Néguev ma che lamet ex mi jun b'a'n tjaqonte kye. Kykyaqil aj Judá ma che'x q'i'n tuj juntl tnam najchaq.

20Kyke'yin jaw kywitze ex kyke'yinxe qe aj q'oj kyja' kytzaj tuj tx'otx' tuj tb'anq'ab' q'ij. ¿Jatum ate' qe xjal otoq che'x nq'o'ne tuj kykwente, aqeju kyxjalile nim o che tzalaje kyi'j? Chikuya kye chi Qman.

Tqanil tu'n kyxi q'i'n aj Israel najchaq

21¿Ti kxel kyma'ne aqeye aj Jerusalén ok kyokxe tjaq' kykawb'il qe xjal, aqeju ax qeye e xnaq'tzante kye tu'n kyok te kyamiwoye? Tzul ta'w kyi'je ik tza'n jun xu'j ok nnu'l itz'j tal.

22Ex qa ma tzaj kyqanine tiqu'n in b'aj kyi'je ikju, b'a'n tu'n tel kynik'e ti'j qa tu'n tlaj kyile nimxix. Kyja'tzun ma che oke ik tza'n jun xu'j ma tz'el q'i'n t-xb'alun tok ti'j, ikxtzun kyeye ma che kyaj sqiteye kyu'n.

23¿Jakupe tz'ok ttz'umal jun xjal q'eq te saq? ¿Jakupe ch'expet ke'yin ttzmal jun tigre? Kyja'xtzun kyeye mlay kyb'inchaye b'a'n porke ma che naq'ete tu'n kyb'inchanteye mya b'a'n.

24Kyja'tzun che b'ajel nsputune ik tza'n in jaw iqan mu'p tu'n kyq'iq' tuj tzqij tx'otx'.

25Atzun kb'ajel kyi'je aqeye aj Israel, atzun chojb'il kyeye wu'ne ti'j kyb'inchb'ene. Ma tzik' nna'njtze kyu'ne ex ma tz'ok qe' kyk'u'je kyi'j qe tilb'ilal noqx gan qe. Aqine Dios in chin q'mante jlu.

26Ax ikx weye k'elel wi'ne tkyaqil kyxb'alune tok kyi'je, tu'ntzun tkub' kych'ixwiye.

27O che oke aj pajil, minti' ma che ok lpe'ye wi'je. O wile in che k'ulune kywitz qe tilb'ilal tuj kojb'il ex kywi witz, a jlu ik'unxix wu'ne. Ay b'ek'b'il kywitze aqeye aj Jerusalén. ¿Jtoj b'a'n t-xi kykoline tu'n kyb'inchanteye mya b'a'n? Chi Qman.