Amós 3 - Mam Huehuetenango New Ortography

Aju kyaq'un t-sanjel Dios

1Aqeye aj Israel, kyb'inxe aju in tma'n Qman kyi'je, aju etz q'inte kyeye kykyaqile tuj Egipto, chi kyja':

2O'kx aqeye ma che jaw nsk'o'ne kyxol txqantl kyiyjil xjal twitz tx'otx', kyja'tzun kb'el nq'o'ne kycastiwoye tu'n tlaj tkyaqil kyb'inchb'ene mya b'a'n.

3¿Tzinpe in che b'et kab'e xjal junx qa mya mojl kyyol?

4¿Tzinpe in tzanun jun b'alun tjaq' k'ul qa minti' jun tkanb' tkub' twitz? ex ¿tzinpe in tzanun jun tal tman b'alun tuj tjul qa minti' otoq kub' jun tkanb'?

5¿Jakupe tzyet jun chyu'j qa minti' jun k'ob'il tkub'? ¿Tzinpe in kub' tz'aq jun k'ob'il twitz tx'otx' qa minti' otoq tz'okx jun tkanb'?

6¿Minti'pe in che jaw xob' xjal qa ma q'ajt chun tuj tnam? ex qa at jun mya b'a'n ma tzaj tuj tnam, ¿myape a Qman in tzaj samante te?

7Mlay tb'incha Qman jun ti'xti qa na'nxtoq ttzaj tma'n kye t-sanjel.

8¿Alkye jun mlay tzaj lu'lun tu'n t-xob'il qa in tzanun jun b'alun? ¿Alkye jun mlay txi tma'n tyol Qman kye xjal qa ax Qman Dios otoq q'mante?

Kb'el xitj tnam Samaria

9Kymanxe jlu kyuj qe tja rey tuj tnam Asdod ex kyuj qe tja rey tuj tnam Egipto: Kytzaje kywi' qe witz te Samaria ex kyke'yinxe aju mya b'a'n in b'aj tuj ex tza'n tten nim in che yajlanjtz xjal kyu'n txqantl kyuk'il, che chikuye.

10Chi Qman in tma'n: Minti' nne'l kynik' ti'j tza'n tten tu'n kyb'inchante aju tz'aqlxix, in xi kyk'u'n kyuj qe nmaq ja tkyaqilju nne'l kyelq'a'n lajwers kye txqantl xjal.

11Tu'ntzun jlu, chi Qman Dios in tma'n: Kb'ajel kytxolb'an kyib' aj q'oj ti'jele kytanmiye, kb'ajel kyxitun qe ja ma' kywa'l te kykolb'il kyib'e ex kxel kyi'n tkyaqilju at kyuj tja rey.

12Chi Qman in tma'n: Ik tza'n te pastor nne'l t-xk'ayin kab'e piẍ tqan alumaj, ex qa jun piẍ t-ẍkyin tuj ttzi b'alun, ikxtzun che temb'il qe aj Israel najl tuj Samaria, noq junjun che kletel, mer ik tza'n jun piẍ tqan watb'il ex qa jun piẍ tqan siy in kyaj ten.

13Chi Qman aju Tajaw Tkyaqil: Kyb'intze ex kyoke testiw kyi'j tiyjil Jacob, ti'j kyb'inchb'en mya b'a'n;

14tuj q'ij ok tkub' kycastiw aj Israel tu'n tlaj kyil, che b'el nxitune qe altar tuj tnam Betel; che elel tx'emit qe tcach altar ex che b'el tz'aq twitz tx'otx'.

15Kb'el nxitune kyja xjal jatum in che ten tuj tq'ijlalil che'w, tuk'ix kyja jatum in che ten tuj tq'ijlalil kyaq; che najel qe ja toksa'n marfil twitz kykajonil te tujxi ex che najel kykyaqil qe nmaq ja wu'ne jatum najl qe xjal ma' kyoklen, chi Qman.