1 Samuel 12 - Mam Huehuetenango New Ortography

Xi tq'o'n Samuel aju kawb'il tuj tkwent Saúl

1Xitzun tma'n Samuel kye kykyaqil xjal aj Israel:

—Ma kyile ma b'ant wu'ne tkyaqilju tzaj kyqanine weye, ex ma tz'ok nq'o'ne jun rey tu'n tkawin kyib'aje.

2Ex lutzun aju rey lu, aju kb'el nej kywitze. Bay weye ma chin tijine ex ma saqix nwi'ye, ex ate' qe nky'ajale kyxole. Aqine in kub' nej kywitze ojtxi atxix tuj nku'xumale ax ikx ja'lo,

3ex lu qine atine kywitze: Qatzun ma tz'el wi'ne twakẍ jun xjal ex qa tchej, ex qa at jun kyeye ma b'aj nyajla'ne, ex qa at jun ma nb'inchaye mya b'a'n ti'j, ex qa at jun ma tz'el nqanine tpwaq noq tu'n mi'n tkub' t-sentens tu'n tlaj mya b'a'n otoq tb'incha, b'a'n tu'n ttzaj kyma'ne jlu twitz Qman ex twitz ju rey ma jaw t-sk'o'n, ex jaku tz'aj nchjo'ne tkyaqil, chi Samuel.

4Atzun kye xjal xi kyma'n:

—Mi jun maj ma qo b'aj tyajla'na, ex minti' jun mya b'a'n ma tb'inchaya qi'je, ex minti' ma tzaj tk'mo'na tpwaq jun xjal tu'n tkub' tewana til.

5Atzunte Samuel xi tma'n kye:

—Lu Qman te testiw kyi'je tuk'ix aju rey ma jaw t-sk'o'n, tu'nju minti' ma knet jun wile kyu'ne, chi Samuel.

—Ax tok jlu, che chi.

6Ex xi tma'ntl Samuel kye tnam xjal:

—Ate Qman xi q'onte toklen Moisés ex Aarón tu'n kyetz qe kyxe'chele tuj Egipto.

7Kyja'tzun kyb'incham kytene, porke twitz Qman chin yolile kyuk'ile ti'j tkyaqilju b'a'n ma tb'incha kyeye ex kye qe kyxe'chele.

8Tej tpon Jacob kyuk'ix qe tiyjil tuj Egipto, e oktzun ten qe kyxe'chele kub'sal twitz Qman; atzunte Qman xi t-sama'n Moisés tuk'ix Aarón, ex atzun qe e je'tz q'inte kye kyxe'chele tuj Egipto, ex atzun e ul najal tuj lugar lu.

9Atzun kye el kypa'n kyib' ti'j Qman aju Kydios, ex ate Qman xi q'onte kye tuj tq'ab' Sísara aju nejenel kye t-soldad Jabín aju rey tuj Hazor, ex tuj kyq'ab' aj Filisteo, ex tuj tq'ab' rey kye aj Moab, atzun qe jlu e ok ten q'ojlel kyi'j qe kyxe'chele.

10E kub'santzun twitz Qman ex kyma kyja': Ma qo b'inchane il twitza Qman, tu'nju ma kyaj qkolina ex ma qo ok tene k'ulul kywitz tilb'ilal Baal ex kywitz tilb'ilal Astarot. Qo tklomtzuna ja'lo tuj kyq'ab' qe aj q'oj qi'je, ex qo ajb'eltzune o'kx teya, che chi.

11Kyja'tzun, ate Qman xi samante Gedeón, tuk'ix Barac, tuk'ix Jefté, ex wuk'ixe aqine Samuel, tu'ntzun kyklete tuj kyq'ab' qe aj q'oj kyi'je, ex kyja'tzun ẍe anq'ine tuj txub'txaj.

12Atzun kyeye, tej kylonteye kyja'toq tok tzoqpaj Nahas kyi'je, aju rey kye aj Amón, tzaj kyqanine jun rey weye tu'n tkawin kyib'aje, maske aju kyeye kyrey ate Qman aju Kydiose.

13Ex lutzun rey lu, aju ma jaw kysk'o'ne. Ate Qman ma tzaj q'onte rey aju xi kyqanine.

14Atzun ja'lo, qa ma txi kynimane Qman ex qa ma che k'ulune te, ex qa ma txi kynimane tyol ex qa mi'n ma che ik'e kyib'aj qe tmandamyent, tza'nx aqeye ax ikx aju rey in kawin kyib'aje, ex qa ma che anq'ine ik tza'nx tajb'il Qman aju Kydiose, oktzun che anq'ile b'a'n.

15Ex qa minti' ma txi kynimane, ex qa minti' ma che japun qe tmandamyent kyu'ne, kb'el tq'o'n Qman kycastiwoye, ik tza'n o tb'incha kyi'j kyxe'chele.

16Kyja'tzun ax che tenkje, ex k'okel kyke'yine qe techal ma'xix che b'antel tu'n Qman kywitze.

17Aju tq'ijlalil ja'lo, atzun tu'n tjaw chmet triw ex minti' jb'al, ¿jek ax? Ex aqine chin xel qaninte te Qman tu'n ttzaj tq'o'n jb'al tuk'ix q'ankyoq, tu'ntzun tok kyke'yine ex tu'n tel kynik'e ti'j qa mya b'a'n aju ma kyb'inchaye twitz Qman, tu'nju ma txi kyqanine tu'n tok jun kyreye, chi Samuel.

18Oktzun ten Samuel qanilte te Qman, jurattzun tzaj jb'al ex q'ankyoq; atzun kye kykyaqil xjal tzaj nim kyxob'il twitz Qman ex twitz Samuel.

19Kyja'tzun xi kyma'n kykyaqil xjal te Samuel:

—Kub'sana qi'je twitz Qman Dios tu'ntzun mi'n qkyime aqo'ye tmajena, ex mas ma ch'iytl qile tu'nju ma txi qqanine jun rey.

20Atzunte Samuel xi ttzaq'we'n:

—Mi'n che xob'e. Ax tok o kyb'inchaye mya b'a'n; atzun ja'lo mi'n tz'el kypa'n kyib'e ti'j Qman, noq o'kx che k'ulune te tu'n tkyaqil kyanmiye.

21Mi'n che'x lpe'ye kyi'j qeju mya ax tok Dios qe, ex mlay che onin ex mlay che kolin kyi'je, porke mya ax tok Dios qe.

22Atzunte Qman, mlay che kyaj koline tu'n noq tu'nju ma' toklen tb'i; ex tajb'il tu'n kyoke te jun tnam tekuxix.

23Ik tza'n weye, qa ma txi nkoline tu'n nna'ne Dios kyi'je, jun il jlu twitz Qman, ex kuchiwt tu'n mi'n ttzaj tq'o'n Qman amb'il weye tu'n t-xi nkoline tu'n nna'ne Dios kyi'je. Ex che xel nxnaq'tza'ne tza'n tten tu'n kyb'ete tuj tumelxix ex tuj tjiqumal ti'j.

24Kyja'tzun, kynimanxe Qman ex che k'ulune twitz axix tok ex tu'n tkyaqil kyanmiye, ex kyna'ntze aju nimxix ma tb'incha Qman kyeye.

25Ex qa kukx ma kyb'inchaye mya b'a'n, che najele tuk'ix ju kyreye, chi Samuel, b'aj tma'n.