1Nman Dios, chin tkloma tuj kyq'ab' aj q'oj wi'je; chin klet-xwita tu'na tuj kyq'ab' qeju in jaw kyi'n kyib' wi'je.
2Chin tkloma tuj kyq'ab' xjal b'inchal mya b'a'n, chin tkloma tuj kyq'ab' qe b'yol xjal,
3tu'nju at qe xjal nimxix kyipumal noq in che ayon ti'j tu'n nkub' kyb'yo'n.
4Nman, b'ajx jaw wi'n wib'e kyi'j ex b'ajx chin b'inchane il; minti' o b'ant jun mya b'a'n wu'ne kyi'j, ex maske ikju, pero nno'k tilil kyu'n tu'n kyok tzoqpaj wi'je. Q'i'mel twatla. Tzaja onil weye ex ke'yinxa aju in b'ant kyu'n.
5Aya Nman Dios aju Dios Tajaw Tkyaqil, aju Dios kye aj Israel, q'i'mel twatla, ex q'on kub'a kycastiw qe xjal mya okslal qe ti'ja; mi'n tzaj tz'e'y tk'u'ja kyi'j qe b'inchal mya b'a'n, aqeju in che ok meltz'aj wi'je.
6Qonik'an in che ajtz meltz'aj, in che qawin ik tza'n qe tx'yan, ex noq in che b'etje' tuj tnam.
7Nim in che yasun ex in che xob'tzan, aju kytzi' mer ik tza'n spad in che naj xjal tu'n, ex in kyma'n: Mi a'l jun in b'in qi'j, che chi.
8Atzun teya Nman in tze'na kyi'j; in xmayina kyi'j qeju mya okslal qe ti'ja.
9Tuk'ila in nklon wib'e Nman Dios, porke aya q'olte wipumale ex aya kolol wi'je.
10Aju Dios in k'ujlante weye tzul onil weye; kwila'ye ok tkub' kyi'j qe aj q'oj wi'je tu'n.
11Mi'n che kub' tb'yo'n naja qe, tu'ntzun mi'n tik' tna'njtz kyu'n qe ntanmile; sputun b'aja qe tu'n tipumala, ex che najxwit tu'na. Aya Nman kolol qi'je.
12In che b'inchan il ti'j tkyaqilju in kyma'n; che tpresin okxa qe tu'nju kynimb'il kyib' ex tu'nju yol in b'aj kyjuramentin mya ax tok.
13B'yo'n kub'a qe tu'n tq'oja, b'yo'n kub'a qe tu'n mi'n kukx kyanq'in; tu'ntzun tel kynik' xjal ti'j qa ate Dios in kawin kyib'aj aj Israel ex tuj tkyaqil twitz tx'otx'.
14Ok kyajtz meltz'aj te qonik'an in che qawin ik tza'n qe tx'yan, ex in che b'etje' tuj tnam,
15in che b'etje', in che jyon kywa, in che jaw xo'jin tu'nju minti'xix in noj kyk'u'j.
16Atzun weye, chin b'itzale teya te prim; chin b'itzale ti'j tk'ujlalila ex tipumala, tu'nju aya jun kolb'il weye ex tuk'ila in pon nklon wib'e ok ntene tuj yajb'il weye.
17Teya che xel nb'itzane qe b'itz, Nman Dios, porke aya q'ol wipumale ex aya kolb'il weye; aya Dios aju in k'ujlante weye.
Who We AreWhat We EelieveWhat We Do
2025 by iamachristian.org,Inc All rights reserved.
