Proverbios 29 - Mam Huehuetenango New Ortography

1Aju xjal minti' in xi tniman kawb'il te, minab'en knajel ex mlayx klet.

2Ok kykawin qe xjal tz'aqlxix, in che jaw tzalaj qe xjal; oktzun kykawin qe xjal mya b'a'n, b'i'x in che jaw ayayan xjal tu'n kyb'is.

3Aju k'wa'lb'aj at tnab'l in jaw tzalaj tman tu'n; atzunju k'wa'lb'aj in xi' kyuk'il qe xu'j jawni kywitz kyuk'il xinaq, kb'el naj tq'inumab'l.

4Aju rey in xi tb'incha'n ti'j tkyaqil tuj tumelxix in tkyuwsa'n ttanmi; atzunju rey o'kx in qanin chojenj kyib'aj xjal in naj ttanmi tu'n.

5Aju xjal nno'k ten q'malte yol b'a'n noq tu'n tkub' t-sb'u'n jun tuk'il, in kub' tq'o'n jun k'ob'il tuj tex tb'e.

6Ax qe til xjal b'inchal mya b'a'n in che ok te jun k'ob'il te; atzunju xjal tz'aqlxix in b'itzan ex in tzalaj.

7Aju xjal tz'aqlxix in kolin kyi'j qe xjal meb'a ex in onin kyi'j, atzunju xjal b'inchal mya b'a'n minti' taj kyi'j.

8Qe xjal jyol q'oj, in che jaw tilj tnam xjal kyu'n; atzun qe xjal at kynab'l, in chewix q'oj kyu'n.

9Qa ma tz'etz tq'oj jun xjal at tnab'l tuk'il jun xjal minti' tnab'l, ate xjal minti' tnab'l noq in jaw q'ojl, nno'k ten xmayil ex mlayx b'ant ti'j q'oj kyu'n.

10Qe xjal b'yol xjal qe, ik'un ju xjal b'a'n tmod kyu'n, atzun qe xjal b'a'n kymod in che jyon tza'n tten tu'n kytzalaj.

11Aju xjal minti' tnab'l in xi ttzoqpin tib' tu'n tq'ojin, atzunju xjal at tnab'l in tjak'unte tib' tu'n mi'n tq'ojin.

12Qa at jun kawil in xi tq'o'n twi' kyi'j qe nik'aj yol, kykyaqil xjal at kyoklen ttxlaj che okel te mya b'a'n.

13Aju xjal meb'a ex ju xjal in yajlante te, at jun in kyk'mo'n kykab'il; tu'n Qman xi tq'o'n qe tb'aq' kywitz kykab'il.

14Aju rey in kawin tuj tumelxix kyib'aj qe xjal meb'a kukx kkawil te jumajx.

15Qa ma txi kawin jun k'wa'l ex ma txi' tasyal, tu'n jlu nno'k tnab'l, atzunju k'wa'lb'aj in xi q'o'n amb'il te tu'n tb'inchante noq alkye tajb'il, jun ch'ixb'il jlu te ttxu'.

16Qa ma chmet nim xjal b'inchal mya b'a'n, ax ikx in chmet nim il; ex qe xjal tz'aqlxix ok kyila' ok kykub' tz'aq qe jlu.

17Kawinx tk'wa'la ex k'anq'iltzuna tu'n tuj txub'txaj, ex nim jaku tzalaja ti'j.

18Jatum minti' jun t-sanjel Dios tuj jun tnam, mya tuj ttxolil in che anq'in xjal, pero at tzalajb'il teju xjal in japun tley Dios tu'n.

19Noq tu'n yol mlay txi kawit aju majen, maske tz'ex tuj twi' pero mlay txi tniman.

20Mas b'a'n ch'intl te xjal minti' tnab'l twitzju xjal jurat in yolin naj ex minti' in ximan ti'j tyol.

21Aju xjal mi tel-len jun tmajen tu'n atxix tuj tne'yilx majen, te b'ajsb'il mya b'a'n k'elel te patrón lu.

22Aju xjal jawni q'ojl, noq q'oj in tzaj ti'n, ex aju xjal tx'u'j twi', noq kyja' tchmet til.

23Aju xjal in jaw tniman tib', k'okel q'o'n te ch'in toklen, atzunju xjal mans, kjawil nimsa'n.

24Aju xjal nno'k tuk'in tib' tuk'il jun eleq', tu'nx nne'l tik'un tib', ex maske tb'i qe mya b'a'n che tzajel ti'j, pero minti' in jatz tma'n til.

25Aju xjal in tzaj t-xob'il twitz juntl xjal, jun k'ob'il jlu te te, atzunju xjal q'uql tk'u'j ti'j Qman, minti' jun kb'ajel ti'j.

26Nimku xjal in che jyon ti'j jun xtalb'il tu'n jun kawil, ex o'kxte Qman in xi b'inchante ti'j tkyaqil tuj tumelxix.

27Qe xjal tz'aqlxix, in che ik'un kyi'j qe xjal mya b'a'n, ex qe xjal b'inchal mya b'a'n, in che ik'un kyi'j qe xjal tz'aqlxix.