Éxodo 29 - Mam Huehuetenango New Ortography

Xjansab'l kye pal Levítico 8.1-36

1Atzun jlu b'inchama ti'j Aarón ex kyi'j qe tky'ajal tu'n kyxjanset tu'n kyok te pal te weye: Q'intza jun tal tor ex kab'e tman ẍne'l minti' kypaltil,

2kyuk'ix pan, tuk'ix tal pan xyoq'in tuk'il aseyt ex tal pan xaxj su'n aseyt ti'j, b'inchamaj qe ti'j arin tb'anilxix nne'l ti'j triw ex minti' t-samel kyuj tu'n tjaw mal kyk'u'j.

3Che b'elextzun tq'o'na tuj jun tal chi'l, ex che tzajel toyina junx tuk'il tal tor ex qe kab'e tman ẍne'l.

4Kxe'ltzun ti'na Aarón ex qe tky'ajal ttzi ja xb'alun te mojb'ab'l tib'il ex che b'ajel tchi'na tu'n a'.

5Che tzajeltzun ti'na qe xb'alun otoq che b'ant tu'na, ex k'okel tq'o'na aju ẍjo'w ti'j Aarón, aju xb'alun k'okel tujxi kapiẍay, aju kapiẍay ex aju tal xb'alun k'okel ten ttzi t-xu'k. K'okel tk'alo'na tk'u'j tu'n k'alb'il tk'u'j kapiẍay,

6k'okel tq'o'na aju tal xb'alun te k'alb'il twi', ex ti'j jlu k'okel tq'o'na aju tal tz'lom xjan.

7Ktzajeltzun ti'na aju aseyt te xjansab'l, ex kb'el tqo'na tib'aj twi Aarón tu'n t-xjanset tu'n tok te pal.

8Ax ikx laq'b'antza qe tky'ajal twitza, ex k'okel tq'o'na kyẍjo'w.

9K'okel tk'alo'na tk'u'j Aarón ex kyk'u'j qe tky'ajal tu'nju k'alb'il kyk'u'j, ex k'okel tq'o'na qe tal xb'alun te k'alb'il kywi'. Kyja'tzun tten k'okel tq'o'na toklen Aarón ex kyoklen qe tky'ajal tu'n kyok te pal te jumajx.

10Te tib'ajxi kxel ti'na tal tor max twitz ja xb'alun te mojb'ab'l tib'il. Atzunte Aarón ex qe tky'ajal kb'el kyq'o'n kyq'ab' tib'aj twi'.

11Kb'eltzun tb'yo'na tal tor lu nwitze ttzi ja xb'alun te mojb'ab'l tib'il,

12ktzajel ti'na ch'in tchk'el tu'n twi' tal tq'ab'a, ex k'okel t-su'na kyi'j qe tkach altar, atzun txqantl chik' kyjel ten, kb'elex tqo'na t-xe altar.

13K'elel ti'na tkyaqil ju sebo tok ti'j tuj tk'u'j ex ti'j ttx'otx', kyuk'ix kyi'j tchenaq', ex che b'el tpatuna tib'aj altar.

14Atzunju tchib'jal tuk'ix ttz'umal ex ttxa', che b'el tpatuna ti'jxi campament, ex atzun chojb'il te il jlu.

15Ax ikx ktzajel ti'na jun kyxol kab'e tman ẍne'l, atzunte Aarón ex qe tky'ajal kb'el kyq'o'n kyq'ab' tib'aj twi'.

16Te tib'ajxi kb'el tb'yo'na alumaj lu, ex k'okel ttx'ito'na tchk'el ti'jele tk'u'j altar.

17Kb'ajel tpaẍu'na, che b'ajel ttx'jo'na qe tuj tk'u'j ex qe tqan, ex che b'el tq'o'na kyib'aj qe piẍ t-ximlal ex tib'aj twi'.

18Kb'eltzun tpatuna tkyaqil t-ximlal tman ẍne'l tib'aj altar. Atzun oyaj lu patun in kub' ex at tk'ok'jal in chin tzalaje ti'j.

19Ktzajeltzun ti'na juntl tman ẍne'l. Atzunte Aarón ex qe tky'ajal kb'el kyq'o'n kyq'ab' tib'aj twi'.

20Kb'el tb'yo'na alumaj lu, ktzajel ti'na ch'in tchk'el ex k'okel t-su'na ti'j tje' t-ẍkyin Aarón tuj tb'anq'ab' ex ti'j tje' kyẍkyin qe tky'ajal, ax ikx ti'j tman kyq'ab' tuj kyb'anq'ab' ex ti'j tman kyqan tuj kyb'anq'ab'. K'okel ttx'ito'na ch'in chik' ti'jele tk'u'j altar,

21atzunju chik' kyjel ten tib'aj altar junx tuk'il aseyt te xjansab'l, kxel ttx'ito'na ti'j Aarón ex ti'j t-xb'alun, ax ikx kyi'j qe tky'ajal ex ti'j kyxb'alun. Kyja'tzun tten kxjansetel Aarón kyuk'ix qe tky'ajal ex qe kyxb'alun.

22Ktzajeltzun ti'na t-sebyil tman ẍne'l lu tuk'ix tje' ex aju sebo tok ti'j tuj tk'u'j ex ti'j ttx'otx', kyuk'ix qe kykab'il tchenaq' ex aju sebo tok kyi'j, tuk'ix tkux tuj tb'anq'ab', ex atzun tman ẍne'l lu te xjansab'l kye pal.

23Ax ikx jun pan matij, jun tal pan xyoq'in tuk'il aseyt ex jun tal pan xaxj, kjawitz ti'na tuj tal chi'l jatum kyku'x qe pan minti' t-samel kyuj tu'n tjaw mal kyk'u'j, aju tkub'sa'n nwitze.

24Kb'el tq'o'na tkyaqil jlu kyuj tq'ab' Aarón ex kyuj kyq'ab' qe tky'ajal, ex ktzajel kyyukun ik tza'n jun oyaj yukun in jaw nwitze, aqine Kymane.

25Te tib'ajxi k'elel ti'na kyuj kyq'ab' ex kb'el tpatuna tib'aj altar, tib'aj oyaj patun in kub' ex at tk'ok'jal in chin tzalaje ti'j. Atzun oyaj lu patun in kub' nwitze.

26Ktzajel ti'na t-xu'k tman ẍne'l otoq tz'ajb'en te xjansab'l te Aarón, ex kjawil tyukuna ik tza'n jun oyaj yukun in jaw nwitze, ex aju chib'j lu, aya kxel chyo'nte te.

27K'elel tpa'na ttzi t-xu'k ti'j oyaj yukun in jaw nwitze, ex aju tkux ti'j oyaj otoq jax yek'ut nwitze, aju xi yuket ex aju jaw yek'ut ti'j ẍne'l te xjansab'l te Aarón ex kye tky'ajal.

28Aju chib'j lu k'ajb'el te tchi' Aarón ex te kychi' qe tky'ajal. Te jumajx kyjel ten ju ley lu kyxol aj Israel, porke a jlu jun oyaj te weye kyu'n kyi'j qe chojb'il te mojb'ab'l kyib' wuk'ile.

29Aju t-xb'alun Aarón xjansamaj k'ajb'el te kye tiyjil ok kyxjanset ex ok kyk'monte kyoklen te pal.

30Wuq q'ij k'okel ten xb'alun lu ti'j tk'wa'l Aarón kyjel ten te t-xel, ok tokx tuj ja xb'alun te mojb'ab'l tib'il tu'n tajb'en tuj lugar xjan.

31Te tib'ajxi ktzajel ti'na tman ẍne'l te xjansab'l, ex kjawix tq'o'na ta'l tuj lugar pa'nmaj.

32Atzunte Aarón ex qe tky'ajal kxel kychyo'n chib'j lu ttzi ja xb'alun te mojb'ab'l tib'il, ex kxel kywa'n aju pan tku'xsa'n tuj tal chi'l.

33Kxel kychyo'n ex kxel kywa'n aju otoq txi oyit te chojb'il kyil ok kyxjanset ex ok kyk'monte kyoklen te pal. Mi jun xjal mya pal kxel chyo'nte te, ex mi jun kxel wa'nte te, porke xjansamaj qe.

34Qatzun atx chib'j ex qa pan xjansamaj ma kyaj ten te juntl q'ij, kb'el patit. Mi jun kxel chyo'nte te, ex mi jun kxel wa'nte te, porke xjansamaj qe.

35B'inchama tkyaqil jlu ti'j Aarón ex kyi'j qe tky'ajal ik tza'nx tkyaqilju o txi nma'ne teya. Wuq q'ij kxel ti'n tu'n kyb'aj t-xjansa'na.

36Teyle junjun q'ij kb'el tb'yo'na jun tal tor te chojb'il il. Saksama altar tu'n jun chojb'il il kb'el tq'o'na tib'aj, ex kb'el tqo'na aseyt tib'aj tu'ntzun t-xjanset.

37Wuq q'ij kb'el tq'o'na chojb'il il tib'aj altar, ex kb'ajel t-xjansa'na. K'okeltzun altar te xjanxix. Noq alkyexku ma tz'ok takl ti'j, b'i'x kxjansetel.

Qe oyaj tu'n kyxi q'ot kykyaqil q'ij Números 28.1-8

38Teyle junjun q'ij kukx che b'el tq'o'na tib'aj altar kab'e tal tman ẍne'l te jun ab'q'i qe te jun oyaj te Qman.

39Jun tal tman ẍne'l kb'el tq'o'na te prim, ex juntl te qale.

40Tuk'il tnejel tal tman ẍne'l kxel tq'o'na jun k'oẍ arin tb'anilxix, smo'maj tuk'il jun litr aseyt nne'l ti'j twitz tze' olivo, ex kb'el tqo'na jun litr ta'l twitz uva tib'aj.

41Ok tex q'ij kxel tq'o'na juntl tal tman ẍne'l. Kxel tq'o'na oyaj arin ex ta'l twitz uva ti'j, ik tza'nx otoq tb'inchaya te prim. K'okel te jun oyaj patun in kub' at tk'ok'jal in chin tzalaje ti'j.

42Tuj tkyaqil tab'q'iyil te jumajx, kukx che b'el patit qe oyaj lu nwitze ttzi ja xb'alun te mojb'ab'l tib'il jatum chin yolile kyuk'ile.

43Axtzun chin temb'ile kyuk'il aj Israel, ex kxjansetel lugar lu tu'n wajwalile.

44Kxjansetel aju ja xb'alun te mojb'ab'l tib'il wu'ne, tuk'ix altar; ax ikx kxjansetel Aarón wu'ne kyuk'ix qe tky'ajal, tu'ntzun kyok te pal te weye.

45Chin najaltzune kyxol aj Israel ex chin okele te Kydios.

46K'eleltzun kynik' ti'j, aqine Kyman ex Kydios aju etz q'inte kye tuj Egipto tu'ntzun nnajane kyxol. Aqine Kyman ex Kydios.