Levítico 7 - Mam Huehuetenango New Ortography

Qe ley kyi'j qe chojb'il ti'j kypaltil xjal

1Qe chojb'il ti'j kypaltil xjal xjanxix qe, ex atzun qe ley kyi'j jlu:

2Aju alumaj kxel q'ot te chojb'il ti'j kypaltil xjal, il ti'j tu'n tkub' b'yet tujx lugar jatum in che kub' b'yet alumaj patun in che kub', ex aju tchk'el k'okel tx'itet ti'jele tk'u'j altar.

3Il ti'j tu'n t-xi q'ot tkyaqil t-sebyil alumaj: Aju sebo tok ti'j tje' tuk'ix ju toksa'n kyi'j qe tuj tk'u'j,

4kyuk'ix kykab'il tchenaq' tuk'ix sebo toksa'n kyi'j, tuk'ix sebo toksa'n ttzal ti'j, tuk'ix sebo toksa'n ti'j ttx'otx'; a jlu junx k'elel q'it kyuk'il qe tchenaq'.

5Atzunte pal kb'el patunte jlu tib'aj altar te jun oyaj patun in kub' te weye. Jun chojb'il jlu ti'j kypaltil xjal.

6Aju chojb'il lu xjanxix te, o'kx kye pal b'a'n tu'n kychyo'n ti'j, ex kxel kychyo'n tuj jun lugar xjan porke ate jlu xjanxix te.

7Aju chojb'il ti'j kypaltil xjal junx ta' tuk'il chojb'il ti'j il, ex aju ley junx ta' kyi'j kykab'il: aju pal kxel q'onte chojb'il til xjal, b'a'n tu'n tchyo'n ti'j.

8Ax ikx aju ttz'umal alumaj, te pal kxel q'ot, aju kb'el patunte alumaj otoq pon ti'n jun xjal te chojb'il patun in kub'.

9Ax ikx kykyaqil oyaj ti'j twitz awal tzq'ajsamaj tuj jorni, ex tkyaqilju tzq'ajsamaj tuj k'il ex qa tzq'ajsamaj tuj sartén, tex pal kxel q'ot, aju otoq txi oyinte oyaj.

10Ax ikx ktemb'il kykyaqil oyaj ti'j twitz awal mya tzq'ajsamaj, tza'nxix ju xyoq'amaj tuk'il aseyt ex ju tzqijsamaj, k'ajb'el kye kykyaqil tiyjil Aarón, ex parej kxel q'ot kye.

Qe ley kyi'j qe chojb'il te mojb'ab'l tib'il tuk'il Dios

11Atzun qe ley lu kyi'j qe chojb'il te mojb'ab'l tib'il ktzajel kyq'o'ne weye:

12Qa ma tzaj kyq'o'n xjal jun chojb'il te aq'b'il chjonte, ax ikx b'a'n tu'n ttzaj kyq'o'n pan xyoq'amaj tuk'il aseyt, tuk'ix jun wiq tal pan xaxj toksa'n aseyt ti'j, tuk'ix ju pan at aseyt tuj b'inchamaj ti'j arin tb'anil, ex aqeju pan lu mi'n txi kyq'o'n t-samel kyuj tu'n tjaw mal kyk'u'j.

13Ax ikx, ok kyxi kyq'o'n chojb'il te aq'b'il chjonte ex te mojb'ab'l tib'il, tuk'ix pan at t-samel tuj tu'n tjaw mal tk'u'j kxel kyq'o'n.

14Kyi'j kykyaqil oyaj lu k'elel q'it jun pan ti'j junjun txkaj, ex ktzajel toyin weye te jun oyaj; ex te tib'ajxi, tex pal k'ajb'el aju kb'el tx'itonte tchk'el alumaj te chojb'il te mojb'ab'l tib'il.

15Aju tchib'jal alumaj kxel q'ot te aq'b'il chjonte ex te mojb'ab'l tib'il, b'i'x tu'n tb'aj kychyo'n tujx q'ij ok t-xi oyit; minti' jun piẍ tu'n tkyaj ten te juntl q'ij.

16Ex qatzun te chojb'il ti'j jun yol otoq japun tu'n xjal aju alumaj kxel q'ot, ex qa jun oyaj noq tu'n tex xjal tgan, b'a'n tu'n t-xi kychyo'n tujx q'ij ok t-xi oyit, atzunju kjel ten b'a'n tu'n t-xi kychyo'n tuj juntl q'ij;

17ex qatzun atx tchib'jal alumaj kyjel ten tuj toxin q'ij, il ti'j tu'n tkub' patit tkyaqil tuj q'aq'.

18Qatzun at jun ma txi chyo'nte tchib'jal chojb'il te mojb'ab'l tib'il tuj toxin q'ij, aju chojb'il lu mlay k'met wu'ne ex mlay tz'ajb'en te xjal, porke aju chib'j lu otoq tz'ok te tz'il. Alkye ma txi chyo'nte jlu at til ti'j.

19Tkyaqil chib'j ma tz'ok takl ti'j jun ti'xti tz'il, mlay txi chyo't, noq o'kx tu'n tkub' patit.

Kykyaqil xjal kysaqsan kyib', b'a'n tu'n kychyo'n ti'j chib'j te chojb'il lu.

20Qa at jun xjal ttz'ilsan tib' ma txi chyo'nte chib'j otoq txi q'o'n te chojb'il te mojb'ab'l tib'il, aju otoq tzaj q'o'n weye, b'i'x k'elex lajet tu'ntzun mi'n ttentl kyxol t-xjalil.

21Qa at jun xjal ma tz'ok makonte jun ti'xti tz'il, qa t-ximlal jun xjal ttz'ilsan tib' ex qa te jun alumaj tz'il, ex qa noq alkyex juntl ttz'ilil puro ik'b'il, ex qa ma txi tchyo'n chib'j otoq txi q'ot te chojb'il te mojb'ab'l tib'il aju otoq tzaj q'o'n weye, b'i'x k'elex lajet xjal lu tu'ntzun mi'n ttentl kyxol t-xjalil.

Qe ley ti'j kysebyil ex kychk'el alumaj

22Tzaj yolin Qman tuk'il Moisés ex tma:

23Q'manxa kye aj Israel tu'n mi'n t-xi kychyo'n t-sebyil jun tor, mi t-sebyil jun tal ẍne'l ex mi t-sebyil jun chip.

24Aju kysebyil alumaj noq elajx in che kyim ex qa b'yo'n in che kub' kyu'n qe txkup te tjaq' k'ul, b'a'n tu'n tajb'en kyu'n, noq alkyexku tajb'en, ex mi'n txi kychyo'n.

25Noq alkye jun xjal ma txi chyo'nte t-sebyil alumaj aju ktzajel q'o'n weye te jun oyaj patun in kub', b'i'x k'elex lajet tu'ntzun mi'n ttentl kyxol t-xjalil.

26Noq jaxja che najale, mi'n txi kychyo'ne kychk'el qe chyu'j ex mi kychk'el alumaj.

27Aju xjal kxel chyo'nte kychk'el noq alkyex alumaj, b'i'x k'elex lajet tu'ntzun mi'n ttentl kyxol t-xjalil.

Aju kye pal kychi' tu'n tel q'it ti'j chojb'il

28Tzaj yolin Qman tuk'il Moisés ex tma:

29Q'manxa kye aj Israel jlu: Qa at jun xjal ktzajel q'onte jun chojb'il te mojb'ab'l tib'il wuk'ile, il ti'j tu'n ttzaj tq'o'n ch'in weye.

30Tu'nx tq'ab' ktzajel tq'o'n weye aju oyaj patun in kub'. Ktzajel tq'o'n sebo tuk'ix ttzi t-xu'k alumaj. Aju ttzi t-xu'k ktzajel tq'o'n weye, kxel tyukun nwitze; a jlu jun oyaj yukun ktzajel q'ot nwitze.

31Atzunte pal kb'el patunte sebo tib'aj altar, atzun ttzi t-xu'k alumaj, a Aarón kxel chyo'nte te kyuk'ix qe tky'ajal.

32Aju kxel q'ot te pal ti'j chojb'il te mojb'ab'l tib'il, a aju tkux alumaj tuj tb'anq'ab' kxel q'ot te jun oyaj te.

33Aju tkux alumaj kxel q'ot te chojb'il te mojb'ab'l tib'il, te pal k'okel aju kxel q'onte t-sebyil tuk'ix chik',

34porke kyi'j qe chojb'il te mojb'ab'l tib'il in tzaj kyq'o'n aj Israel weye, o tz'el npa'ne aju ttzi t-xu'k, aju in xi yukun nwitze, ex aju tkux, aju in tzaj kyoyin weye, ex o txi nq'o'ne te Aarón ex kye qe tky'ajal tu'n kyk'monte ti'j kyoyaj aj Israel. Aju ley lu te jumajx tu'n tten.

35Kyi'j qe oyaj in che kub' patit te chojb'il weye, atzun jlu te Aarón k'okel ex kye qe tky'ajal, atxix tuj q'ij tej kyxjanset wu'ne tu'n kyajb'en te pal te weye,

36ex o txi nma'ne kye aj Israel tu'n t-xi kyq'o'n jlu, atxix tuj q'ij tej kyb'aj xjansa'n qe pal, ex a jlu jun ley kukx ktel te jumajx.

37Atzun qe ley lu kyi'j qe chojb'il patun in che kub', kyi'j qe oyaj ti'j twitz awal, kyi'j qe chojb'il il ex qe chojb'il ti'j kypaltil xjal, kyi'j qe oyaj te xjansab'l ex kyi'j qe chojb'il te mojb'ab'l tib'il.

38Aqeju ley lu tu'n Qman tzaj tma'n te Moisés twi witz Sinaí, tej ttzaj tma'n tu'n t-xi kyq'o'n aj Israel kyoyaj te, tuj lugar tzqij tx'otx' Sinaí.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help