Apocalipsis 2 - Mam Huehuetenango New Ortography

Aju tyol Crist kye okslal ate' tuj tnam Efeso

1Tz'ib'anxa teju anjel at kyxol okslal tuj tnam Efeso: Atzun jlu in tma'n aju at wuq che'w tuj tb'anq'ab', aju in b'et kyxol qe wuq kandil q'an pwaq kytx'otx'il:

2Ojtzqi'n qe kyb'inchb'ene wu'ne, nim in che aq'nane ex at kypasense; ex b'a'n wu'ne minti' in kub' tuj kywitze qe xjal in kyb'incha'n mya b'a'n, ex ma tzik' kywitze kyi'j qeju nno'k kyq'on kyib' te apostol, ex mya apostol qe, ex ma tz'el kynik'e kyi'j, nik'al yol qe.

3B'a'n wu'ne at kypasense ex noq tu'n nlaje nimku ma tzik'x kyu'ne, ex nim ma che aq'nane, ex minti' ma che sikte.

4Pero at jun kyile nwitze: Ja'lo minti'tl kyk'ujlalile at ik tza'n nej.

5Kyna'ntztzune jatum tzaj xe't kykub'len tz'aqe, tajtz ti'j kyanmiye ex kyb'inchame ik tza'n kyb'inchaye nej. Qa mi'n ma tz'ajtz ti'j kyanmiye, chin xe'ltzune kyuk'ile ex k'elel wi'ne kykandile tuj tlugar, qa minti' sajtz ti'j kyanmiye.

6Pero at jun b'a'n in kyb'incha'ne: Nne'l kyik'une kyb'inchb'en qe nicolaíta, ax ikx weye nne'l wik'une.

7Alkye at t-ẍkyin, b'inx aju in tma'n Xewb'aj Xjan kye kykyaqil okslal tuj junjun tnam. Alkye ma kub' ti'j mya b'a'n tu'n, kxel nq'o'ne toklen tu'n t-xi tlo'n twitz ju tze' te chwinqlal aju at tuk'il Dios tuj kya'j.

Aju tyol Crist kye okslal ate' tuj tnam Esmirna

8Ex tz'ib'anxa teju anjel at kyxol okslal tuj tnam Esmirna: Atzun jlu in tma'n aju at atxix t-xe tnejel ex kukx ktel ok tjapun b'aj mankb'il tq'ijlalil, aju o kyim ex o jaw anq'in:

9Ojtzqi'n kyb'inchb'ene wu'ne, ex b'a'n wu'ne aju yajb'il kyeye ex aju kymeb'ayile, pero q'inun qeye. Ex b'a'n wu'ne aju xmayb'il kyeye kyu'n xjal in kyma'n qa judiy xjal qe ex mya judiy xjal qe, noq o'kx kyq'on kyib' te Satanás.

10Mi'n che xob'e teju yajb'il kyeye tzul, porke at junjun kyxole ch'ix kyokx q'o'n tuj pres tu'n tajaw il, tu'ntzun kyoke tuj malb'il tu'n; ex tuj laj q'ij che yajlanjtzele. Pero che we'xixe tuj kyokslab'le maske qa ma che kyime tu'n tlaj, ex aqine chin q'olte kychwinqlale ik tza'n jun oyaj.

11Alkye at t-ẍkyin, b'inx aju in tma'n Xewb'aj Xjan kye kykyaqil okslal tuj junjun tnam. Alkye ma kub' ti'j mya b'a'n tu'n, mlay k'ixb'isanjtz tu'n tkab'in kamik.

Aju tyol Crist kye okslal ate' tuj tnam Pérgamo

12Ex tz'ib'anxa teju anjel at kyxol okslal tuj tnam Pérgamo: Atzun jlu in tma'n aju q'i'n spad tu'n, b'anin ttzi' wen te kykab'il pak':

13Ojtzqi'n kyb'inchb'ene wu'ne, ex b'a'n wu'ne jatum najl qeye, atzun najl qeye jatum in kawin Satanás, ex oksla'nx qine kyu'ne, ex minti' kub' kyewane qa okslal qeye wi'je, mi tuj tq'ijlalil tej tten Antipas aju testiw wi'je japunxix tu'n, ex kub' b'yo'n kyxole jatum najl Satanás.

14Pero at jun kyile nwitze, porke at junjun kyxole kukx lepchqe'k ti'j t-xnaq'tzb'il Balaam. Xi tq'o'n Balaam xnaq'tzb'il te Balac tza'n tten tu'n kykub' tz'aq aj Israel tu'n tuj mya b'a'n, xi tma'n kye tu'n t-xi kychyo'n aju in kub' q'ot te oyaj kywitz qe tilb'ilal, ex tu'n kyyaẍin.

15Ax ikx at junjun kyxole kukx lepchqe'k ti'j kyxnaq'tzb'il xjal nicolaíta, aju ik'un wu'ne.

16Kyja'tzun, tajtz ti'j kyanmiye; qa mi'n ma tz'ajtz ti'j kyanmiye, chin xe'ltzun naje kyuk'ile, ex chin q'ojile kyi'j tu'nju spad tetz tuj ntzi'ye.

17Alkye at t-ẍkyin, b'inx aju in tma'n Xewb'aj Xjan kye kykyaqil okslal tuj junjun tnam. Alkye ma kub' ti'j mya b'a'n tu'n, kxel nq'o'ne ch'in twa maná aju ewan, ex kxel nq'o'ne jun tal ab'j te, saq ke'yin, tz'ib'an jun ak'aj tb'i twitz, mi a'l jun ojtzqilte, noq o'kx aju ok kk'molte.

Aju tyol Crist kye okslal ate' tuj tnam Tiatira

18Ex tz'ib'anxa teju anjel at kyxol okslal tuj tnam Tiatira: Atzun jlu in Tma'n Tk'wa'l Dios aju in qoptz'aj tb'aq' twitz ik tza'n tqan q'aq', ex qe tqan in che qoptz'aj ik tza'n q'an k'uxb'il in qoptz'aj tokx tuj q'aq'.

19Ojtzqi'n kyb'inchb'ene wu'ne, ex b'a'n wu'ne at kyk'ujlalile, at kyokslab'le, b'a'n kyajb'eb'le, at kypasense ex mas b'a'n kyb'inchb'ene ja'lo ik tza'n nej.

20Pero at jun kyile nwitze, tu'nju kukx in kyk'mo'ne t-xnaq'tzb'il ju xu'j Jezabel nno'k tq'on tib' te pakb'al, in che'x t-xnaq'tza'n qe nmajene ex in che kub' t-sb'u'n tu'n kyyaẍin ex tu'n t-xi kychyo'n aju oyaj in kub' q'ot kywitz qe tilb'ilal.

21Xi nq'o'ne amb'il te tu'n tajtz ti'j tanmi, ex mi'n taj tu'n tajtz ti'j tanmi tu'n tkyaj tkolin tu'n tyaẍin.

22Kb'eltzun nq'o'ne twitz watb'il tu'n tk'ixb'isanjtz tu'n yab'il, ex qeju in che b'inchan aj pajil tuk'il che xel nq'o'ne tuj nim yajb'il kye, qa mi'n sajtz ti'j kyanmi ti'j ju tb'inchb'en xu'j;

23ex qe tal ok che b'el nb'yo'ne. Ex k'eleltzun kynik' kykyaqil okslal ti'j tuj junjun tnam qa aqine nne'lxix nnik'e ti'j ju at tuj kynab'l xjal ex tuj kyanmi, ex teyle junjun kyeye kxel nq'o'ne t-xel te ik tza'nx ju tb'inchb'en.

24Pero qe txqantl ate' kyxole tuj tnam Tiatira, aqeju minti' in che ok lpe' ti'j t-xnaq'tzb'il ju xu'j lu ex minti' in che xnaq'tzan ti'j t-xnaq'tzb'il Satanás, aju nim nab'l taj tu'n tel qnik' ti'j ik tza'n in kyma'n junjun, kyetzun kxel nma'ne, mlayx kub' nq'o'ne juntl iqtz kyib'aj;

25noq o'kx, aju at kyuk'il, tu'n kytzyunte wen akutzun in chin ule.

26Alkye ma kub' ti'j mya b'a'n tu'n ex kukx in tb'incha'n aju in xi nma'ne, kxel nq'o'ne toklen tu'n tkawin kyib'aj qe nasyon

27ik tza'n weye ma tzaj q'o'n woklene tu'n Nmane; ex kkawil xjal lu kyib'aj qe nasyon tu'n var k'uxb'il ex che b'el b'uchj tu'n ik tza'n in che kub' b'uchj qe k'il.

28Ex kxel nq'o'ne te aju che'w in ja'wil ok in tzaj t-xe kya'j.

29Alkye at t-ẍkyin, b'inx aju in tma'n Xewb'aj Xjan kye kykyaqil okslal tuj junjun tnam.