Job 34 - Mam Huehuetenango New Ortography

Yolin Eliú tkab'maji'n

1Kukx o yolin Eliú ex tma:

2Aqeye at kynab'le ex xnaq'tzamni qeye, kyb'intze qe nyole.

3Aju ẍkyinb'aj b'a'n tu'n alkye t-xilen junjun yol, ik tza'n qk'o'n in tna'n qe tk'ok'jal.

4Ikxtzun tten jlu, b'a'n tu'n qximan ti'j alkye yol tz'aqlxix ex b'a'n tu'n tkub' qximan ti'j alkye b'a'n tuj qwitz.

5Chi Job in tkyuwsa'n kyja': Minti' wile, ex tk'i' Dios txi tb'incha'n wi'je.

6Qa ma txi nma'ne at wile, chin nik'ale yol; aju ẍil tok wi'je minti' in b'ant maske minti' o chin b'inchane il, chitzun.

7Mi a'l juntl ik tza'n te Job. Nim in xmayin ti'j Dios;

8at tgan tu'n tok tjunin tib' kyuk'il qe xjal b'inchal mya b'a'n ex tu'n tb'et kyuk'il qe xjal mya b'a'n qe.

9In tma'n: Minti' ch'in in tkamb'a'n ju xjal nno'k tilil tu'n tu'n ttzalaj Dios ti'j.

10Kyja'tzun, aqeye xjal at kynab'le chin kyb'intze. Ate Dios aju at tipumal tu'n tb'ant tkyaqil tu'n minti' in tb'incha'n jun mya b'a'n ex qa aju mya tz'aqlxix.

11In tq'o'n Dios chojb'il te teyle junjun xjal ik tza'nx kyb'inchb'en; in kub' tq'o'n kycastiw xjal ik tza'nx kyb'inchb'en.

12Ax tok ate Dios aju at tipumal tu'n tb'ant tkyaqil tu'n minti' in tb'incha'n jun mya b'a'n, ex minti' in tb'incha'n aju mya tz'aqlxix.

13Mi a'l jun o tz'ok q'onte toklen tu'n tkawin tib'aj tkyaqil twitz tx'otx'.

14Qa ma tz'el ti'n kyxew qe xjal, aju in q'onte kychwinqlal,

15kykyaqil-lo che kymel ex che okel juntl maj te quq.

16Qa at tnab'la chin tb'intza; q'o'nk twi'ya ti'j nyole.

17Noqwit nne'l tik'un Dios aju tz'aqlxix, mlaywitlo b'ant tkawin. ¿Tza'ntzun tten in tma'na qa mya b'a'n aju in tb'incha'n Dios?

18¿Nno'kpe tma'n tib'aj kywitz qe rey ex qe xjal ma'xix kyoklen: Ploj kymodiye, mya b'a'n qeye?

19Minti' nno'k tke'yin aju kyxilen qe kawil, minti' in che tzaj t-xtalin mas qe q'inun kywitz qe meb'a, porke tu'n Dios e kub' b'incha'n kykyaqil.

20Jurat naj in che kyim xjal tuj tmij aq'b'il, in che jaw tilj xjal ex in che kub' naj; qeju at nim kyipun in che naj, pero mya tu'n xjal in che kyim.

21Tok twitz Dios ti'j tza'n in che b'et xjal ex tok twitz ti'j jatum in che b'et.

22Minti' jun qlolj qxopinxix jatum jaku txi tewan tib' jun xjal b'inchal mya b'a'n.

23Mya il ti'j tu'n t-xi tma'n Dios kye xjal jtoj tu'n kypon xtisil twitz.

24Ok nne'l ti'n Dios kyoklen qe xjal ma' kyoklen, mya il ti'j tu'n tb'aj t-xjelin alkye kyb'inchb'en, ex in xi tq'o'n kyoklen qe jlu kye txqantl.

25Porke b'a'n tu'n Dios aju in kyb'incha'n; oktzun tok qonik'an in che naj tu'n.

26Tuj lugar jatum b'a'n tu'n kyke'yin kykyaqil ti'j in che b'aj tasyalin, ik tza'n in che b'aj asyalin qe xjal mya b'a'n qe,

27porke el kypa'n kyib' ti'j ex minti' o kyajb'e tu'n t-xi kyniman qe yol tu'n kyb'et tuj tumel.

28E b'aj kyyajla'n qe xjal meb'a, atzun qe meb'a e ok ten na'l Dios ex o che tzaj b'i'n tu'n Dios.

29Pero qa minti' in tzaj ttzaq'we'n Dios, ¿alkyetzun jaku q'mante qa mya b'a'n in tb'incha'n, qa minti' ma tzaj tq'o'n twi' ti'j kyyol xjal? Tok twitz kyi'j qe tnam ex kyi'j qe xjal,

30tu'ntzun mi'n tkawin tuj tnam jun xjal mya b'a'n ex sb'ul.

31¿Baqa o txi tma'na te Dios: Ma chin tzpete ti'j ex mi'n chin b'inchane il juntl maj,

32yek'untza weye alkye qe npaltile minti' nne'l nnik'e ti'j, qa at mya b'a'n o b'ant wu'ne, mlay nb'inchaye juntl maj? Chiwta.

33¿Maj tajb'ila tu'n ttzaj tq'o'n Dios chojb'il teya ik tza'n tajb'ila ex maske otoq tz'el tik'una Dios? Axa kb'el ximante ex mya a qine, q'mantza aju b'a'n tu'na.

34Qe xjal sek' kynab'l, aqeju in che b'in ti'j nyole, kyuk'ix qe xjal at kynab'l, ok kyma' weye kyja':

35In yolin Job ti'j aju minti' nne'l tnik' tij; minti' kytxolil qe tyol.

36B'a'n tu'n tok Job tuj malb'il, porke qe tzaq'web'l in tzaj tma'n, mer ik tza'n ttzaq'web'l jun xjal mya b'a'n.

37Mya noq o'kx ma b'inchan Job il, ax ikx mib'an b'in; qwitzx nno'k ten xmayil ti'j Dios ex kukx tyolin ti'j Dios.