Éxodo 25 - Mam Huehuetenango New Ortography

Qe oyaj ti'j tja Dios Éxodo 35.4-9

1Tzaj tma'n Qman te Moisés kyja':

2—Q'manxa kye aj Israel tu'n tjaw kychmo'n oyaj te weye. Kjawil kychmo'ne kyxol kykyaqil qeju kyaj tu'n ttzaj kyq'o'n tu'n kyex kygan ex tu'n tkyaqil kyanmi.

3Aqeju oyaj kjawil kychmo'ne, atzun qe jlu: Q'an pwaq, saq pwaq, q'an k'uxb'il,

4xb'alun ẍq'ilun ke'yin, xb'alun ẍjulin ke'yin, xb'alun kyaq ke'yin, tb'anil xb'alun lino, ttzmal chip,

5ttz'umal ẍne'l tok tk'a' kyaq ke'yin, tz'u'm tb'anilxix, tze' ch'i'x acacia,

6aseyt tu'n tajb'en kyuj kandil, t-samel at tk'ok'jal tu'n tku'x q'ot tuj aseyt aju in ajb'en ok tok toklen jun xjal, ex tu'n tajb'en te tk'ok'jal storak,

7qe tal ab'j ónice ex txqantl tal ab'j tb'anil, tu'n tok q'ot ti'j kapiẍay nno'k tq'o'n tnejel pal, ex ti'j tal xb'alun nno'k ten ttzi t-xu'k.

8Q'manxa kye tu'n kyb'inchante jun ja xb'alun te weye, tu'n nnajane kyxol.

9Kjawil kyb'incha'ne aju ja lu ex kykyaqil qe makb'il che tel tuj, ik tza'nxix kxel nyek'une teya.

Aju kax k'ub'l tley Dios Éxodo 37.1-9

10B'inchama jun kax ti'j tze' ch'i'x acacia, te jun var tuk'il jun xk'achub' tnuqb'il, ox xk'achub' twitz, ex ox xk'achub' twa'l.

11Lo'tzin oka q'an pwaq tb'anilxix tujile ex ti'jele, ex b'inchan jawa jun adorn q'an pwaq ttx'otx'il ttzi'yile.

12Ax ikx b'inchama kyaje argoy q'an pwaq kytx'otx'il, ex q'on oka qe kyi'j kykyajil tqan kax, kab'e jun pak' ex kab'etl juntl pak'.

13Ax ikx b'inchama kab'e tze' tolin kyi'j, ti'j tze' ch'i'x acacia, ex lo'tzin oka q'an pwaq kyi'j.

14Q'on extzuna qe tze' lu kyuj qe argoy ate'k ttxlaj kax, tu'n kyajb'en tu'n t-xi tanut kax.

15Ax che kyjel ten qe tze' kyuj qe argoy kyok ti'j kax, mi'n che etz q'it.

16Tujtzun kax lu kb'elex tq'o'na aju ley kxel nq'o'ne teya.

17B'inchama jun tmaqsil kax q'an pwaq tb'anilxix ttx'otx'il, jatum tu'n tnajset kyil xjal, te jun var tuk'il jun xk'achub' tnuqb'il ex ox xk'achub' twitz.

18Ax ikx b'inchama kab'e tilb'ilal querubín q'an pwaq kytx'otx'il tx'ino'n tu'n martiy, ex che b'el tq'o'na kyib'aj kykab'il pak' ttxa'n tmaqsil kax.

19Jun kb'el ten tib'aj jun pak' ttxa'n tmaqsil kax ex jun tib'aj juntl pak'. Junx piẍ k'elel tmaqsil kyuk'il qe kab'e tilb'ilal querubín.

20Che jawil kylik'un kyxik' tu'n ttxayit tmaqsil kax. Ktel twitz jun tumlal twitz juntl, ex kyja' kb'el kyke'yin tib'aj tmaqsil.

21Kb'elex tq'o'na tuj kax aju ley kxel nq'o'ne teya, ex kb'el tq'o'na tmaqsil kax.

22Atzun k'okel nk'ulb'an wib'e tuk'ila tib'aj tmaqsil kax ex kyxol qe kab'e tilb'ilal querubín, aqeju kykub'sa'n tib'aj kax k'ub'l nleye. Atzun kxel nma'ne teya tkyaqil aju waje tu'n t-xi tma'na kye aj Israel.

Aju mes tu'n kykub' ten pan tib'aj Éxodo 37.10-16

23B'inchama jun mes ti'j tze' ch'i'x acacia, jun var tnuqb'il, kab'e xk'achub' twitz, ex ox xk'achub' twa'l.

24Lo'tzin oka q'an pwaq tb'anilxix ti'jele, ex b'inchan jawa jun adorn q'an pwaq ttx'otx'il ttxa'nile mes.

25Ax ikx b'inchama jun tmaqel ttxa'nile tjaq' mes, kyaje q'ab' twa'l, ex lo'tzin oka jun adorn q'an pwaq ttx'otx'il ti'jele.

26B'inchama kyaje argoy q'an pwaq kytx'otx'il, ex q'on oka qe kyi'j kykyajil pak' ttxa'n mes, kyumlal qe tqan.

27Che okel ten qe argoy lu tjaq' tmaqel mes tu'n kyokx qe tze' tolin kyi'j tu'n kyajb'en tu'n t-xi tanut mes.

28B'inchama qe kab'e tze' lu ti'j tze' ch'i'x acacia, ex lo'tzin oka q'an pwaq kyi'j, ex kyi'jtzun kxel tanut mes.

29Ax ikx b'inchama ti'j q'an pwaq tb'anilxix, qe laq, qe pak', qe xar ex qe vas ma tij, tu'n kyajb'en te qob'l oyaj ti'j ta'l twitz uva.

30Kukx che b'el kyq'o'ne tib'aj mes lu qe pan in che kub' q'o'n nwitze.

Aju kykub'il kandil q'an pwaq Éxodo 37.17-24

31Ax ikx b'inchama jun kykub'il kandil q'an pwaq ttx'otx'il tx'ino'n tu'n martiy. Te junx k'elel aju tq'uqb'il, tqan, qe tcopa, qe tilb'ilal xwakin kyten, ex qe tilb'ilal b'ech.

32Che elel qaq tq'ab' ti'j tk'u'j; ox tuj jun pak' ex ox tuj juntl pak'.

33Ti'j teyle junjun tq'ab' k'elel ti'j tk'u'j, che tel ox tilb'ilal b'ech tjaq'xi, ik ktel b'inchb'en kye ik tza'n t-xmakal tze' almendro; ax ikx ktel ox tilb'ilal xwakin kyten tuk'ix kycopa. Iklex ktelb'a kyi'j qe qaq tq'ab'.

34Ti'j ju tqan tuj tmij kykub'il kandil, che tel kyaje tilb'ilal b'ech tjaq'xi, ik ktel b'inchb'en kye ik tza'n tilb'ilal t-xmakal tze' almendro; ax ikx ktel kyaje tilb'ilal xwakin kyten tuk'ix kycopa.

35Ti'j teyle junjun moj tq'ab' k'elel ti'j tk'u'j, kyjel q'ot jun tilb'ilal b'ech tjaq'xi.

36Qe tilb'ilal b'ech ex qe tq'ab' che elel ti'j junx piẍ q'an pwaq tb'anilxix ex tx'ino'n tu'n martiy.

37Ax ikx b'inchama wuq kandil, aqeju che okel kytxaqo'ne tu'n kyq'onte spik'un tetz twitzx,

38ex qe matzb'il kywi mech kyuk'ix qe tal tkub'il ttza'jil mech, ax ikx q'an pwaq kytx'otx'il.

39K'ajb'el 75 libr q'an pwaq tb'anilxix kyu'ne tu'n tb'ant aju kykub'il kandil ex kykyaqil qe makb'il che ajb'el tuk'il.

40Kyb'inchame jlu ik tza'nx tilb'ilal xi nyek'une teya twi witz.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help