1 Juan 5 - Mam Huehuetenango New Ortography

Tu'n qokslab'l in kub' ti'j mya b'a'n at twitz tx'otx'

1Kykyaqil qeju in xi kyoksla'n qa ate Jesús ju Crist aju at toklen tu'n Dios, atzun qe tk'wa'l Diosju; ex kykyaqil qeju k'ujla'n Mamb'aj kyu'n, ax ikx k'ujla'n qe tk'wa'l Mamb'aj kyu'n.

2Qa k'ujla'n Dios qu'n ex qa ma che japun qe tmandamyent qu'n, tu'ntzunju nne'l qnik' ti'j qa k'ujla'n qe tk'wa'l Dios qu'n.

3Qa k'ujla'n Dios qu'n, che japunel qe tmandamyent qu'n; ex qe tmandamyent mya kyuw qe.

4Porke kykyaqil qeju ma che ok te tk'wa'l Dios, in kub' ti'j ju mya b'a'n kyu'n, aju at twitz tx'otx'. Kyja'tzun tten noq tu'nju qokslab'l in kub' ti'j mya b'a'n qu'n, aju at twitz tx'otx'.

5¿Alkyetzunju in kub' ti'j mya b'a'n tu'n, aju at twitz tx'otx'? ¿Myapetzun aju in xi toksla'n qa ate Jesús Tk'wa'l Dios? Atzunju.

Qeju testiw in che yolin ax tok ti'j Tk'wa'l Dios

6Ate Jesucrist ul, o b'yan tuj a' ex el tchk'el twitz crus; mya noq o'kx o b'yan tuj a', ax ikx el tchk'el. Axju Xewb'aj Xjan testiw ti'j jlu, porke aju Xewb'aj Xjan ax tok tyol.

7At ox testiw, ex atzun qe jlu: Aju Xewb'aj Xjan, tuk'ix ju a', ex ju tchk'el Jesucrist; ex aqeju ox lu ax yol in kyma'n.

9Qa ma txi qoksla'n aju kyyol xjal, yajtzun tyol Dios, ¿myapetzun mas ma' toklen tu'n t-xi qoksla'n? Ex atzun tyol Dios jlu tzaj tchik'b'a'n ti'j Tk'wa'l.

10Alkye ma tz'okslan ti'j Tk'wa'l Dios, in tna'n tuj tanmi qa ax tok tyol Dios. Alkye minti' ma txi toksla'n tyol Dios, nno'k Dios nik'al yol tu'n, porke minti' ma txi toksla'n tyol Dios aju tzaj tchik'b'a'n ti'j Tk'wa'l.

11Atzunju yol lu tzaj tchik'b'a'n Dios qe: Ma tzaj tq'o'n Dios qchwinqlal te jumajx, ex aju chwinqlal lu tu'nju Tk'wa'l in tzaj tq'o'n.

12Alkye at Tk'wa'l Dios tuk'il, at tchwinqlal; ex alkye minti' Tk'wa'l Dios tuk'il, minti' tchwinqlal.

In tq'o'n Juan juntl maj kynab'l okslal

13Tkyaqil jlu ma txi ntz'ib'ane kyeye, aqeye ma che okslane ti'j Tk'wa'l Dios, tu'ntzun tqe'xix kyk'u'je ti'j qa at kychwinqlale te jumajx.

14Qa at jun ma txi qqanin te Dios ik tza'nx ju tajb'il, in qo tzaj tb'i'n, kyja'tzun tten in qe'xix qk'u'j ti'j.

15B'a'n qu'n in tzaj tb'i'n Dios alkyeju ma txi qqanin te; kyja'tzun ax ikx b'a'n qu'n in qk'mo'n aju ma txi qqanin te.

16Qa at jun okslal ma til in b'inchan terman il, mya jun il in tzaj kamik tu'n, b'a'n tu'n tkub'san twitz Dios ti'j terman, ex ktzajel tq'o'n Dios tchwinqlal terman; in xi nma'ne jlu kyi'j qeju in che b'inchan il, qa mya jun il in tzaj kamik tu'n. At il in tzaj kamik tu'n. Minti' in xi nma'ne tu'n qkub'san twitz Dios ti'j jlu.

17Tkyaqilju mya b'a'n in qb'incha'n, atzun ilju; ex at il minti' in tzaj kamik tu'n.

18B'a'n qu'n, aqeju ma che ok te tk'wa'l Dios mya kukx in che b'inchan il; ex kwentin qe tu'n Tk'wa'l Dios, ex minti' in che tzyet tu'n tajaw il.

19B'a'n qu'n, te Dios qo', ex kykyaqil xjal twitz tx'otx' ate' tjaq' tipumal tajaw il.

20Ex b'a'n qu'n, o tzul aj Tk'wa'l Dios ex ma tzaj tq'o'n qnab'l tu'n qojtzqinte alkyeju Dios axix tok. Ax ato' tuk'il ju Dios axix tok, ex tuk'il Jesucrist aju Tk'wa'l. Atzunte Diosju axix tok ex q'olte qchwinqlal te jumajx.

21Aqeye tal nk'wa'le, ten kykwente kyi'je tu'n mi'n kyk'ulune kywitz qe tilb'ilal. Ikxwitju.