Isaías 42 - Mam Huehuetenango New Ortography

Aju tmajen Qman Dios

1Lu we nmajen lu, ex tzyu'n wu'ne tu'n tten tipumal, ma jaw nsk'o'ne ex in chin tzalaje ti'j. Ma noj tuj tanmi tu'n Nxewe tu'n t-xi tq'o'n aju nleye tz'aqlxix kye kykyaqil nasyon.

2Mlay jaw sch'in ex mlay jaw tq'ajq'ajel twi', mlay b'injtz tq'ajq'ajel twi' tuj cay.

3Mlay kub' ttoqin jumajx jun ajlaj potz'jni ex mlay kub' tyuptz'a'n aju mech noq in qusin. Axix tok il ti'j kkawil tuj tumelxix.

4Mlay sikt ex mlay tzaj b'aj tk'u'j okxi tb'inchet ju tz'aqlxix twitz tx'otx'. Qe tnam ttzi'yile mar che ayol ti'j tu'n kyb'inte ju t-xnaq'tzb'il, chi Qman.

5Ate Qman Dios kub' b'inchante kya'j ex xi tlik'u'n, a kub' b'inchante twitz tx'otx' ex tuk'ix ju in tzaj ch'iy twitz, a in q'onte kyanq'ib'l ex kyxew qe xjal najl twitz tx'otx', ex atzun jlu in tma'n Qman te tmajen:

6Aqine Dios in tzaj txkonte teya tu'nju tz'aqlxix qine, ex tzyu'n tq'ab'a wu'ne ex aqine kwentil teya; aya k'okel te nxele tu'n tkyuwset aju nyole kyjel b'ant ti'j wu'ne kyuk'il qe aj Israel, ex tu'n toka spik'un kye nasyon.

7Kjaqetel kywitz qe moẍ tu'na ex k'eletz ti'na qe xjal tuj pres ex tuj calabós jatum najlqe tuj qlolj.

8Aqine Jehová porke atzun nb'iye, ex mlay waq'e amb'il tu'n tjaw nimsa'n tb'i juntl ex tu'n kyok ten k'ulul kywitz qe tilb'ilal te nxele.

9Lu ma japun tkyaqil tqanil xi nq'o'ne ojtxi ex atzun ja'lo kxel nq'o'ne txqantl tqanil ak'aj; in xi nma'ne jlu tu'ntzun tel kynik'e ti'j na'nxtoq tb'ant, chi Dios.

B'itz te aq'b'il chjonte ti'j kolb'il tu'n Dios

10Kyb'itzanxe jun b'itz ak'aj te Qman; kynimsa'n jawe tb'i max ttxa'npun tx'otx'; ikx kyeye, aqeye in che b'ete tib'aj mar ex kyuk'ix qe txkup najl tuj, ax ikx qe tnam kykub'sa'n ttzi'yile mar kyuk'ix qe xjal najl kyuj.

11Che tzalajx qe lugar tzqij tx'otx' kyuk'ix qe tnam ate' tuj, ax ikx qe lugar jatum kykub'sa'n qe tiyjil Cedar. Che b'itzan tu'n tzalajb'il qe xjal najl tuj tnam Sela, e tjaw tq'ajq'ajel kywi' max kywi' qe witz.

12Kynimsa'n jaw tb'i Qman ex kyq'onx chjonte te max kyuj qe tnam kykub'sa'n ttzi'yile mar.

13Kxel Qman q'ojlel ik tza'n jun q'ojlel nim tipun, ex kq'ojlel tuk'il nim tq'oj ik tza'n jun xjal kyuw tk'u'j tuj q'oj; kjawil tq'ajq'ajel twi', kjawil sch'in tu'n ttzyet q'oj ex kb'el kyi'j qe aj q'oj tu'n.

14Chi Qman kyja': Ma tz'el q'ij minti' ma chin q'ajte ex minti' jun yol o txi nma'ne, atzun ja'lo chin jawil sch'ine ik tza'n jun xu'j ok nnu'l itz'j tal, in ayayan ex in xjiq'b'an tk'u'j tu'n.

15Che b'ajel naj qe nmaq witz wu'ne, ex qe tal witz kb'ajel tzqij tkyaqil k'ul at twitz wu'ne, che okel qe nima wu'ne te jun tzqij tx'otx', ex che b'ajel tzqij qe najab'.

16Che xel wi'ne qe moẍ tuj b'e minti' ojtzqi'n kyu'n, che xel nẍaqlu'ne tuj ju b'e na'nx kylonte. Kch'expetel qlolj wu'ne tu'n tok te spik'un kywitz, ex aju tx'otx' nim tqan xaq tuj k'okel te chq'ajlaj. Kb'antel jlu wu'ne ex mlay tzik'x ti'j.

17Aqeju nno'k qe' kyk'u'j kyi'j tilb'ilal ex in kyma'n kye tilb'ilal kyja': Aqeye qdiose che chi, che elel oq ex ktzajel kych'ixwi, chi Dios.

E ok qe aj Israel ik tza'n moẍ

18Aqeye chkyin kywi', kyb'intze; aqeye moẍ, kyke'yintze tu'ntzun tkyile.

19Moẍxix twitz nmajene kywitz kykyaqil xjal, ex chkyinxix twi' nsanjele kywitz kykyaqil. Moẍxix twitz aju sk'o'maj wu'ne kywitz kykyaqil, ex moẍxix twitz nmajene kywitz kykyaqil.

20Nno'k tke'yin nim ti'xti, ex minti' nno'k tq'o'n tkwent ti'j; b'a'n b'in, ex minti' ch'in in tzaj tq'o'n twi' ti'j.

21O tzalaj Qman ti'j tu'n tok t-xnaq'tzb'il te ma'xix toklen ex tb'anilxix, tu'nju tz'aqlxix te.

22Ex ma txi elq'a'n tkyaqilju at kye xjal lu, kykyaqil ma che ku'x lamo'n tuj jul ex ma che okx lamo'n tuj tze'; ma che'x q'i'n kyu'n xjal ex mi a'l jun b'a'n ttzoqpinte kye, ma che'x elq'a'n ex mi a'l jun tu'n tkolpinte kye.

23¿Ex alkye jun kyeye jaku txi nimante jlu? ¿Alkye b'anin tten tu'n t-xi tb'i'n aju kb'ajel te tib'ajxi?

24¿Alkye o q'onte amb'il kye aj Israel aqeju tiyjil Jacob, tu'n tkub' kyi'j ex tu'n kyxi elq'a'n? ¿Myapetzun ax tok a Qman o q'onte amb'il? E b'inchan il twitz Qman, minti' kub' tuj kywitz tu'n kyb'et tuj b'e xi yek'un kye ex minti' xi kyb'i'n aju t-xnaq'tzb'il.

25Kyja'tzun o tzaj tq'oj Qman kyi'j ex kub' tq'o'n kycastiw tu'n jun q'oj nimxix wen, ex e okx q'o'n mer ik tza'n tuj jun q'aq' in k'ant wen, ex mi tu'n jlu minti' el kynik' ti'j. Maske nim o che k'ixb'isanjtz tu'n q'aq', pero minti' okx tuj kywi'.