Isaías 29 - Mam Huehuetenango New Ortography

Qe aj q'oj ti'j tnam Ariel

1Ay b'ek'b'il twitz tnam Ariel, aju tnam jatum najan David tuj. E kyik'san ninq'ij juntl kab' ox ab'q'i ik tza'nx in kyb'incha'n,

2pero ktzajel nim k'ixb'isab'l ti'j tnam Ariel wu'ne ex tuj tnam lu k'okel oq'el ex che ayil xjal. K'okel tnam te weye ik tza'n jun altar jatum in che kub' patit qe oyaj.

3Che xel nsama'ne qe nsoldadiye tu'n tb'aj kytxolb'an kyib' ti'jele tnam, k'okel nq'o'ne jun pe'n ti'jele ex che jawil nb'incha'ne qe ja te kykolb'il kyib' qe soldad, tu'ntzun kyok tzoqpaj ti'j.

4Che b'el numj xjal ok kykyaj pale' twitz tx'otx'; aju tq'ajq'ajel kywi' k'okel ik tza'n tb'inx tq'ajq'ajel jun lab' ex ik tza'n tq'ajq'ajel twi' jun xjal in jasun.

5Qe aj q'oj ti'j tnam Jerusalén nimxix kyb'aj che okel ik tza'n quq, qe aj q'oj ti'j nimxix kyb'aj aqeju in che b'aj yajlante kye xjal, che xel iqan ik tza'n in xi iqan tmu'pil triw tu'n kyq'iq' minab'en, te jurat naj.

6Kb'el kycastiw aj q'oj tu'n Qman aju Tajaw Tkyaqil, tu'n tq'ajq'ajel twi' q'ankyoq, tu'n kyaqnajnab', tu'n nintz tq'ajq'ajel, tu'n xkyaqinpaẍ kyuwxix wen, tu'n kyq'iq' jb'al ex tu'n q'aq' in b'aj tz'e'y tkyaqil tu'n.

7Kykyaqil tnam lu mib'an kyajlanjtz, aqeju in che q'ojin ti'j Ariel, kykyaqil qeju in che q'ojin ti'j ex ma che ok tzoqpaj kyi'j qe ja ma' kywa'l te kykolb'il kyib', ax ikx qeju in che yajlan kyi'j che okel ik tza'n jun witzik', ex qa ik tza'n jun in tzaj yek'un te xjal te qonik'an tuj twitzik'.

8Che okel ik tza'n jun xjal nne'l tk'u'j ex ma tz'ok twitzik' ex tuj twitz qa in wa'n, ex ok tul tnab'l ttenx tk'u'j nne'l; ex qa ik tza'n jun xjal in txqet ti'j tk'u'j ex ma tz'ok twitzik' ex tuj twitz qa in k'an, ex ok tul tnab'l ttenx in txqet ti'j tk'u'j ex puro tzqij tuj tqul. Kyja'tzun kb'ajel kyi'j kykyaqil tnam mib'an kyajlanjtz, aqeju in che q'ojin ti'j tnam tkub' twi witz Sión.

E ok aj Israel ik tza'n moẍ ex xmletz' qe

9Kukx che tene mib'an tz'okx jun yol tuj kywi'ye. Kukx che tene moẍ qeye, minti' ch'in tu'n tkyile. Kukx che txakpaje'ye ik tza'n qe k'al q'e'n, maske minti' otoq txi' q'e'n kyu'ne.

10Porke tu'n Qman ma tzaj t-sama'n jun watl ma'xix kyib'aje. Ma tz'ok tmaqsi'n kywitz qe t-sanjel ate' kyxole ex ma tz'ok tq'o'n jun xb'alun te maqsib'l kywitz qeju in kyma'n tqanil alkye tzul te yajxi.

11Tkyaqilju in tzaj tyek'un Qman mer ik tza'n tuj witzik' ma tz'ok te kyeye ik tza'n qe yol tz'ib'amaj tuj jun libro seyarimaj. Qa at jun ma txi q'onte aju libro lu te jun xjal b'a'n sch'in u'j, ex qa ma txi tma'n te kyja': Sch'i'n jawa jlu, qa chi; atzunte xjal ktzajel ttzaq'we'n: Mlay jaw nsch'i'ne tu'nju tok sey ti'j.

12Ex qa ma txi tq'o'n te jun xjal mib'an sch'in u'j, kxel tma'n te kyja': Sch'in jawa jlu, qa chi; atzunte xjal ktzajel ttzaq'we'n: Miban chin sch'ine u'j.

13Atzun jlu tzaj tma'n Qman weye: Qe xjal lu noq tu'n kyyol in che ajb'en weye ex noq tu'n kytzi' in chin nimanjtze kyu'n, ex aju kyanmi najchaq ta' wi'je ex aju k'ulb'il in tzaj kyq'o'n weye, kymandamyent xjal qe jlu ex kyu'nx in b'aj kyximan.

14Kyja'tzun, kjawil naj juntl maj kynab'l qe xjal lu wu'ne kyu'n qe b'inchb'en nimxix kyipumal ex qe señ. Qe xjal at kynab'l ex qe xjal sek' kynab'l che okel te minti' kynab'l.

15Ay b'ek'b'il kywitz qe xjal in xi kyewan kyib' twitz Qman tu'n tkub' kyewan aju kyximb'etz, qe xjal in kyb'incha'n mya b'a'n tuj qlolj in kyma'n: Mi jun in ke'yin qi'j. Mi jun ma til alkye in b'ant qu'n.

16Nim in che tzpete ti'j. ¿Baqa junx ta' ju xoq'l ttx'otx'il k'il tuk'il ju b'inchalte te? Jun ti'xti mlay txi tma'n teju b'inchante te kyja': Mya tu'na ma chin kub' tb'incha'na, ex jun k'il xoq'l ttx'otx'il mlay txi tma'n teju b'inchalte te kyja': Minti' nne'l tnik'a ti'j ju in b'ant tu'na.

Tzaj ttziyan Dios tu'n kyklet aj Israel

17Ch'ix tul kanun tq'ijlalil, aju nmaq chk'ul k'okel te kojb'il ex aju kojb'il k'okel te nmaq chk'ul.

18Tuj tq'ijlalil lu, qe xjal chkyin kb'antel kyb'in ti'j ju yol in tma'n tuj libro, ex qe moẍ kb'antel kyke'yin, mlayx che tentl tuj qlolj ex tuj qxopin.

19Qe xjal mans che tzalajel juntl maj ti'j Qman, qe xjal meb'axix, che tzalajel ti'j ju Dios Xjan kye aj Israel.

20Che b'el b'aj qe xjal jawni kywitz ex che najel qe xjal b'a'n che xmayin, ex b'i'x che najel qeju o'kx in che ximan ti'j tu'n kyb'inchante mya b'a'n.

21Qe xjal in xi kysi'min yol ti'j juntl xjal in kyma'n qa at til, ex in b'ant k'ob'il kyu'n ti'j jun jwes tu'n tkub' tz'aq tuj jun til, ex in che nik'an yol ti'j xjal minti' til tu'n mi'n t-xi b'incha'n ti'j.

22Kyja'tzun in tma'n Qman kyja', aju Kydios aj Israel, aju kolpinte te Abraham: Mlay tzaj kych'ixwi qe tiyjil Jacob, ex mlay tz'ok spelin kywitz,

23ex ok kylonte qe kyk'wa'l aju otoq b'ant wu'ne tuj kytanmi, k'elel kynik' ti'j qa Xjan qine ex ktel nchiylale kye, aqine Dios Xjan kye aj Israel.

24Aqeju otoq tzpet kynab'l, k'okel kynab'l, ex aqeju otoq tzaj kyyol wi'je, kxel kyniman qe nxnaq'tzb'ile.