Ezequiel 20 - Mam Huehuetenango New Ortography

Maske kyk'i' aj Israel che b'in, pero minti' e kyaj kolin tu'n Dios

1Tuj tlajin q'ij te tjwe'yin xjaw te twuqin ab'q'i, e ul junjun kytijil aj Israel qanil jun kyxjel te Qman, ex e kub' qe' nwitze.

2Tzaj yolin Qman wuk'ile ex tma kyja':

3Aya xjal, yolina kyuk'il qe kytijil xjal aj Israel ex q'manxa kye kyja': Atzun jlu in tma'n Qman: ¿Mape che tzaje qanil kyxjele weye? Aqine Dios in nma'ne jun yol axix tok, mlayx txi ntzaq'we'ne kyxjele.

4Aya xjal, kawinxa qe ex q'manxa ju kyil ex q'manxa kye aju mya b'a'n ik'unxix wu'ne o kyb'incha qtzan kyman.

5Q'manxa kye kyja': Atzun jlu in tma'n Qman: Tej kyjaw nsk'o'ne qe aj Israel, aqeju ax tiyjil Jacob, xi nma'ne jun yol axix tok kye ex xi nyek'un wib'e kye tuj tx'otx' Egipto. Xi nma'ne jun yol axix tok kyja': Aqine Kymane ex Kydiose.

6Tuj q'ij tej nyoline kyuk'il xi ntziyane kye tu'n kyetz wi'ne tuj Egipto ex tu'n kyxi wi'ne tuj jun tx'otx' otoq tzaj njyo'ne te kye, aju tx'otx' lu q'inun tx'otx' ex tb'anilxix, aju tx'otx' lu mas tb'anilxix kywitz kykyaqil txqantl tx'otx'.

7Xitzun nma'ne kye kykyaqil: Kykolin kyaje tu'n kyk'ulune kywitz qe tilb'ilal ik'b'ilxix qe ex mi'n b'aj kytz'ilsan kyib'e kyu'n qe tilb'ilal ate' tuj Egipto, porke aqine Kymane ex Kydiose.

8Atzun kye jaw kyi'n kyib' wi'je, ex minti' kyajb'e tu'n t-xi kyb'i'n nyole; ex minti' kyaj kykolin qe tilb'ilal nno'k kydiosin, aqeju ik'b'ilxix, ex minti' kyaj kykolin qe tilb'ilal ate' tuj Egipto. Kub' nximane tu'n ttzaj nq'oje kyi'j, ex tu'n tkub' kycastiw wu'ne tuj Egipto okxi tjatz b'aj nq'oje.

9Ex minti' o nb'inchaye ikju tu'ntzun mi tyolinjtz mya b'a'n wi'je kyu'n qe nasyon jatum najlqe'toq, porke kywitz qe nasyon lu o txi nyek'un wib'e kye ex o txi ntziyane kye tu'n kyetz wi'ne tuj Egipto.

10E je'tz wi'ne tuj Egipto ex e je'x wi'ne tuj tzqij tx'otx'.

11Atzun xi nq'o'ne qe nleye kye kyuk'ix qe nmandamyente; in kyq'o'n jlu kychwinqlal xjal qa ma che japun kyu'n.

12Ax ikx xi nma'ne kye tu'n kyojlan tuj q'ij te ojlab'l, a jlu tu'n tajb'en te jun techal ti'j ju yol otoq kyaj b'ant ti'j wu'ne kyuk'il, tu'ntzun ttzaj kyna'n aqine Dios o chin el pa'nte kye tu'n kyok te weye.

13Jawtzun kyi'n kyib' wi'je tuj tzqij tx'otx', ex minti' xi kyniman qe nleye; el kyik'un qe nmandamyente, aqeju otoq txi nq'o'ne kye tu'n tten kychwinqlal qa ma che japun kyu'n, ex ok kyq'o'n te minti' tajb'en aju q'ij te ojlab'l. Kub'tzun nximane tu'n tjatz b'aj nq'oje kyi'j ex tu'n kynaj wu'ne te jumajx tuj tzqij tx'otx'.

14Ex minti' nb'inchaye ikju tu'ntzun mi'n tyolinjtz mya b'a'n wi'je kyu'n qe nasyon, aqeju otoq kyil tza'n tten otoq che etz wi'ne qe aj Israel tuj Egipto.

15Ax ikx xi nma'ne kye jun yol axix tok tuj tzqij tx'otx', tu'n mi'n kyokx tuj tx'otx' otoq txi ntziyane kye, aju tx'otx' lu q'inun tx'otx' ex tb'anilxix, ex mas tb'anil kywitz txqantl tx'otx',

16xi nma'ne kye ikju tu'nju el kyik'un qe nmandamyente, minti' xi kyniman qe nleye ex ok kyq'o'n te minti' tajb'en aju q'ij te ojlab'l, ex o'kx ok ten kyk'u'j kyi'j qe tilb'ilal nno'k kydiosin.

17Maske ikju, pero tzaj q'aq'an nk'u'je kyi'j ex minti' e naj wu'ne tuj tzqij tx'otx'.

18Tuj tzqij tx'otx' xi nma'ne kye kyk'wa'l tu'n mi'n tel kykano'n ti'j ju in kyb'incha'n kyman ex tu'n mi'n t-xi kyniman aju ktzajel kyma'n kyman, ex tu'n mi'n tb'aj kytz'ilsan kyib' kyu'n qe tilb'ilal nno'k kydiosin kyman.

19Xi nma'ne kye kyja': Aqine Kymane aju Kydiose. Japunx qe nleye ex qe nmandamyente kyu'ne,

20kynimanxe qe q'ij te ojlab'l tu'n tajb'en te jun techal ti'j yol kyaj b'ant ti'j wu'ne kyuk'ile; kyja'tzun k'elel kynik'e ti'j, aqine Kymane aju Kydiose.

21Ax ikx qe kyk'wa'l jaw kyi'n kyib' wi'je. Minti' xi kyniman qe nleye ex minti' e japun qe nmandamyente kyu'n, aju in tq'o'n kychwinqlal qa ma japun kyu'n, ex ok kyq'o'n te minti' kyajb'en qe q'ij te ojlab'l. Kub'tzun nximane tu'n ttzaj nq'oje kyi'j ex tu'n kynaj te jumajx wu'ne tuj tzqij tx'otx' tu'ntzun tjatz b'aj nq'oje.

22Ex minti' o nb'inchaye ikju tu'ntzun mi'n tyolinjtz mya b'a'n wi'je kyu'n qe nasyon aqeju otoq kyil tej kyetz wi'ne tuj Egipto.

23Tuj tzqij tx'otx' xi nma'ne jun yol axix tok kye: Ok che b'ajel nsputune tuj tkyaqil nasyon twitz tx'otx',

24tu'nju minti' e japun qe nmandamyente kyu'n, el kyik'un qe nleye, ok kyq'o'n te minti' tajb'en qe q'ij te ojlab'l ex o'kx e k'ulun kywitz qe tilb'ilal aqeju in che k'ulun kyman kywitz.

25Kyja'tzun e je'x nq'o'ne qe ley mya b'a'n kye ex qe mandamyent minti' kyanq'ib'l kyu'n.

26Xi nq'o'ne amb'il kye tu'n tb'aj kytz'ilsan kyib', tej t-xi kyi'n kyoyaj kywitz qe tilb'ilal ex kub' kypatun tnejel kyky'ajal te chojb'il. O nb'inchaye jlu tu'n ttzaj tchi kyi'j ex tu'n tel kynik' ti'j, aqine Dios.

27Atzun teya xjal, q'manxa kye aj Israel: Atzun jlu in tma'n Qman: Ax ikx ti'j jlu qe qtzan kymane o tz'el kypa'n kyib' wi'je ex minti' o japun nyole kyu'n.

28Tej kypon wi'ne tuj tx'otx' otoq txi ntziyane kye, noq ok tkyil jun tal witz ex qa jun tze' nim t-xaq, atzun xi kyq'o'n chojb'il tuk'ix kyoyaj aju nimxix in tzaj nq'oje tu'n, ax ikx atzun kub' kyqo'n perjum at tk'ok'jal ex kub' kyq'o'n kyoyaj ta'l twitz uva.

29Xitzun nqanine kye: ¿Ti t-xilen ju tal witz jatum in che'x aje k'ulul? Ex ok q'o'n tb'i lugar lu, Lugar jatum in che k'ulun qe xjal mya okslal, ex ax tb'i tok ja'lo.

30Q'manxa kye aj Israel kyja': Atzun jlu in tma'n Qman: ¿Tiqu'n ma b'aj kytz'ilsan kyib'e ik tza'n o kyb'incha qtzan kyxe'chele? ¿Tiqu'n minti' ma chinx kynimane ex ma che ok tene k'ulul kywitz qe tilb'ilal ik'unxix wu'ne?

31Ok in xi kyq'o'ne kyoyaje ex ok nno'kx kypatune kyk'wa'le tuj q'aq' te chojb'il, tu'n jlu kukx tb'aj kytz'ilsan kyib'e kyu'n qe tilb'ilal. ¿Jakupe txi ntzaq'we'ne kyxjele tu'nju kytene ikju, aqeye aj Israel? Aqine Dios in xi nma'ne jun yol axix tok, mlay txi ntzaq'we'ne kyxjele.

32Mlay japun kyximb'etze tu'n kyoke ik tza'n qe txqantl nasyon twitz tx'otx', aqeju in che k'ulun twitz tze' ex twitz ab'j.

33Aqine Dios kxel nma'ne jun yol axix tok: Tuk'il nim wipumale ex tuk'il nim ntx'u'jile chin kawile kyib'aje.

34Che ajetz wi'ne kyxol qe nasyon jatum kysputun kyib'e ex che okel nchmo'ne tuk'il nim wipumale ex tuk'il nim ntx'u'jile.

35Che xel wi'ne tuj tzqij tx'otx' kye tnam, ex atzun kb'el kycastiwoye wu'ne,

36ik tza'n tej tkub' kycastiw qtzan kyxe'chele wu'ne ojtxi tuj tzqij tx'otx' Egipto. Aqine Dios in chin q'mante jlu.

37Cheb'a che b'ajel wajla'ne ik tza'n jun pastor in b'aj tajla'n qe t-ẍne'l, ex kb'antel wu'ne tu'n t-xi kynimane ju yol kyjel b'ant ti'j wu'ne kyuk'ile.

38Che elel npa'ne kyi'je qeju in jaw kyi'n kyib' wi'je, ex qeju o tz'el kypa'n kyib' wi'je che eletz wi'ne tuj kytx'otx' stranjer xjal jatum najlqe ja'lo; atzun kye mlay che okx tuj kytx'otx' aj Israel. K'eleltzun kynik'e ti'j, aqine Dios.

39Aqeye aj Israel, atzun jlu in tma'n Qman: Qa kyk'i'ye tu'n kynimane weye, kyxi'ye k'ulul kywitz qe tilb'ilal aqeju nno'k kydiosine, ex te tib'ajxi che nimale weye, ex mlay tz'ok kyq'o'ntle nb'iye xjan te minti' tajb'en tu'nju oyaj in b'ant kyu'ne, ex tu'nju in che k'ulune kywitz qe tilb'ilal.

40Kykyaqil aj Israel che k'ulul weye twi witz xjansa'maj wu'ne, twi witz ma' twa'l at kyxol aj Israel, aju tkub' tuj tx'otx' etzan wu'ne. Aqine Dios in chin q'mante jlu: Atzun che k'metel wu'ne tuk'il tzalajb'il; atzun kxel nqanine kye tu'n ttzaj kyi'n oyaj weye, ex tu'n ttzaj kyi'n aju tnejel twitz kyawal in jaw ex kykyaqil kyoyaj kb'ajel kyxjansa'n tu'n tok te weye.

41Oktzun kyajtz wi'ne kyxol qe tnam ex kyxol qe nasyon jatum kysputun kyib' ja'lo, ex ok kyok nchmo'ne juntl maj, che k'meteltzun wu'ne ik tza'n jun oyaj at tk'ok'jal, ex kywitz kykyaqil nasyon kxel nyek'un wib'e qa xjan qine.

42Oktzun kypon wi'ne tuj tx'otx' Israel, aju tx'otx' otoq txi ntziyane tu'n t-xi nq'o'ne kye qtzan kyxe'chele, k'eleltzun kynik'e ti'j, aqine Dios.

43Atzun tzul ti'j kyk'u'je tkyaqilju kyb'inchb'ene mya b'a'n aju otoq b'aj kytz'ilsan kyib'e tu'n, ex ktzajel kych'ixwiye kyi'jxe tu'n tlaj nimku mya b'a'n otoq kyb'inchaye.

44Aqeye aj Israel, ok nb'incha'ye xtalb'il kyeye tu'n tjaw nimsa'n nb'iye, ex mlay kub' kycastiwoye wu'ne ik tza'n kyb'inchb'ene mya b'a'n ex plojxix, k'eleltzun kynik'e ti'j, aqine Dios, chi Qman Dios.

Aju castiw ktzajel tib'aj tx'otx' tuj tnayaj q'ij

45Tzaj yolin Qman wuk'ile ex tma kyja':

46Aya xjal, ke'yinxa tumlal tx'otx' tuj tnayaj q'ij, q'manxa tyola ti'j, q'manxa aju yol kxel nma'ne teya ti'j chk'ul at tuj tnayaj q'ij,

47ex q'manxa kyja': Atzun jlu in tma'n Qman: Aqine chin okel qoptz'inte q'aq' ti'ja ex che b'ajel tz'e'y kykyaqil qe tze' cha'x ex tzqij tu'n; kk'antel q'aq' ex mlayx yupj, ex kb'ajel tz'e'y kywitz kykyaqil xjal tu'n, kxel qe' tuj tx'otx' tuj tb'anq'ab' q'ij, max kpol b'aj tuj tx'otx' tuj tnayaj q'ij.

48Ex ok kyila' kykyaqil xjal, aqine Dios otoq chin ok q'onte q'aq' ti'j, ex aju q'aq' lu mlayx yupj.

49Xi ntzaq'we'ne: Ay Nman, qe xjal lu in kyma'n wi'je kyja': Aju yol in tma'n xjal lu, mi jun nne'l tnik' ti'j.