1Tzaj yolin Qman wuk'ile ex tma kyja':
2Aya xjal, q'manxa kye aj Jerusalén aju mya b'a'n o kyb'incha puro ik'b'ilxix.
3Q'manxa jlu kye: Atzun jlu in tma'n Qman: Aqeye aj Jerusalén, aju kyxe'chele ex kyiyjile tzajni jlet tuj tx'otx' Canaán, aj amorreo kymane ex aj Heteo kytxu'ye.
4Tej kyul itz'je minti' el qesin taq'al kymuxe, minti' el tx'jo'n kyi'je, minti' ok su'n ta'l atz'an kyi'je, ex minti' ok k'alo'n kyk'u'je tu'n xb'alun.
5Tej kyul itz'je mi a'l jun tzaj q'aq'an tk'u'j kyi'je, ex minti' e ok kwentine tu'n tok b'incha'n tkyaqil jlu, noq o'kx e kyaj xo'ne tuj kojb'il ex e el ik'une kyu'n xjal.
6In ik' b'ete kytxlaje, ex tej kywile in xtanpaj kyqane tuj kyitz'jlene, xi nma'ne tu'n kyanq'ine.
7E ch'iye wu'ne ik tza'n in ch'iy jun tal tze' tuj kojb'il. E ch'iye ex e oke q'apoj, e oke ik tza'n jun xu'j tb'anilxix ke'yin. Ex e ch'iy qe kyime ax ikx ttzmal kywi'ye. Ex jumajx minti'toq kyxb'alune tok.
8In ik' b'ete juntl maj kytxlaje ex e wile otoq pon kyab'q'iyile tu'n tknet kychmile. Xitzun nlik'pu'ne xb'alun kyib'aje, aju q'i'n wu'ne, ex ok ntxa'yine kyi'je, xitzun ntziyane jun yol axix tok kyeye, b'ant ti'j jun nyole kyuk'ile, ex e oktzune te weye. Aqine Dios in chin q'mante jlu.
9E b'ajtzun ntx'jo'ne, el b'aj chik' kyi'je wu'ne, ex ok nq'o'ne perjum kyi'je;
10oktzun nq'o'ne kyxb'alune tb'anilxix ke'yin tilb'ilal, ex kyxajb'iye tz'u'm; xi' nq'o'ne jun k'alb'il kyk'u'je saq ke'yin ex jun kyxb'alune tb'anilxix chemb'en te;
11ok nq'o'ne kyi'je qe adorn tb'anilxix ex wi'yilxix, ok nq'o'ne tqul q'ab'aj ti'j kyq'ab'e, ex kub' nq'o'ne jun uwj kyqule;
12ok nq'o'ne jun xmulq'ab'aj twi kytxa'ne, ok nq'o'ne tuj kyẍkyine, ex jax nq'o'ne tuj kywi'ye jun coron tb'anilxix ke'yin.
13B'aj noj kyi'je wu'ne tu'n q'an pwaq ex saq pwaq; aju kyxb'alune saq ke'yin wen tb'anilxix chemb'en te, ex mejorxix ke'yin tilb'ilal. E wa'ne ti'j pan tb'anilxix, ex e lo'ne ti'j ta'l kab' ex e chyo'ne ti'j chib'j aseyt nne'l ti'j tze' olivo. E oke tb'anilxix che ke'yine, ex e oke mer ik tza'n t-xu'jil jun rey.
14O b'injtz tqanil tb'anilxix kyi'je kyxol qe nasyon tu'nju tb'anilxix che ke'yine kyu'n qe adorn e ok nq'o'ne kyi'je. Aqine Dios in chin q'mante jlu.
15Ex ok qe' kyk'u'je ti'j ju ke'yb'il kyeye tb'anilxix, ex tu'nju el tqanil kyi'je qa tb'anilxix ke'yb'il kyeye, e oke ik tza'n qe xu'j jawni kywitz kyuk'il xinaq ex xi kyq'on kyib'e tu'n kyyaẍine kyuk'il qe xinaq in che ik' b'et.
16Kyi'j qe kyxb'alune kyb'inchaye qe xb'alun ja kywi' qe tal witz, ex atzun e k'ulune kywitz qe tilb'ilal. A jlu miwt o kyb'inchaye ex mi'nwt kyb'inchaye juntl maj.
17Tzaj kyi'ne qe adorn wi'yilxix q'an pwaq ex saq pwaq, aju otoq txi nq'o'ne kyeye, kub' kyb'incha'ne qe tilb'ilal xinaq tu'ntzun kyk'ulune kywitz;
18ex ok kyq'o'ne kyxb'alune kyi'j aju mejorxix ke'yin tilb'ilal, ex kub' kyq'o'ne kywitz aju aseyt ex storak aju in ajb'en weye.
19Aju pan otoq txi nq'o'ne kyeye, aju b'anin ti'j arin tb'anilxix, ex aju aseyt ex aju ta'l kab' xi nq'o'ne kyeye te kynik'b'eb'le tu'n kyanq'ine tu'n, xi kyo'yine kye qe tilb'ilal te jun oyaj tb'anilxix tk'ok'jal. Aqine Dios in chin q'mante jlu.
20Ax ikx qe kyky'ajale ex qe kyme'jele e ul itz'j tu'n kyok te weye, xi kyq'o'ne te chojb'il kye qe tilb'ilal, mer ik tza'n kywa. Noq ch'in ma tz'e'la tuj kywitze tej kyk'ulune kywitz qe tilb'ilal,
21ax ikx qe kyk'wa'le e ul itz'j tu'n kyok te weye e je'x kyq'o'ne te chojb'il tu'n kykub' tz'e'y te jun nimb'il kye qe tilb'ilal.
22Tej in che b'inchantoqe mya b'a'n, ex tej in che yaẍintoqe, minti' ul ti'j kyk'u'je aju tq'ijlalil tej k'wa'lxtoq qeye, tej minti'toq kyxb'alune tok, ex tej in xtanpaj kyqane tuj kyitz'jlene.
23Aqine Dios in chin q'mante jlu: Ay, b'ek'b'il kywitze, mya noq o'kx ma kyb'inchaye nimku mya b'a'n,
24ax ikx jaw kyb'incha'ne qe altar kyuj kykyaqil cay jatum tu'n kyk'ulune kywitz qe tilb'ilal ex jatum tu'n t-xi kyq'on kyib'e tu'n kyyaẍine.
25Kyuj kykyaqil kyskyin cay jaw kyb'incha'ne qe altar jatum tu'n kyk'ulune kywitz qe tilb'ilal, ex aju ke'yb'il kyeye tb'anilxix ok kyq'o'ne te minti' tajb'en, ex xi kyq'on kyib'e tu'n kyyaẍine kyuk'il kykyaqil xinaq in che ik' b'et. Nimxix e yaẍine.
26E yaẍine kyuk'il kyvesine, kyuk'il aj Egipto aqeju nim kygan tu'n kyyaẍin, ex tzaj nq'oje kyu'ne tu'nju kukx in che yaẍine.
27Kub'tzun nq'o'ne kycastiwoye: el wi'ne ch'in kytx'otx'e, ex e je'x nq'o'ne tu'n tkub' kyi'je kyu'n aj filisteo, aqeju in che el ik'une kyu'n ex minti' in che tzalaj ti'j kyb'inchb'ene ch'ixb'ajilxix.
28Minti' o qe' kyk'u'je tej kyyaẍine kyuk'il aj Egipto, ax ikx xi kyq'on kyib'e tu'n kyyaẍine kyuk'il aj Asiria; ex mi tu'n jlu minti'x qe' kyk'u'je.
29Ex kukx t-xi kyq'on kyib'e tu'n kyyaẍine kyuk'il aj Babilonia, aju kytanmi qe comersyant, ex mi tu'n jlu minti'x in qe' kyk'u'je.
30Aqine Dios in chin q'mante jlu: Mya segur ta' kyanmiye, kyja'tzun in kyb'incha'ne ik tza'n in b'ant tu'n jun xu'j jawni twitz kyuk'il xinaq ex minti' tch'ixwi.
31Kyuj kykyaqil cay jaw kyb'incha'ne jun altar jatum tu'n kyk'ulune kywitz qe tilb'ilal ex jatum tu'n t-xi kyq'on kyib'e tu'n kyyaẍine. Ex kyeye minti' b'ant kyu'ne ik tza'nx in b'ant kyu'n qe xu'j jawni kywitz kyuk'il xinaq; porke kyeye minti' el kyqanine chojb'il kyeye.
32Aqeye ik kytene ik tza'n jun xu'j aj pajil, maske at tchmil ex in xi tq'on tib' kye xinaq minti' ojtzqi'n tu'n.
33Kykyaqil qe xu'j jawni kywitz kyuk'il xinaq in xi q'o'n chojb'il kye; atzun kyeye, aqeye e je'x q'onte oyaj kye qe xinaq at kyganiye kyi'j ex axpe qeye e je'x chjonte kye tu'n kytzaj tuj tkyaqil part b'inchal il kyuk'ile.
34Kyeye tej kyyaẍine, junxitl ma tenb'a kyu'ne ik tza'n in kyb'incha'n qe txqantl xu'j jawni kywitz kyuk'il xinaq; mi jun in jyonte kyeye tu'n tyaẍin kyuk'ile, ex minti' in che tzaj chjo'ne kyu'n, alpe qeye in che'x chjonte kye. Kyja'tzun junxitl ma tenb'a kyu'ne ik tza'n qe txqantl xu'j.
35Kyja'tzun, aqeye xu'j jawni kywitz kyuk'il xinaq kyb'intze nyole:
36Aqine Dios in xi nma'ne jlu kyeye: Ma tz'el kyi'ne kyxb'alune ex minti' ma tzaj kych'ixwiye tu'n kyyaẍine kyuk'il qe xinaq at kyganiye kyi'j, ma che k'ulune kywitz qe tilb'ilal ik'unxix wu'ne, ex ma che kub' kyb'yo'ne kyk'wa'le te jun oyaj kywitz qe tilb'ilal.
37Kyja'tzun, che okel nchmo'ne kykyaqil qe xinaq at kyganiye kyi'j, aqeju ma che achine kyuk'il, kyuk'ix kykyaqil qeju e tzalaje kyuk'il, ex kyuk'ix kykyaqil qeju e je'l kyik'une; che okel nchmo'ne kyi'jeleye, ex kywitztzun qe jlu k'elel wi'ne kyxb'alune tu'ntzun kyilwaje kyu'n minti' kyxb'alune tok.
38Kb'el kysentense wu'ne ik tza'n kysentens xu'j aj pajil ex b'yol xjal, ex tu'n ntx'u'jile che kymele.
39Che xel nq'o'ne tuj kyq'ab' qe jlu tu'ntzun tkub' kyxitun qe lugar jatum in che yaẍine ex jatum in che k'ulune kywitz qe tilb'ilal. K'elel kyi'n kyxb'alune tok kyi'je kyuk'ix qe adorn tb'anilxix che ke'yin, ex che kyjel tene jumajx minti' kyxb'alune.
40Tzul kyi'n nim xjal q'ojlel kyi'je, che okel xo'ne tu'n ab'j ex che b'el b'yo'ne tu'n spad kyu'n.
41K'okel kyqoptz'i'n q'aq' ti'j kyjaye ex kb'el kysentense kyu'n kywitz nimku xu'j. Mi'n kyb'inchatle aj pajil, ex mlay txi' kychjo'ne juntl maj qe xinaq at kyganiye kyi'j.
42B'i'xtzun kchewixtel nq'oje kyi'je; chin kb'el txule'ye ex mlay chin q'ojintle.
43Ma tzik' tna'l kyu'ne tq'ijlalil tej matoq q'apojx qeye, ex ma tzaj nq'oje tu'n kyyaẍb'ile ex kyb'inchb'ene ik'b'ilxix; kyja'tzun kb'el kycastiwoye wu'ne tu'n tlaj ju kyb'inchb'ene lu. Aqine Dios in chin q'mante jlu.
Ik tza'nx te txuyb'aj kyja'xtzun te tal44Atzun ja'lo, kykyaqil qeju in che yolin ti'j jun twitz yol axix tok che yolil kyi'je aju yol in tma'n kyja': Tza'nx te txuyb'aj kyja'xtzun te tal.
45Aqeye tal kytxu'ye, aju el ik'unte tchmil kyuk'ix qe tal, ax ikx qe kyitz'ine el kyik'un kychmil kyuk'ix kyal. Aj Heteo kytxu'ye, ex aj Amorreo kymane.
46Tuj tx'otx' tumlal tb'anq'ab' q'ij ta'toq tnam Samaria kyuk'ix qe t-aldey, aju ma tz'ok tb'i ik tza'n kytzike xu'j; atzun tuj tx'otx' tumlal tnayaj q'ij ta'toq tnam Sodoma kyuk'ix qe t-aldey, aju ma tz'ok tb'i ik tza'n kyitz'ine xu'j.
47Atzun kyeye ma tz'el kykano'ne kyi'j. Mya o'kx ma kyb'inchaye ik tza'n kye kyb'incha, mas ma tzik' tib'aj kyu'ne.
48Aqine Dios in xi nma'ne jun yol axix tok: Qe aj Sodoma kyuk'ix qe t-aldey, aju tok tb'i kyitz'ine xu'j, minti'lpe kyb'incha ik tza'n kyeye ma kyb'incha ex ik tza'n ma kyb'incha qe ky-aldeye.
49Atzun kyil aj Sodoma jlu, aqeju tok kyb'i kyitz'ine xu'j: Jaw kyniman kyib' kyuk'ix qe ky-aldey tu'n tlaj chmet nimxix kywa ex tu'nju ate'toq tuj txub'txaj, ex minti' e onin kyi'j qe meb'a xjal ex kyi'j qeju atx taj kye.
50Jaw kynima kyib' ex kyb'incha aju mya b'a'n nne'l wik'une, kyja'tzun o che kub' nxitune ik tza'n o kyile.
51Myalpe ik il o b'ant kyu'n aj Samaria ik tza'n kyeye ma b'ant kyu'n. Kyeye ma kyb'inchaye nimxix mya b'a'n ik tza'n kye. Tu'nju nim mya b'a'n ma kyb'inchaye, ma che ok aj Sodoma ik tza'n minti' kyil, aju tok kyb'i kyitz'ine xu'j.
52Kb'el kych'ixwiye ok tkub' kycastiwoye, ex il ti'j tu'n tkub' kyapa'ne, porke tu'nju nim il ma kyb'inchaye kywitz qe kyitz'ine xu'j, kye ma che ok ik tza'n minti' kyil. Kb'el kych'ixwiye ok tkub' kycastiwoye, ex il ti'j tu'n tkub' kyapa'ne, porke nim il ma kyb'inchaye, ma che ok kyermaniye xu'j mer ik tza'n minti' kyil.
53Qe aj Sodoma ex qe aj Samaria che tel juntl maj tuj txub'txaj wu'ne, kyuk'ix ky-aldey; ax ikx kyeye che tele juntl maj tuj txub'txaj wu'ne,
54ex il ti'j tu'n tik'x kyu'ne ok ttzaj kycastiwoye, ex ktzajel kych'ixwiye ti'j aju o kyb'inchaye, kyja'tzun kqeb'el kyk'u'j qeju kab'e tnam tok kyb'i kyermaniye xu'j.
55Qe aj Sodoma ex qe aj Samaria kyuk'ix qe ky-aldey, che tel tuj txub'txaj juntl maj, ax ikx kyeye kyuk'ix qe ky-aldeye che tele juntl maj tuj txub'txaj ik tza'n nej.
56Tej tkub' kycastiw aj Sodoma, aqeju tok kyb'i kyitz'ine xu'j, e xmayine kyi'j, ex jaw kyniman kyib'e
57tej na'nxtoq tq'ancha'lin kyb'inchb'ene mya b'a'n; atzun ja'lo qe aj Siria, qe aj filisteo ex qe tnam kyvesin kyib'e kyuk'il in che xmayin kyi'je; ex kykyaqil xjal in che ik'un kyeye.
58Atzun ja'lo il ti'j tu'n tik'x castiw kyu'ne tu'n tlaj kyyaẍb'ene ex kyb'inchb'ene ik'b'ilxix. Aqine Dios in chin q'mante jlu.
59Aqine Dios kxel nma'ne jlu: Tuj tumelxix kb'el nq'o'ne kycastiwoye, porke ma tz'ok kyq'o'ne te minti' tajb'en aju yol tzaj kytziyane, ex minti' ma japun kyu'ne aju yol kyaj b'ant ti'j wu'ne kyuk'ile.
60Atzun weye ktzajel nna'ne aju yol kyaj b'ant ti'j wu'ne kyuk'ile tej matoq q'apoj qeye, ex kb'antel ti'j jun nyole kyuk'ile te jumajx.
61Tzultzun ti'j kyk'u'je aju kyb'inchb'ene ex ktzajel kych'ixwiye ok kyk'monteye qe kytzike ex qe kyitz'ine xu'j, ok kyxi nq'o'ne kyeye tu'n kyok ik tza'n kyale, ex mya tu'nju atwit kyoklen ti'j ju yol kyaj b'ant ti'j wu'ne kyuk'ile.
62Kb'antel ti'j nyole juntl maj kyuk'ile, k'eleltzun kynik'e ti'j, aqine Dios.
63Ok tkub' nnajsa'ne tkyaqil kyb'inchb'ene mya b'a'n, tzultzun ti'j kyk'u'je ex ktzajel nimxix kych'ixwiye ex mi'n che yolintle. Aqine Dios in chin q'mante jlu.
Who We AreWhat We EelieveWhat We Do
2025 by iamachristian.org,Inc All rights reserved.
