1Tzaj yolin Qman tuk'il Moisés twi witz Sinaí ex tma:
2Q'manxa kye aj Israel kyja': Ok kyokxe tuj tx'otx' kxel nq'o'ne kyeye, aju tx'otx' k'ojlal junjun maj te jun nimb'il weye.
3Qaq ab'q'i che awale kyuj kykojb'ile ex qaq ab'q'i b'a'n tu'n tb'aj kypodarine qe tqan ky-uvaye ex tu'n tjaw kychmo'ne twitz,
4atzun tuj twuqin ab'q'i k'ojlal tx'otx' kyu'ne te jun nimb'il weye. Mi'n che awane kyuj kykojb'ile tuj ab'q'i lu, mi'n b'aj kypodarine qe tqan ky-uvaye
5ex mi'n jaw kychmo'ne t-xpoq'l triw tajx ktzajel ch'iy, ax ikx twitz uva mya podarimaj, tu'ntzun tojlan tx'otx' jun ab'q'i.
6Aju twitz awal tzul tq'o'n tx'otx' tu'nx tib' tuj ab'q'i te ojlab'l, atzunju k'ajb'el te kywaye, te kywa qe kymajene xinaq ex kymajene xu'j, te kywa qe aq'nal ex te kywa qe stranjer xjal najl kyxole,
7te kywa kywakẍe ex te kywa qe txkup te tjaq' k'ul ate' tuj kytx'otx'e. Tkyaqil twitz awal ktzajel tq'o'n tx'otx' tu'nx tib' k'ajb'el te kywaye.
8Aju wuq ab'q'i, b'a'n tu'n t-xi kyajla'ne wuq maj, tu'ntzun tjapun jun tajlal te 49 ab'q'i,
9ex tuj tlajin tajlal twuqin xjaw, atzunju q'ij te najsb'il il; k'okeltzun kyq'ajtza'ne tkach ẍne'l kyuj kykyaqil kytanmiye.
10Aju ab'q'i 50 k'okel kyq'o'ne te xjan, ex tujtzun ab'q'i lu k'elex tqanil tu'n kytzoqpet kykyaqil qeju najl tuj tx'otx'; atzunju ab'q'i te tzoqpib'l. Kykyaqil xjal che okel te tajwil kytx'otx' juntl maj ex che ajel meltz'aj tu'n kypon kyxol qe xjal at kyxilen kyuk'il.
11Aju ab'q'i 50, atzun jun ab'q'i te tzoqpib'l, ex tuj ab'q'i lu mi'n ku'x kyawane awal, mi'n jaw kychmo'ne t-xpoq'l triw tajx ktzajel ch'iy tuj kykojb'ile ex mi'n jaw kychmo'ne twitz uva mya podarimaj,
12ex atzun ab'q'i lu te tzoqpib'l kyeye ex k'okel kyq'o'ne te xjan. O'kx kxel kywa'ne aju tu'nx tib' tx'otx' ktzajel tq'o'n.
13Tuj ab'q'i te tzoqpib'l, kykyaqile che etzale juntl maj ti'j kytx'otx'e.
14Qa at jun xjal ma tzaj tlaq'o'n ex qa ma txi tk'ayin jun piẍ tx'otx' te jun tuk'il, mi'n kub' t-sb'u'n tuk'il ti'j jlu.
15Ok ttzaj kylaq'o'ne tx'otx', kxel kychjo'ne ik tza'nx tajlal ab'q'i tb'ajlen ab'q'i te tzoqpib'l, ex ok t-xi kyk'ayine tx'otx' kye kyuk'ile, kxel kyqanine tu'n ttzaj kychjo'n ik tza'nx tajlal ab'q'i tu'n tjaw chmet twitz awal.
16Qa mas nim ab'q'i tu'n tjaw chmet twitz awal, ax mas nim twi'; ex qa nik'xi ab'q'i taj, ax ikx noq nik'xi twi', porke tza'nx tajlal ab'q'i tu'n tjaw kychmo'ne twitz awal tuj tx'otx', ikxtzun twi' kxel kyq'o'ne.
17Mi'n kub' kysb'u'ne jun kyuk'ile. Che xob'e nwitze porke aqine Kymane ex Kydiose.
18Japunx qe nleye kyu'ne, kynimanxe qe nmandamyente ex japunx kyu'ne tu'ntzun kyanq'ine tuj tzalajb'il tuj tx'otx' kxel nq'o'ne kyeye,
19ex ktzajeltzun tq'o'n tx'otx' tu'n kywa'ne ti'j okxi tnoj kyk'u'je, ex che anq'ile tuj tx'otx' tuj tzalajb'il.
20Ex qa ma kymaye kyja': ¿Titzun kxel qwa'n tuj twuqin ab'q'i, qa mi'n ku'x qawa'n qawal ex qa mi'n jaw qchmo'n twitz?, qa che chiye,
21ktzajel nsama'ne nky'iwb'ile kyib'aje tuj tqaqin ab'q'i, ex aju twitz kyawale kjawil kychmo'ne tuj ab'q'i lu, kkanitel te ox ab'q'i.
22Kyja'tzun che wa'le ti'j twitz awal otoq b'aj kyk'u'ne, akux nnu'l kanun tu'n kyawane ti'j ak'aj twitz awal tuj twajxaqin ab'q'i, ex kukx che wa'le tuj tb'elaji'n ab'q'i ti'j twitz awal otoq b'aj kyk'u'ne, akuxtzun nnu'l tq'ijlalil tu'n tjaw kychmo'ne twitz kyawale tuj tb'elaji'n ab'q'i.
23Aju tx'otx' mlay txi k'ayit te jumajx porke weye tx'otx', atzun kyeye noq b'etin xjal qeye ex stranjer xjal qeye.
24Kyja'tzun, noq alkyex tx'otx' ma tz'ok te kyetzb'ile, il ti'j tu'n taj kyq'o'ne kye tnejel tajwil, tu'ntzun kyk'monte juntl maj kytx'otx'.
25Qa at jun kyxole ma tz'ok te meb'a ex qa ma txi tk'ayin jun piẍ ttx'otx', aju terman mas at t-xilen tuk'il, atzunju b'a'n tkyaj ko'pinte tx'otx' otoq txi tk'ayin terman te juntl xjal.
26Qatzun at jun kyxjalile minti' jun terman tu'n tkyaj ko'pinte tetzb'il ex qa ma chmet twi' tu'n tu'n tkyaj tko'pin tu'nx,
27kxe'ltzun tajla'n jte'xi ab'q'i t-xilen tk'ayin ex k'ajel tq'o'n te loq'ol aju tajlal pwaq jte' ab'q'i atx taj tu'n tjapun ab'q'i te tzoqpib'l, ex k'okeltzun juntl maj te tajwil tetzb'il.
28Qatzun minti' ma knet pwaq tu'n tu'n tkyaj tko'pin tetzb'il, kyjeltzun ten tx'otx' lu tuj tkwent loq'ol max tuj ab'q'i te tzoqpib'l; maxitzun ktzoqpetel tetzb'il, ex aju xi k'ayinte etzb'il k'okel juntl maj te tajwil.
29Qa at jun ma txi tk'ayin jun ja tuj tnam toksa'n muro ti'j, o'kx jun ab'q'i at toklen ti'j tu'n tkyaj tlaq'o'n juntl maj; o'kx jun ab'q'i at toklen ti'j tu'n tkyaj tko'pin.
30Qatzun minti' ma kyaj ko'pin ja at tuj tnam toksa'n muro ti'j ok tel jun ab'q'i, kyjeltzun ten te jumajx tuj tkwent laq'olte ex tuj kykwent qe tiyjil in che ul itz'j te tib'ajxi. Mlayx tz'aj q'ot te tnejel tajwil tuj ab'q'i te tzoqpib'l.
31Atzun qe ja ate' tuj tnam minti' muro toksa'n kyi'j, ax kb'antel kyi'j ik tza'n in b'ant kyi'j qe kojb'il, jaku b'ant tu'n kykyaj ko'pit, ex che ajel q'ot juntl maj kye tnejel kyajwil tuj ab'q'i te tzoqpib'l.
32Atzun kye aj Leví kukx ktel kyoklen tu'n tkyaj kyko'pin qe ja ate' kyujx kye kytanmi.
33B'a'n tu'n tkyaj kyko'pin aj Leví kyja; ex qa mi'n, il ti'j tu'n tkyaj tkolin loq'ol ja tuj ab'q'i te tzoqpib'l, tu'n taj tq'o'n ja kye aj Leví, porke aju kyetzb'il aj Leví at kyxol aj Israel, atzunju kyja at tuj kyex kytanmi.
34Qe kojb'il ate' kyi'jele kytanmi aj Leví mlay che'x k'ayit, ex atzun kyetzb'il ex kukx ktel te kye te jumajx.
35Qa at jun kyxjalile ma tz'ok te meb'a ex qa minti' tza'n tten tu'n tanq'in, ex qa ma pon kyuk'ile, il ti'j tu'n t-xi kyonine, ik tza'n jun stranjer xjal ex b'etin xjal, ex ax b'a'n tu'n tkyaj ten kyuk'ile.
36Mi'n tz'el kyqanine ta'l kypwaqe kxel kyq'o'ne te tch'ex, noq o'kx che xob'e twitz Dios ex kyk'mome tu'n tten kyxjalile kyuk'ile.
37Mi'n tz'el kyi'ne ta'l kypwaqe kxel kyq'o'ne te tch'ex ex mi'n jax kylaq'b'a'ne twi' twa.
38Aqine Kymane ex Kydiose aju etz q'inte kyeye tuj Egipto tu'n t-xi nq'o'ne tx'otx' Canaán kyeye ex tu'n woke te Kydiose.
39Qa at jun kyxjalile ma tz'ok te meb'a ex qa ma tzaj tk'ayin tib' kyeye tu'nju at nim tk'as kyuk'ile, mi'n kub' kyq'o'ne aq'untl kyuwxix tib'aj, ik tza'n jun majen tk'ayin tib';
40noq o'kx k'okel kyq'o'ne ik tza'n jun aq'nal chjo'n tq'ij ex qa ik tza'n jun b'etin xjal, ex max tuj ab'q'i te tzoqpib'l kxel tkolin tu'n taq'nan kyuk'ile.
41K'elextzun tuj kyjaye junx kyuk'il qe tk'wa'l, tu'ntzun taj juntl maj kyxol qe tiyjil ex tuj kyetzb'il qeju at kyxilen tuk'il.
42Porke weye nmajen qe aj Israel; wu'ne e je'tz wi'ne tuj Egipto ex mlay b'ant tu'n kyxi k'ayit te majen;
43mi'n che b'aj kyyajla'ne; noq o'kx che xob'e nwitze.
44Qa kyajb'ile tu'n tten kymajene xinaq ex qa kymajene xu'j, b'a'n tu'n ttzaj kylaq'o'ne kyuj qe nasyon ate' kyi'jeleye.
45Ax ikx b'a'n tu'n ttzaj kylaq'o'ne te kymajene qe stranjer xjal ax najl kyxole, ex qe kyk'wa'l che ul itz'j akux ate' tuj kytx'otx'e. Atzun qe b'a'n tu'n ttzaj kylaq'o'ne tu'n kyok te kyeye,
46ex tu'n tkyaj kyq'o'ne kye kyk'wa'le ok kykyime, ex kukx che ajb'el te kye. Atzun kyeye, aqeye aj Israel, mi jun kyeye kkawil tib'aj jun terman, ex mi'n che kub' kyyajla'ne kyermaniye junx kyiyjile kyuk'il.
47Qa at jun stranjer xjal najl tuj kytx'otx'e ma tz'ok te q'inun, ex qa at jun kyxjalile tvesin tib' tuk'il ju xjal lu ma tz'ok te meb'a, ex qa ma txi tk'ayin tib' te xjal lu ex qa te juntl xjal at t-xilen tuk'il,
48at oklenj te tu'n tchjet tzoqpib'l te t-xilenxi tk'ayin tib'. Jaku ko'pj tu'n jun terman;
49qa tu'n jun terman tman, qa tu'n jun tky'ajal terman tman ex qa tu'n juntl xjal at t-xilen tuk'il. Ax ikx jaku ko'pj tu'nx tib', qa ma knet pwaq tu'n.
50Ex kjawil ti'n jun tajlal tuk'il xjal xi laq'onte te, atxix tuj ab'q'i tej t-xi tk'ayin tib' okxi tpon tuj ab'q'i te tzoqpib'l; aju twi' kxel q'it, ik tza'nx kyajlal ab'q'i ex aju tyemp otoq tz'aq'nan, kjawil q'it tajlal ik tza'nx chojb'il te jun aq'nal.
51Qa nim ab'q'i atx taj, k'ajel tq'o'n twi' ik tza'nx t-xilen tk'ayin tib', tu'ntzun tkyaj tko'pin tib' tza'nx tajlal ab'q'i atx taj;
52qatzun nik'xi taj tu'n tul kanun ab'q'i te tzoqpib'l, kxel tq'o'n te ko'pb'ilte jun tajlal ik tza'nx tajlal ab'q'i atx taj.
53K'okel kyq'o'ne ik tza'n jun aq'nal tuj ab'q'iyin; mi'n kyaq'e amb'il tu'n kyb'aj yajla'n.
54Qatzun minti' tumel tu'n tetz tko'pin tib' tu'nx ex qa tu'n juntl, maxitzun ktzoqpetel tuj ab'q'i te tzoqpib'l junx kyuk'il qe tk'wa'l,
55porke weye nmajen qe aj Israel, wexixe nmajen qe; wu'ne e je'tz wi'ne tuj Egipto. Aqine Kymane ex Kydiose.
Who We AreWhat We EelieveWhat We Do
2025 by iamachristian.org,Inc All rights reserved.
