Jeremías 15 - Mam Huehuetenango New Ortography

Tqanil ti'j castiw

1Chi Qman tma weye: Maske che kub'san Moisés ex Samuel nwitze, pero mlayx tzaj tz'e'y nk'u'je kyi'j qe xjal lu. Q'manxa kye tu'n kyel laq'e' nwitze ex e kyxi'.

2Qa ma tzaj kyqanin teya tza'n tu'n kyxi', q'manxa nyole lu kye: Aqeju b'anin kyi'j tu'n kykyim, il ti'j tu'n kykyim, aqeju b'anin kyi'j tu'n kykyim tuj q'oj, il ti'j tuj q'oj tu'n kykyim, aqeju b'anin kyi'j tu'n kykyim tu'n we'yaj, il ti'j tu'n we'yaj che kymel, ex aqeju b'anin kyi'j tu'n kyxi q'i'n najchaq, il ti'j che xel q'i'n najchaq.

3Aqine Dios in chin q'mante jlu: Kxel nsama'ne kyaje txkaj castiw kyib'aj: Che b'el b'yo'n tuj q'oj, che xel jawo'n kyu'n tx'yan, che xel chyo'n kyu'n k'utz ex che b'ajel tzaqin kyu'n txkup.

4Ktzajel t-xob'il kyi'j kykyaqil nasyon twitz tx'otx' ti'j ju kb'antel wu'ne kyi'j, tu'n tlaj mya b'a'n ma tb'incha Manasés tuj Jerusalén, aju rey te Judá, aju tky'ajal Ezequías.

5¿Alkye ktzajel q'aq'an tk'u'j kyi'je, aqeye aj Jerusalén? ¿Alkye kb'isal kyi'je? ¿Alkye jun ktzajel tqanin kyi'je qa b'a'n ate'ye?

6Ma tz'el kypa'n kyib'e wi'je ex noq ttzal kyi'je ma tz'ajtz kyq'o'ne nwitze; tu'ntzun jlu ma chin ok tzoqpaje kyi'je tu'n kynaje wu'ne, porke ma b'aj npasense tu'n tq'aq'an nk'u'je kyi'je. Aqine Dios in chin q'mante jlu.

7Ma che b'aj nsputune qe xjal najl tuj Jerusalén ik tza'n ttxa triw, ex ma che ex wi'ne kyuj qe tnam tuj tx'otx' lu; ma che kyaj nq'one qe xjal etzan wu'ne minti' kyk'wa'l, ex ma che naj wu'ne porke minti' ma kyaj kykolin tu'n kyb'inchante mya b'a'n.

8Mas nim meb'a xu'j ma che kyaj nq'o'ne kyxol ik tza'n ttxa tz'a'n at ttzi mar. Mer te chilkuq'ij tzaj kamik wu'ne kyib'aj qe txuyb'aj ex qe kyal ku'xun; noq minab'en tzaj b'is kyib'aj wu'ne, tuk'ix xob'ajil.

9Ma b'aj tipun txuyb'aj at wuq tal, ya minti'tl in jatz t-xew; in ch'ixwi ex b'i'x ma naj tnab'l; aju t-spik'umal q'ij ma meltz'aj te qlolj. Alkye qeju ma che kyaj anq'in, kxel nma'ne tu'n kykub' b'yo'n kyu'n aj q'oj kyi'j. Aqine Dios in chin q'mante jlu.

Aju tyol Jeremías tu'n tlaj tb'is

10Ay b'ek'b'il nwitze, aya ntxu'ye in ul talina noq tu'n ntene tuj q'oj kyuk'il kykyaqil xjal. Mi jun ma tz'el nch'exo'ne pwaq te, ex mi jun ma tzaj tqanin tch'ex weye, ex kykyaqil in che qanin tu'n ttzaj mya b'a'n wib'aje.

11O tma Qman kyja': Ax tok kkletela wu'ne tu'n ttena b'a'n. Ax tok, wu'ne che ul aj q'oj ti'ja tu'n kykub'san twitza tuj tq'ijlalil ok tul k'ixb'isab'l ex b'is.

Tqanil tu'n Dios ti'j castiw ktzaj kyib'aj aj Israel

12¿Alkye jun jaku toqj tb'anil k'uxb'il tu'n ex q'an k'uxb'il in tzaj tuj tx'otx' tuj tb'anq'ab' q'ij?

13Aqeye aj Israel, kxel nq'o'ne kyq'inumab'le ex kypwaqe kye aj q'oj kyi'je, tu'n t-xi kyi'n noq kukx tu'n tlaj tkyaqil il ma kyb'inchaye tuj tkyaqil kytx'otx'e.

14Che okel nq'o'ne te kymajen qe aj q'oj kyi'je tuj jun tx'otx' minti' ojtzqi'n kyu'ne, ex nimxix nq'oje ma tzaj kyi'je, mer ik tza'n q'aq' b'i'x che b'ajel tz'e'ye tu'n, chi Dios.

In kub'san Jeremías twitz Dios

15Nman Dios, tkyaqil b'a'n tu'na, chin tna'ntza ex tzaja onil weye. Q'o'nka t-xel kyi'j qeju in che jyon wi'je tu'n nkub'e kyu'n. Mi'n ten tpasensa kyi'j ex mi'n chinx ttzoqpi'na tu'n nkyime kyu'n. B'a'n tu'na qa tu'n tlaja in chin ok yaso'ne kyu'n.

16Tej ttzaj yolina weye, kyaj wawa'ne tyola tuj wanmiye, nim o chin tzalaje kyi'j ex e ok te jun tzalajb'il tuj wanmiye, porke etzan qine tu'na, aya Nman Dios Tajaw Tkyaqil.

17Minti' ma chin tene junx kyuk'il qeju in che achin, ex atxix tej woke tuj tkwenta njunalxe in chin b'ete, ex nim ma tzaj nq'oje tu'n tlaj kyil xjal.

18¿Tiqu'n minti'x in b'aj ta'w k'ixk'oj wi'je? ¿Tiqu'n minti' q'anb'il ti'j k'ixb'isab'l weye ex minti'x in q'anit tu'n q'anb'il? ¿Maj ik k'okela te weye ik tza'n jun xoch nna'j tzqij a' tuj? Chi Jeremías.

Aju tzaq'web'l tu'n Qman

19In tzajtzun tzaq'we'ne tu'n Qman ex tma: Qa ma tz'ajtz meltz'aja wuk'ile, jakutzun nk'ama juntl maj ex jaku tz'ajb'entla te weye. Qa mi'n ma yolina ti'j yol noqx gan ex qa o'kx ma yolina ti'j yol at tajb'en, tu'n jlu aya k-yolil te nxele, porke aqeju xjal lu il ti'j tu'n kyajtz meltz'aj tuk'ila, ex mya aya tu'n taj meltz'aj kyuk'il.

20Ik k'okela wu'ne kye xjal lu ik tza'n jun muro q'an k'uxb'il tok ti'j jun tnam ex kyuw tu'n tkub' ti'j. Che q'ojel ti'ja, ex mlay kub' ti'ja kyu'n, porke aqine chin tel tuk'ila te kolol ti'ja.

21Kletela wu'ne tuj kyq'ab' qe xjal mya b'a'n, ex kletela wu'ne tuj kyq'ab' xjal tx'u'j kywi'. Aqine Dios in chin q'mante jlu.