Mateo 18 - Mam Huehuetenango New Ortography

Alkye mas at toklen tuj kawb'il in tzaj tuj kya'j Marcos 9.33-37; Lucas 9.46-48

1Tuj tq'ijlalil lu e pon laq'e' qe t-xnaq'tzb'en Jesús tuk'il ex xi kyma'n te:

—¿Alkye jun mas nim toklen tuj ju kawb'il in tzaj tuj kya'j? Che chi.

2Tzaj ttxko'n Jesús jun tal k'wa'l, kub' tq'o'n kyxol,

3ex tma:

—Ax tok kxel nma'ne kyeye, qa minti' ma che ch'expaje ex qa minti' ma che oke ik tza'n qe tal k'wa'l, mlayx che okxe tuj ju kawb'il in tzaj tuj kya'j.

4Kyja'tzun, alkyeju ma kub' tmansin tib' ik tza'n jun tal k'wa'l lu, atzunju mas nim toklen tuj kawb'il in tzaj tuj kya'j.

5Ex alkye jun xjal in k'monte jun tal k'wa'l ik tza'n jlu tu'nju at tk'ujlalil xjal wi'je, aqine in chin tk'mo'n.

Aju tolsab'l tu'n qkub' tz'aq tuj il Marcos 9.42-48; Lucas 17.1-2

6Ex qa at jun xjal ma kub' tz'aq jun tal ch'in tu'n tuj il kyxol qeju in che okslan wi'je, mas b'a'n tu'n tok k'alet jun kya' ma'xix ti'j tqul, ex tu'n tku'x xo't max t-xe'pun mar.

7Ay b'ek'b'il kywitz xjal tu'nju at tolsab'l tkub' kywitz tu'n kykub' tz'aq tuj il. Porke il ti'j tu'n tkub' q'o'n tolsab'l kywitz, pero b'ek'b'il twitz ju xjal aju kb'el q'onte tolsab'l.

8Kyja'tzun, qa tu'n tq'ab'a ex qa tu'n tqana kb'el tz'aqa tuj il, tx'emin ela ex xo'mixa; porke mas b'a'n tu'n tokxa koxa ex ẍtunka tuj chwinqlal te jumajx, twitzju tu'n tten kab'e tq'ab'a ex kab'e tqana ex tu'n t-xi xo'na tuj q'aq' te jumajx.

9Ex qa tu'n tb'aq' twitza kb'el tz'aqa tuj il, q'i'metza ex xo'mixa; ex mas b'a'n tu'n tokxa tuj chwinqlal te jumajx junx tb'aq' twitza, twitzju tu'n tten kab'e tb'aq' twitza ex tu'n tku'x xo'na tuj infierni in k'ant tu'n q'aq'.

Aju techal ti'j ju ẍne'l kyaj tzpet Lucas 15.3-7

10Ten kykwente ti'j tu'n mi'n tel kyik'une jun kye qeju tal ch'in lu; ex kxel nma'ne kyeye, qe anjel ate' tuj kya'j, kwentin qe tal k'wa'l lu kyu'n.

11Porke aqine sk'o'maj qine tu'n Dios tu'n ntene kyuk'il xjal, ma chin ule klol kye qeju tzpetni qe.

12¿Chi tok kyu'ne? Qa at jun xjal at jun syent t-ẍne'l, ex qa ma kyaj tzpet jun, ¿mlaypelo che kyaj tq'o'n qeju 99 twi witz, ex kxe'l jyolte aju otoq kyaj tzpet?

13Ex qatzun ma knet tu'n, ax tok kxel nma'ne kyeye, mas ktzalajel ti'j ju tal ẍne'l lu kywitz qeju 99, aqeju minti' e kyaj tzpet.

14Kyja'tzun, aju Kymane at tuj kya'j myatzun tajb'il tu'n tnaj jun kye qeju tal ch'in lu.

Tza'n tten tu'n tkub' qnajsa'n til qerman Lucas 17.3

15Kyja'tzun, qa ma tb'incha termaniya jun mya b'a'n ti'ja, txi'ya tuk'il tu'n kyyoline kyjunalxe ex ka'winxa. Qa ma txi tb'i'n tyola, ma kub' tk'u'j termaniya tu'na.

16Ex qa minti' ma txi tb'i'n tyola, q'inx juntl tuk'ila ex qa kab'e, tu'ntzun tel chik'e'xix tkyaqil yol tu'n kab'e ex qa ox testiw.

17Qatzun minti' ma txi tb'i'n kyyol, q'manxa kye kykyaqil okslal; ex qa minti' ma txi tb'i'n kyyol kykyaqil okslal, kyq'o'nke ik tza'n qe txqantl xjal minti' nne'l kynik' ti'j Dios, ex qa ik tza'n jun peyil pwaq.

18Ax tok kxel nma'ne kyeye, aju kxel kymayo'ne tzalu twitz tx'otx', ax ikx tuj kya'j kmayetel; ex aju kxel kyma'ne tu'n tb'ant tzalu twitz tx'otx', ax ikx tuj kya'j ktzajel q'ma'n tu'n tb'ant.

19Kxel nma'ne juntl maj kyeye, qa at kab'e kyeye ma moje' kyyol twitz tx'otx' tu'n t-xi kyqanin jun ti'xti tuj kyna'j Dios, ktzajel q'o'n kye tu'n Nmane aju at tuj kya'j.

20Porke jatum ate' kab'e ex qa ox kyb'uyin kyib' k'ulul weye, atzun atine kyxol.

21Pontzun laq'e' Pedro ttxlaj Jesús ex xi tma'n te:

—Tat, ¿jte' maj tu'n tkub' nnajsa'ne til wermaniye qa ma tb'incha mya b'a'n wi'je? ¿Wuq majpe kb'el nnajsa'ne? Chi Pedro.

22Xi tma'n Jesús te:

—Minti' in xi nma'ne teya qa o'kx wuq maj, atzun in xi nma'ne teya tu'n tkub' tnajsa'na tkyaqil maj.Aju techal ti'j ju majen mi'n taj tu'n tkub' tnajsa'n til juntl

23Kyja'tzun, aju kawb'il in tzaj tuj kya'j ik tten ik tza'n jun rey kub' t-ximan tu'n tjaw ti'n tajlal kyk'as tmajen.

24Ex tej tok ten q'il tajlal kyk'as, pon q'i'n jun majen laj mil talent pwaq tk'as.

25Ex tu'nju minti' tumel tu'n tchjet tk'as majen lu, tzaj tma'n tpatrón tu'n t-xi k'a'yit tuk'ix t-xu'jil ex kyuk'ix tk'wa'l ex tuk'ix tkyaqilju at te, tu'ntzun tchjet tk'as.

26Kub'tzun ẍmeje' majen lu, in kub'san twitz tpatrón ex in tma'n: Tat, ten tpasensa wi'je, kchjetel tkyaqil wu'ne teya, chi xjal.

27Atzunte patrón tzaj q'aq'an tk'u'j ti'j majen lu, xi ttzoqpi'n ex kub' tnajsa'n tk'as.

28Ex tej tetz majen lu, ok noj juntl majen twitz junx kyaq'un tuk'il, attoq jun syent denari pwaq tk'as tuk'il ju otoq tz'etz tzoqpi'n. Tzajtzun ttzyu'n ti'j tqul, ok tjatz'o'n ex xi tma'n: Chjontza tk'asa at wuk'ile, chi xjal.

29Kub'tzun ẍmeje' ju tuk'il t-xe tqan in kub'san twitz ex in tma'n: Ten tpasensa wi'je, tkyaqil kchjetel wu'ne teya.

30Atzunte xjal minti' xi tb'i'n tyol juntl, noq o'kx xi ti'n ex okx tq'o'n tuj pres, maxi tu'n tetz okxi tchjet tk'as.

31Tejtzun kyke'yinte txqantl majen aju o b'aj, tzaj nimxix kyb'is, e je'xtzun ex xi kyma'n te kypatrón tkyaqilju otoq b'aj.

32Txkettzun ju majen tu'n tpatrón ex xi tma'n te: Aya majen mya b'a'na. Tkyaqil tk'asa ma kub' nnajsa'ne porke ma kub'sana nwitze.

33¿Myapetzun ikx teya tu'n ttzaj q'aq'an tk'u'ja ti'j tuk'ila ik tza'n weye ma tzaj q'aq'an nk'u'je ti'ja? Chi patrón.

34Tzajtzun tq'oj tpatrón, xi tma'n tu'n tb'aj k'ixb'isa'n ex tu'n tokx q'o'n tuj pres, maxi tu'n tetz tzoqpet okxi tchjet tkyaqil tk'as.

35Ax ikxtzun ok tb'incha' Nmane kyi'je, aju at tuj kya'j, qa minti' xkub' kynajsa'ne tu'n tkyaqil kyanmiye aju kyil kyermaniye, chi Jesús kye.