Éxodo 31 - Mam Huehuetenango New Ortography

Qe xjal at kynab'l tu'n tb'ant tja Dios Éxodo 35.30; 36.1

1Tzaj tma'n Qman Dios te Moisés kyja':

2B'intza, kyxol qe tiyjil Judá o jaw nsk'o'ne Bezaleel aju tky'ajal Uri ex tal tchman Hur;

3o noj tuj tanmi tu'n Nxewe ex o tz'ok nim tnab'l wu'ne, o txi nq'o'ne tojtzqib'l ex t-sek'al tnab'l ti'j tkyaqil aq'untl,

4tu'n t-ximan ti'j tza'n tten tu'n tb'ant aq'untl, tu'n taq'nan ti'j q'an pwaq, ti'j saq pwaq, ti'j q'an k'uxb'il,

5ex tu'n kyb'aj jaset qe tal ab'j tb'anilxix ex tu'n kyku'x tq'o'n kyuj kyq'uqb'il, tu'n kyb'aj tjaso'n qe tze', ex tu'n taq'nan ti'j tkyaqil wiq aq'untl.

6Kyxol qe tiyjil Dan o tz'ok nq'o'ne Aholiab aju tky'ajal Ahisamac, te onil te. Ax ikx o txi nq'o'ne kynab'l kykyaqil qeju at kyojtzqib'l tu'n kyaq'nan, tu'n tb'ant kyu'n tkyaqilju o txi nma'ne teya.

7Kb'ajel kyb'incha'n aju ja xb'alun te mojb'ab'l tib'il, aju kax te k'ub'l nleye, aju tmaqsil tkub'sa'n tib'aj, ex kykyaqil qe makb'il che ajb'el tuj ja xb'alun,

8aju mes ex qe makb'il che ajb'el ti'j, aju kykub'il kandil q'an pwaq tb'anilxix ttx'otx'il ex kykyaqil qe makb'il che ajb'el ti'j, aju altar jatum kb'el patit storak,

9aju altar jatum kb'el patit chojb'il ex kykyaqil qe makb'il che ajb'el ti'j, aju tkub'il a' tuk'ix tq'uqb'il,

10qe kyxb'alun pal, qe xb'alun xjan te Aarón, qe xb'alun che ajb'el kye tky'ajal ok kyajb'en weye,

11aju aseyt k'ajb'el te xjansab'l ex aju storak at tk'ok'jal tu'n tajb'en tuj Lugar Xjan. Kb'antel tkyaqil jlu kyu'n ik tza'nx o txi nma'ne teya, chi Qman Dios.

Aju q'ij te ojlab'l

12Tzaj tma'ntl Qman te Moisés kyja':

13Chi Qman, chikuya kye aj Israel: Ax tok che ojlale kyuj qe q'ij te ojlab'l, ex atzun jun techal ti'j yol kyaj b'ant ti'j wu'ne kyuk'ile ex kyuk'il kyiyjile che ul itz'j te tib'ajxi, tu'ntzun tel kynik'e ti'j aqine Kymane in chin xjansante kyeye.

14Kyja'tzun, che ojlale tuj q'ij te ojlab'l tu'nju xjan te q'ij lu te kyeye. Alkye jun minti' ma tz'okx t-xo'n q'ij lu, ax tok kymel. Alkye jun ma tz'aq'nan tuj q'ij lu, b'i'x k'elex lajet tu'ntzun mi'n ttentl kyxol t-xjalil.

15Qaq q'ij che aq'nale. Atzunju twuqin q'ij, q'ij te ojlab'l, xjansamaj te weye. Noq alkyexku ma tz'aq'nan tuj q'ij te ojlab'l ax tok kymel.

16Aqeye aj Israel, kynimanxe q'ij te ojlab'l ex kyik'san kub'e q'ij lu, ax ikx kyu'n kyiyjile che ul itz'j te tib'ajxi. A jlu jun yol kyjel b'ant ti'j wu'ne kyuk'ile te jumajx.

17Atzun jun techal tu'n tten qxol aqine ex aqeye aj Israel, porke tuj qaq q'ij b'ant kya'j ex tx'otx' wu'ne; ex tuj twuqin q'ij xi nkoline aq'untl ex in ojlane, chi Dios.

18Tej tb'aj yolin Qman tuk'il Moisés twi witz Sinaí, e tzaj tq'o'n kab'e tz'lom ab'j te, tz'ib'amaj qe ley kywitz tu'nx twi tq'ab' Dios.