Romanos 15 - Mam Huehuetenango New Ortography

Qb'incham aju b'a'n tu'n tajb'en te jun onb'il te quk'il

1Kyja'tzun, awqo' at qipun tuj qokslab'l, tzik'xwit qu'n aju kypaltil qeju minti' kyipun, ex mi'n qb'incha aju qex qajb'il tu'n qtzalaj ti'j.

2Teyle junjun qe qb'incham aju b'a'n, tu'n tajb'en te jun onb'il te quk'il ex tu'n ttzalaj ti'j, ex tu'n tch'iy tnab'l.

3Porke ik tza'n te Crist minti' tb'incha tex tajb'il tu'n ttzalaj ti'j; noq o'kx ik'x tu'n ik tza'n in tma'n tuj Tu'jil: Aju yasb'il kyu'n qeju in che yasun ti'ja kub' tz'aq wib'aje.

4Ex tkyaqil aju o tz'ib'anjtz tuj Tu'jil ojtxi, o tz'ib'anjtz te xnaq'tzb'il qe, tu'n tten qpasens ex tu'n tqe' qk'u'j tu'nju yol tz'ib'an tuj Tu'jil, tu'ntzun tqe'xix qk'u'j ti'j Dios.

5Aju Dios q'ol kypasense ex q'uqb'al kyk'u'je, awt Dios tz'onin kyeye tu'n kytene junx kynab'le kyxolxe ik tza'nx tajb'il Jesucrist,

6tu'ntzun tjaw kynimsa'ne tb'i Dios, aju Tman Qajaw Jesucrist, junx kynab'le kykyaqile ex junx kyyole.

Pakb'anjtz tqanil b'a'n kye xjal mya judiy qe

7Kyja'tzun kyk'mom kyib'e kyxolxe ik tza'n te Crist ma qo tk'am, tu'n tjaw nimset tb'i Dios.

8Kyja'tzun kxel nma'ne kyeye, ate Jesucrist ok tq'on tib' te ajb'el kye aj Israel tu'n tyek'unjtz qa ax tok tyol Dios, tu'ntzun tjapun aju tyol Dios tziyimaj tu'n ojtxi kye qxe'chel,

9ex tu'n tjaw nimsa'n tb'i Dios kyu'n xjal mya judiy qe, tu'nju ma tzaj q'aq'an tk'u'j Dios kyi'j, ik tza'n in tma'n tuj Tu'jil:

Tu'ntzunju kjawil nnimsa'ne tb'iya kyxol txqantl xjal kyuj txqantl nasyon, ex chin b'itzale tu'n tjaw nimset tb'iya.

10Ex juntl maj in tma'n:

Aqeye txqantl xjal kyuj txqantl nasyon, che tzalajxe tuk'il ju tnam etzan tu'n Dios.

11Ex juntl maj in tma'n:

Kynimsa'nktze tb'i Qman, aqeye txqantl xjal kykyaqile kyuj txqantl nasyon, ex kykyaqile aqeye tnam kynimsa'nktze tb'i.

12Ex at jun yol in tma'n Isaías kyja':

Ktzajel jun tiyjil Isaí. Tzul te kawil kyib'aj txqantl xjal kyuj txqantl nasyon; ex kqeb'el kyk'u'j txqantl xjal ti'j, chi tuj Tu'jil.

13Ate Dios in tzaj q'uqb'ante qk'u'j, awt nojsante kyanmiye tu'n tkyaqil tzalajb'il, ex awt q'onte kymojb'ab'l kyib'e noq tu'n kyokslab'le, tu'ntzun tqe'xix kyk'u'je ti'j tu'n tipumal Xewb'aj Xjan.

14Q'uql nk'u'je kyi'je, erman, tu'nju b'a'n kymodiye, ex at nim kyojtzqib'le, ex b'a'n che q'on kynab'le kyxolxe.

15Ex clarxix ma txi ntz'ib'ane kyeye erman ti'j junjun yol, tu'n mi'n tik' tna'l kyu'ne. Ma txi nma'ne tu'nju at woklene tzaj tq'o'n Dios,

16tu'n woke ajb'el te Jesucrist kyxol xjal mya judiy. Aju wajb'eb'le, tu'n t-xi npakb'a'ne tqanil kolb'il aju ma tzaj tq'o'n Dios, tu'ntzun kyk'met txqantl xjal tu'n Dios ik tza'n jun oyaj b'a'n nne'la tuj twitz, pa'nmaj qe tu'n Xewb'aj Xjan tu'n kyajb'en o'kx te Dios.

17Tu'nju okslal qine ti'j Jesucrist, kyja'tzun in chin tzalaje ti'j wajb'eb'le te Dios.

18Ex mlay chin yoline ti'j juntl ti'xti, o'kx ti'j ju ma tb'incha Crist, tu'n nyole ex tu'n waq'unb'ene tu'n t-xi kyniman xjal mya judiy tyol Dios.

19Ma b'ant jlu wu'ne noq tu'n kyipumal qe señ ex tu'n kyipumal qe b'inchb'en ma'xix kyxilen, ex tu'n tipumal T-xew Dios; kyja'tzun, ma pon b'aj npakb'a'ne tqanil kolb'il tu'n Crist, tzajnix tuj tnam Jerusalén ex max ma pon b'aj tuj tx'otx' Ilírico.

20Ex kyja'tzun nno'k tilil wu'ne tu'n t-xi nma'ne tqanil kolb'il jatum na'nxtoq kyb'inte xjal tqanil ti'j Crist, tu'ntzun mi'n waq'nane jatum otoq xe't tu'n juntl xjal,

21ik tza'n in tma'n tuj Tu'jil:

Aqeju b'ajx kyb'i tqanil ti'j, ok kyila', ex aqeju na'nxtoq kyb'inte tqanil ti'j, k'elel kynik' ti'j, chi tuj Tu'jil.

Kub' t-ximan Pablo tu'n tpon tuj Roma

22Kyja'tzun, nimku maj o chin we'ye tu'n mi'n nxi'ye kyuk'ile.

23Ex ja'lo, minti'tl jatum tu'n waq'nane kyuj lugar tzalu, ex ma b'et-xi ab'q'i in wajb'e'ne tu'n nxi'ye kyuk'ile.

24Kyja'tzun, ok nxi'ye tuj España, chin ik'ele kyuk'ile; porke ximan wu'ne ok wila'ye kywitze ok wik'e, ex tu'n ttzaj kyq'o'ne ch'in onb'il weye tu'n tajb'en tuj nb'eye, otoqxi chin tzalaj ch'ine kyuk'ile nej.

25Atzun ja'lo ma chinxe tuj tnam Jerusalén tu'n t-xi wi'ne jun onb'il kye okslal.

26Porke b'a'n ela tuj kywitz aj Macedonia ex qe aj Acaya tu'n tjaw chmet jun oyaj tu'n t-xi q'ot kye meb'a ate' kyxol okslal tuj Jerusalén.

27Porke b'a'n ela tuj kywitz aj Macedonia tu'n t-xi kyq'o'n jun oyaj kye okslal tuj Jerusalén, ok kyq'o'n mer ik tza'n at kyk'as kyuk'il; porke ik tza'n ma kyk'am xjal mya judiy ju tky'iwb'il Dios noq kyu'n okslal judiy, ax ikxtzun il ti'j tu'n kyonin xjal mya judiy ti'j ju at tajb'en kye okslal judiy.

28Kyja'tzun, ok tjapun jlu wu'ne, t-xilenxi nq'o'ne aju oyaj lu kye, chin ik'ele visitaril kyeye ok nxi'ye tuj España.

29Ex b'a'n wu'ne, ok nxi'ye kyuk'ile, ok kyk'ma'ye nimxix t-xtalb'il Crist ok npone kyuk'ile.

30Chin kub'saltzune kywitze erman, noq tu'nju okslal qo' ti'j Qajaw Jesucrist, ex tu'nju at kyk'ujlalile tu'n Xewb'aj Xjan, che onine wi'je tuj kyna'j Diose, ex che kub'sane twitz Dios wi'je,

31tu'n nkolpaje kywitz qe xjal mib'an che b'in ate' tuj Judea, ex aju oyaj kxel wi'ne kye okslal tuj Jerusalén b'a'nwt tz'e'la tuj kywitz;

32ex tu'n npone kyuk'ile tuk'il tzalajb'il noq tu'n tajb'il Dios, ex tu'n wojlan ch'ine kyuk'ile.

33Awt Dios ten kyuk'ile kykyaqile, aju q'olte qmojb'ab'l qib'. Ikxwitju.