1Ate'toq t-sanjel Dios ex xnaq'tzal kyxol okslal tuj tnam Antioquía. Atzun qe jlu: Bernabé, tuk'ix Simón (aju Q'eq xjal tb'i kyu'n xjal), tuk'ix Lucio aju aj Cirene, tuk'ix Manaén (aju junx o ch'iysanjtz tuk'il Herodes aju gobernador) ex tuk'ix Saulo.
2In che k'uluntoq jlu te Qajaw, ex in kub' kyyo'n we'yaj, tzaj tma'n Xewb'aj Xjan kye kyja':
—Kypa'mile Bernabé tuk'ix Saulo te weye, porke ma che txkonjtz wu'ne tu'n kyajb'en tuj aq'untl, chi Xewb'aj Xjan.
3Tkub'lenxitzun kyyo'n we'yaj ex kyb'ajlenxi na'n Dios, kub'tzun kyq'o'n kyq'ab' tib'aj kywi', ex e je'xtzun kysama'n.
Tej kypakb'an qe apostol tuj tx'otx' Chipre4Atzunte Bernabé tuk'ix Saulo e je'x sama'n tu'n Xewb'aj Xjan, e pon tuj tnam Seleucia, atzun e je'x tuj barc, e pon tuj jun tx'otx' Chipre tb'i.
5Ex tej kypon tuj tnam Salamina, xi kypakb'a'n tyol Dios kyuj ja te k'ulb'il kye xjal judiy. Ex tuk'ix Juan uk'in kyu'n te onil kye.
6Ex b'aj kyb'etin tuj tx'otx' Chipre, e pon tuj tnam Pafos; ex atzun ok noj jun xjal judiy kywitz, Barjesús tb'i, chman te xjal lu ex in tma'n qa t-sanjel Dios te, ex nik'al yol.
7Axtoq ta' chman lu tuk'il gobernador Sergio Paulo tb'i, ex at-xix tnab'l gobernador lu. Txkettzun Bernabé tuk'ix Saulo tu'n gobernador ex tajb'il tu'n tb'inte tyol Dios.
8Atzunte chman, aju Elimas juntl tb'i tuj yol griego, ok ten maqolte tu'n mi'n t-xi toksla'n gobernador.
9Atzunte Saulo, aju ax Pablo tb'i, nojni tuj tanmi tu'n Xewb'aj Xjan, ok tke'yinxix ti'j chman,
10ex xi tma'n te:
—Aya, nimxix in sb'una ex nimxix mya b'a'n in tb'incha'na, ex tk'wa'l tajaw ila, ex aj q'oja ti'j tkyaqilju b'a'n. ¿Tiqu'n minti' in kyaj tkolina tu'n t-ẍoksanteya qe tb'e Qajaw jiqun kyi'j?
11Ja'lotzun, kb'el tcastiwoya tu'n Qajaw; k'okela moẍ, ex ela' q'ij ktela mlay b'ant tu'n tok tke'yina tqan q'ij, chi Saulo.
Ex jurat naj kub' qloljxix tuj twitz, in takpaje', ex in jyon ti'j alkye tu'n t-xi lach'on te.
12Atzunte gobernador, tej tke'yinte jlu okslantzun, porke in lab'in ti'j ju xnaq'tzb'il ti'j Qajaw.
Tej tpakb'an Pablo tuk'ix Bernabé tuj Antioquía tuj tx'otx' Pisidia13E etztzun Pablo kyuk'ix qe tuk'il tuj tnam Pafos, e okx tuj barc tu'n kypon tuj tnam Perge tuj tx'otx' Panfilia; atzunte Juan el tpa'n tib' kyi'j, aj meltz'aj juntl maj tuj Jerusalén.
14E ik'tzun tuj Perge, e pon tuj tnam Antioquía tuj tx'otx' Pisidia; e okxtzun tuj ja te k'ulb'il tuj q'ij te ojlab'l ex e kub' qe'.
15Tb'ajlenxitzun sch'i'n tuj tu'jil ley ex tuj kyu'jil t-sanjel Dios, atzun kye nejenel tuj ja te k'ulb'il tzaj kysama'n jun xjal q'malte kye Pablo kyja':
—Aqeye erman, qa at jun kyyole te q'ob'l kynab'l xjal, kymantze, che chi.
16Jawtzun we' Pablo, xi tyek'un tq'ab' tu'n mi'n kyq'ajt, ex tma:
—Aqeye xinaq aj Israel, ex aqeye xjal mya judiy in che xob'e twitz Dios, kyb'intze nyole.
17Aj Israel qo', aju Qdios jaw sk'onte kye qxe'chel, ex e chmet-xix qxjalil tej kyten tuj tx'otx' Egipto jatum e ten te stranjer xjal; ex tu'n tipumal Dios e je'tz ti'n tuj Egipto.
18Ex 40 ab'q'ilo ten tpasens Dios kyi'j tuj lugar minti' kynajb'il xjal tuj;
19ex tej kynaj wuq nasyon tu'n Dios tuj tx'otx' Canaán, xi tq'o'n kytx'otx' xjal aj Canaán te kyetzb'il qxe'chel.
20Te tib'ajxitzun, ok tq'o'n Dios qe jwes kyxol, b'alo kyaje syent tuk'il 50 ab'q'i e ten jwes, o kanun ti'j Samuel aju t-sanjel Dios.
21Xitzun kyqanin tu'n tok jun kyrey, ex tzaj tq'o'n Dios jun kyrey Saúl tb'i, aju tky'ajal Cis ex ok te kyrey, ate xinaq lu tiyjil Benjamín, ex o ten 40 ab'q'i te kyrey.
22Tej tel q'i'n jlu, ok tq'o'n Dios juntl kyrey aju David tb'i; ex o yolin Dios ti'j: Ma tz'el nnik'e ti'j David aju tky'ajal Isaí, ate jlu jun xinaq ik tza'nx wajb'ile, ok tb'incha' tkyaqil alkye wajb'ile, chi Dios.
23Ti'jtzun tiyjil David ul itz'j Jesús aju tzaj sama'n tu'n Dios tu'n tok te Kolol kye aj Israel, ik tza'nx otoq tzaj ttziyan.
24Na'nxtoq tul Jesús, xi tpakb'a'n Juan kye kykyaqil aj Israel tu'n kyb'yan ex tu'n tajtz ti'j kyanmi.
25Tej ch'ixtoq tjapun b'aj taq'un Juan, tma: ¿Alkye qine tuj kynab'le? Mya we qin aju Crist; ex lu jun xjal lepchix ttzaj wi'je mya b'a'n qine tu'n tel npaju'ne taq'al t-xajab' ti'j tqan, chi Juan.
26Erman, aqeye tiyjil Abraham, ex qe xjal mya judiy ate' kyxole in che xob' twitz Dios: te qe ma tzaj q'o'n ju yol lu te kolb'il.
27Porke qe xjal najl tuj Jerusalén kyuk'ix qe nejenel kyxol, minti' el kynik' ti'j Jesús, ex minti' el kynik' ti'j aju in tma'n tuj kyu'jil t-sanjel Dios, aju in jaw sch'i'n tuj tkyaqil q'ij te ojlab'l; ex o japun kyu'n aju tz'ib'an tuj Tu'jil tej tkub' t-sentens Jesús kyu'n.
28Ex maske minti' knet jun til kyu'n tu'n tkyim, pero xi kyqanin te Pilato tu'n tkub' b'yet.
29Ex tjapunlenxitzun b'aj tkyaqil kyu'n aju tz'ib'amaj ti'j tuj Tu'jil, ku'tztzun kyi'n twitz crus, ex okx kyq'o'n tuj jun pantyón.
30Ex tu'n Dios jaw anq'in kyxol kyimni.
31Ex nimku q'ij kub' tyek'un tib' Jesús kywitz qeju e tzaj tuk'il tuj Galilea e pon tuj Jerusalén; atzun qe jlu ma che ok te testiw ti'j kywitz xjal ja'lo.
32Ax ikx qeye in xi qma'ne b'a'n tqanil kyeye ti'j ju yol tzaj ttziyan Dios kye qxe'chel.
33Aqo' kyiyjil xjal lu, kyja'tzun ma tzaj tq'o'n Dios qe aju tziyimaj tu'n kye qxe'chel, porke ma jaw anq'in Jesús tu'n; ik tza'n tz'ib'an tuj tkab'in salmo in tma'n: Aya nky'ajale, ma chin oke te tmana ja'lo, chi tuj Tu'jil.
34Ex ma jaw anq'in Jesús tu'n kyxol kyimni tu'n mi'n ttzuwix t-ximlal. Ti'jtzun jlu tma Dios kyja': Kjapunel wu'ne kyeye aju yol axix tok xi ntziyane te David, tu'n kykub' nky'iwla'ne, chi Dios tuj Tu'jil.
35Kyja'tzun in tma'n tuj juntl salmo: Mlay kyaj tq'o'na tu'n ttzuwix nximlale, aqine tmajena nimal teya, chi tuj Tu'jil.
36Ex ax tok ate David ajb'en kye t-xjalil ik tza'nx tajb'il Dios, ex kyimtzun, ex ku'x maqu'n kytxlaj qe tman, ex tzuwix t-ximlal.
37Atzunte Jesús minti' tzuwix t-ximlal, porke jaw anq'in tu'n Dios.
38Tz'elxtzun kynik'e ti'j jlu, aqeye erman: In xi qma'ne tqanil kyeye, noq tu'n Jesús knajsetel kyile.
39Minti' tumel tu'n tnajset kyile tu'n tley Moisés, atzun ja'lo kykyaqil qeju ma che okslan, knajsetel kyil tu'n Jesús.
40Kyq'o'nktzune kwent ti'j tu'n mi'n ttzaj kyib'aje aju in tma'n tuj kyu'jil t-sanjel Dios, chi kyja':
41Kyb'intze, aqeye xmayil, ex che lab'ine ti'j, ex kykub' naje; tu'nju at jun ti'xti ok nb'incha'ye tuj kyq'ijlalile, ex mlay txi kynimane, maskelo at jun ma q'mante kyeye, chi tuj Tu'jil, chi Pablo.
42Tejtzun kyetz Pablo tuj ja te k'ulb'il kye xjal judiy, e kub'san qe txqantl xjal mya judiy kywitz tu'n kypontl kyuk'il tuj juntl q'ij te ojlab'l tu'n kyyolin ch'intl ti'j jlu.
43Ex tej kyetz pax xjal tuj ja te k'ulb'il, nimku xjal judiy e ok lpe' ti'j Pablo ex ti'j Bernabé kyuk'ix qeju otoq kyoksla kyley judiy ex nimal Dios qe. Oktzun ten Pablo ex Bernabé yolil kyuk'il, xi kyq'o'n kynab'l ex ax tu'n kyten tuj t-xtalb'il Dios.
44Tuj juntl q'ij te ojlab'l ok kychmon kyib' kykyaqil xjal tuj tnam tu'n kyb'inte tyol Dios, nik'xi junjun minti' pon.
45Tejtzun kylonte xjal judiy nim xjal otoq tz'ok kychmon kyib', tzaj tlo'ch kyk'u'j, ex e ok ten maqolte aju in tma'n Pablo, in kyma'n qa mya ax tok, ex in che yasun ti'j.
46Atzunte Pablo tuk'ix Bernabé e yolin minti' kyxob'il:
—Ax tok, che chi, tnejel ilxix ti'j tu'n t-xi qma'ne tyol Dios kyeye aqeye xjal judiy; ex ma tz'el kyik'une, ex kyk'i'ye kyk'ame aju chwinqlal te jumajx, kyja'tzun qo xe'le kyxol txqantl xjal mya judiy qe.
47Porke iktzun tten tzaj tma'n Qajaw qeye:
Aya ma kub' nq'o'ne te jun spik'un kye xjal kyuj txqantl nasyon, tu'ntzun t-xi tma'na tuj tkyaqil twitz tx'otx' aju kolb'il wu'ne, chi Qajaw, chi Pablo.
48Tejtzun kyb'inte txqantl xjal jlu, aqeju mya judiy, e jaw tzalaj ex e yolin ti'j qa b'a'n te Qajaw tyol; ex e okslan kykyaqil qeju sk'o'maj tu'n tten kychwinqlal te jumajx.
49Atzunju tyol Qajaw nne'l laq'e'toq tqanil tuj tkyaqil lugar te Pisidia.
50Ex qe xjal judiy e ok ten oksalte kyk'u'j qe xu'j nimal Dios ex at kyoklen, ax ikx qe kytijil xjal tuj tnam, ex e ok ten q'ojlel ti'j Pablo ex ti'j Bernabé, ex e ex kylajo'n tuj kytanmi.
51Atzunte Pablo tuk'ix Bernabé el kychto'n quq ti'j kyqan te jun yek'b'il kyi'j xjal qa mya b'a'n qe, ex e je'x tuj tnam Iconio.
52Atzun qe okslal nimxix in che tzalaj ex nojni tuj kyanmi tu'n Xewb'aj Xjan.
Who We AreWhat We EelieveWhat We Do
2025 by iamachristian.org,Inc All rights reserved.
