2 Samuel 16 - Mam Huehuetenango New Ortography

Tej tyolin David tuk'il Siba

1Matoq ch'in ku'x laq'e' David twi witz, tej tetz Siba aju tmajen Mefi-boset kanul ti'j. Q'i'n kab'e bur tok kysiy tu'n, ex q'i'n kab' syent pan tu'n, jun syent lob'j b'inchamaj ti'j twitz uva tzqij tuj piẍun tten, jun syent lob'j b'inchamaj ti'j twitz higo tzqij tuj piẍun tten, ex jun tz'u'm ta'l twitz uva iqan kyu'n.

2Atzunte rey xi tqanin te:

—¿Ti til jlu ma tzaj ti'na?

Atzunte Siba xi ttzaq'we'n:

—Qe bur lu atzun kyil, tu'n kyjax qeju ate' tuj tja rey chejil kyib'aj; qe pan ex qe lob'j atzun til, tu'n txi kywa'n qe soldad, ex ju ta'l twitz uva atzun til, tu'n t-xi kyk'a'n qeju che siktel tuj lugar minti' kynajb'il xjal tuj.

3—¿Jatum ta' Mefi-boset aju tal tchman qtzan tpatrona Saúl? Chi rey xi tqanin te.

Atzunte Siba xi ttzaq'we'n:

—Ma kyaj ten Mefi-boset tuj Jerusalén, ex ximan tu'n qa tu'n tok q'o'n te rey kye aj Israel ja'lo, tu'nju toktoq tchman te rey nej.

4—B'a'n, ya ja'lo teya tkyaqilju at te Mefi-boset, chi rey xi ttzaq'we'n.

—Kukxwit tzaj q'aq'an tk'u'ja wi'je Tat Rey, chi Siba xi ttzaq'we'n, ex kub' mok'e' twitz rey.

Ok ten Simei yasul ti'j David

5Tejtzun tpon rey David tuj jun tal tnam Bahurim tb'i, etz jun xinaq tiyjil Saúl kanul ti'j. Ate xjal lu Simei tb'i, aju tky'ajal Gera, ex kyja'toq ttzaj in xmayin ti'j David,

6ex in xo'ntoq ab'j ti'j ex kyi'j kykyaqil qe xjal at kyoklen ttxlaj; maske ate rey kwentin kyu'n kykyaqil xjal ex kyu'n qe xjal axix kyok kwentil te,

7ex ate Simei in yolintoq mya b'a'n ti'j ex in tma'ntoq:

—Texa tzalu aya b'inchal mya b'a'n ex b'yol xjal.

8Tu'n Qman ma kub' tcastiwoya ti'j tkyaqil mya b'a'n o tb'inchaya kyi'j qe tiyjil Saúl, tu'nju aya kyaj ten te rey te t-xel. Ya ja'lo ate Qman ma txi q'onte ju kawb'il te Absalón aju tky'ajala tu'n tok te rey, ex ma tzaj jun mya b'a'n ti'ja tu'nju tb'inchb'ena mya b'a'n, porke aya b'yol xjal, chi Simei.

9Atzunte Abisai aju tal Sarvia xi tma'n te rey:

—¿Tiqu'n nno'k ten xjal lu yolil mya b'a'n ti'ja Tat Rey? Ik tten xjal lu ik tza'n jun tx'yan kyimni. B'i'x ja'lo k'elel ntx'emine twi'.

10Atzunte rey xi ttzaq'we'n:

—A jlu minti' kyeye kyoklen ti'j, aqeye tal Sarvia. Qa in yolin xinaq lu mya b'a'n wi'je, alo Qman ma tzaj q'mante te. Ex tu'ntzun jlu alkye b'a'n tq'mante: ¿Tiqu'n in tb'incha'n xinaq lu ikju?

11Xi tma'ntl rey te Abisai ex kye kykyaqil qeju at kyoklen ttxlaj:

—Axpe jun nky'ajale nno'k tilil tu'n nkyime tu'n, pyortzunlo jun xinaq kyxol qe tiyjil Benjamín. E tten, ex e tyolin mya b'a'n wi'je ex alo Qman ma q'mante te.

12Mya yajku tzaj tke'yin Qman aju yajb'il weye, ex jaku tzaj tq'o'n tky'iwb'il wib'aje te t-xel ju mya b'a'n in q'manjtz wi'je ja'lo, chi David.

13Atzunte David kyuk'ix qe xinaq uk'in tu'n xi kylajo'ntl kyb'e; ikx te Simei kyja'toq tjax tk'u'j juntl witz taj jlajxi, ex ok ten juntl maj yolil mya b'a'n ti'j David ex tzaj t-xo'n ab'j ti'j, ex jaw tchitun tquqil tx'otx'.

14Tejtzun tpon rey kyuk'ix kykyaqil xjal ate' tuk'il ttzi nima Jordán, otoq che sikt wen ex axtzun e kub' ten ojlal.

Tej tokx Absalón tuj tnam Jerusalén

15Okxtzun Absalón tuj Jerusalén kyuk'ix kykyaqil xinaq aj Israel ex tuk'ix Ahitofel.

16Atzunte Husai aju aj Arquitas ex tamiw David, xi' kanul ti'j Absalón ex xi tma'n te: B'a'nwit tz'el tq'ija Tat Rey, b'a'nwit tz'el tq'ija.

17Atzunte Absalón xi tqanin te:

—¿Maj atzun jun b'a'n in tb'inchana te tamiwoya ikju? ¿Tiqu'n minti' xi'ya tuk'il tamiwoya?

18—Minti' ẍinxe ex il ti'j tu'n ntene tuk'il ju rey ma jaw sk'o'n tu'n Qman ex kyu'n kykyaqil xjal aj Israel, chi Husai.

19Ax ikx qa ma chin ajb'ene te juntl, ex kuchiwt texju tky'ajal wamiwoye tu'n wajb'ene. Kyja'tzun aqine chin ajb'ele teya Tat Rey ik tza'n ẍin ajb'ene te tmana.

20Te tib'ajxi xi tqanin Absalón te Ahitofel:

—¿Chi tok kyeye kyu'n, alkye kb'antel qu'n?

21Atzunte Ahitofel xi ttzaq'we'n:

—Tkub' tana kyuk'il qe txqantl t-xu'jil tmana, aqeju ma che kyaj tq'o'n te kwentil tja. Kyja'tzun k'elel kynik' kykyaqil aj Israel ti'j qa ma tb'inchaya jun ik'b'ilxix twitz tmana, ex jaku tz'ok mastl kyipun kykyaqil qeju ate' tuk'ila.

22Jawtzun kyb'incha'n jun xb'alun ja max twi ja tu'n tajb'en te Absalón, ex atzun kub' tan Absalón kyuk'il txqantl t-xu'jil tman; kywitz kykyaqil aj Israel b'ant jlu tu'n.

23Tuj tq'ijlalil lu ok t-xi kyqanin jun consej te Ahitofel junx ta' ik tza'n te Dios in xi kyqanin, porke aju tconsej Ahitofel puro niman tu'n David ex tu'n Absalón.