Ezequiel 40 - Mam Huehuetenango New Ortography

Aju tzaj yek'un ti'j tja Dios kb'antel

1Tuj tlajin q'ij te tnejel xjaw te ab'q'i, o nna'ye tipumal Qman wib'aje, ex inx q'i'ne tu'n tuj kytx'otx' aj Israel. Ch'ixtoq tel 25 ab'q'i tej qxilen q'i'ne pres tuj Babilonia, ex otoq b'ant kyajlaj ab'q'i tej tkub'len ti'j tnam Jerusalén.

2Mer ik tza'n tuj witzik' inx q'i'ne tu'n Qman tuj kytx'otx' aj Israel, ex in kub' q'o'ne tu'n twi' jun witz ma'xix twa'l; twi'tzun ju witz lu wile txqan ja mer ik tza'n jun nintz tnam tuj tumlal tnayaj q'ij.

3Inx q'i'ne tu'n Qman ma chixin, ex o wile jun xinaq in qoptz'aj ti'j ik tza'n ti'j q'an k'uxb'il, wa'ltoq ttzi tlamel tnam, q'i'ntoq jun ky'jaj tu'n b'animaj ti'j lino, tuk'ix jun ajlaj in ajb'en te echb'il.

4Ex tzaj tma'n ju xinaq lu weye kyja': Aya xjal, ke'yintza ex b'intza; q'o'nka kwent ti'j ju kxel nyek'une teya, ex atzun til ma tzul q'i'na tzalu tu'n t-xi nyek'une teya. Ex kxel tma'na kye aj Israel tkyaqilju ok tila'ya.

Aju ttzi ja tkub' tuj tjawitz q'ij

5Ti'jtze tja Dios attoq jun muro tok ti'jele. Aju ajlaj q'i'ntoq tu'nju xinaq attoq ox metro tqan. Xitzun techan ju muro, ex attoq ox metro twitz ex ox metro twa'l.

6Te tib'ajxi, xi' ttzi ja aju xi'yni twitz tuj tjawitz q'ij, jax kywi' qe grad ex xi techan aju ttzi tmarkil tlamel, ex attoq ox metro twitz.

7Aqeju tal cuart ate'k ttxlaj junjun pak' ttzi ja, teyle junjun attoq ox metro tnuqb'il ex ox metro twitz, ex aju t-xol jun tal cuart tuk'il juntl tal cuart attoq kab'e metro tuk' mey. Ex attoq ox metro twitz aju ttzi ja te tujxi jatum tu'n qokx tuj juntl tal cuart, aju xi'yni twitz tumlal tja Dios.

8-9Xi techan xinaq ju cuart tokx tujxi tumlal twitz tja Dios, ex aju cuart attoq kyaje metro twitz. Attoq kab'e tmarkil ja te jun metro tpimil junjun.

10Kykub'sa'ntoq ox tal cuart tuj junjun pak' ttzi ja aju tkub' tumlal tjawitz q'ij, ex kykyaqil junx ta' echb'in kye, ax ikx junx ta' echb'in kye qe tqan ja kykub'sa'n ttxlaj junjun pak'.

11Ex xi techan xinaq ttzi ja, ex attoq jwe' metro twitz, atzunju tnuqb'il attoq qaq metro tuk'il mey.

12Twitz junjun tal cuart attoq jun tal muro tkub' te mey metro twa'l. Teyle junjun tal ja attoq ox metro twitz ex ox metro tnuqb'il.

13Ex xi techan tkyaqilju twitz ja, xi'x qe' tu'n twi muro te jun tal cuart ex pon b'aj tu'n twi muro te juntl tal cuart tuj juntl pak', ex attoq kab'laj metro tuk' mey.

14Xi techan twitz ju tal cuart tokx tujxi; tu'n tkyaqil attoq laj metro twitz. Aju tal cuart lu tkub' twitz ttxa'n tpe'n tja Dios.

15Aju tnuqb'il tkyaqil, xi'ynix qe' ti'jxi sawán ex tu'n tokpun b'aj max ttzi ju tal cuart te tujxi, attoq 25 metro.

16Attoq kyventaniyil qe tal cuart. Ax ikx qe pared tkub' kyxol tal cuart, ax ikx ju cuart tokx max tujxi attoq tventaniyil. Attoq tventaniyil tkyaqil tujile. Ex kyi'j qe pared toktoq tilb'ilal tqan xa'j.

Aju tnejel ttxa'n pe'n tok ti'j ox pak' tja Dios

17Te tib'ajxi inx q'ine tu'n xinaq tuj tnejel ttxa'n pe'n tok ti'j ox pak' tja Dios. Ex tuj ttxa'n pe'n lu lo'tzintoq ab'j twitz tx'otx' ttxa'nile, ex attoq 30 tal cuart tkub' ttxa'nile.

18Aju ttxa'n pe'n lu, aju lo'tzintoq ab'j twitz tx'otx' ttxa'nile, mas kub'ni ta', ex lo'tzintoq ab'j twitz tx'otx' ttxa'nile ttxa'n pe'n kywitz qe tal cuart, ex junxtoq ta' echb'in twitz tuk'il kynuqb'il qe sawán.

19Xi techan xinaq twitz tnejel ttxa'n pe'n, xi'x qe' tu'n twitz ju tal ja te tujxi ex pon b'aj ttzi ja jatum tu'n qokx tuj tkab'in ttxa'n pe'n, ex attoq 25 metro t-xol.

Aju ttzi ja tkub' tuj tumlal tb'anq'ab' q'ij

20Ax ikx attoq jun ttzi ja kyja' xi'yni twitz tuj tumlal tb'anq'ab' q'ij, tkub' twitz tnejel ttxa'n pe'n. Xi techan xinaq tnuqb'il ex tuj t-ẍkyin.

21Ax ikx attoq ox tal cuart tkub' ttxlaj junjun pak' ttzi ja lu, ex at qe pared kykub' kyxol tal cuart, ex juntl cuart tokx tujxi, ikpunx qe ik tza'n qeju ate'k ttzi ja tkub' tuj tjawitz q'ij, attoq 25 metro tnuqb'il ex kab'laj tuk' mey tuj t-ẍkyin.

22Aju tal cuart tokx tujxi, ex qe tventaniyil ex qe tilb'ilal tqan xa'j, ikpunx qe ik tza'nx qeju ate'k ttzi ja tkub' tuj tjawitz q'ij. Ax ikx attoq wuq grad tu'n qjax b'et tib'aj, ex aju tal cuart mas ma' max tujxi ta'.

23Tza'nx ju ttzi ja tkub' tuj tjawitz q'ij, ax ikx aju ttzi ja tkub' tuj tumlal tb'anq'ab' q'ij twitz ju tnejel ttxa'n pe'n, attoq juntl ttzi ja in xi' tu'n tokpun tuj ju tkab'in ttxa'n pe'n. Xi techan xinaq kyxol, xi qe' ti'j jun ttzi ja tu'n tpon ti'j juntl ttzi ja ex attoq 50 metro t-xol.

Aju ttzi ja tkub' tuj tumlal tnayaj q'ij

24Inx q'i'ne tu'n xinaq jatum ta' ttzi ja tkub' tuj tumlal tnayaj q'ij, ex xi techan qe pared tkub' kyxol qe tal cuart tuk'ix tal cuart mas ma' tokx max tujxi, ex aju echb'in kye junx ta' ik tza'n qe txqantl.

25Aju ja jatum nno'kx b'e tu'n tokpun tujxi tnejel ttxa'n pe'n tuk'ix ju tal cuart mas ma' tokx max tujxi, attoq tventaniyil tkyaqil ti'jele, ik tza'nx qe txqantl. Aju echb'in te tkyaqil, attoq 25 metro tnuqb'il ex kab'laj metro tuk' mey tuj t-ẍkyin.

26Ax ikx attoq wuq grad tu'n qjax b'et tu'n qokx tuj ja, ex aju tal cuart mas ma' tokx max tujxi. Ax ikx qe pared tkub' kyxol qe tal cuart toktoq tilb'ilal tqan xa'j kyi'j, junjun tuj junjun pak' ttxlaj.

27Aju tkab'in ttxa'n pe'n tokx tujxi ax ikx attoq jun tlamel kyja' xi'yni twitz tuj tumlal tnayaj q'ij. Xi techan xinaq nik'pun kyxol kab'e tlamel, aqeju kykub' tuj tumlal tnayaj q'ij, ex attoq 50 metro kyxol.

Aju tkab'in ttxa'n pe'n: aju ttzi ja tkub' tuj tumlal tnayaj q'ij

28Inx q'i'ne tu'n xinaq jatum ta' ttzi ja tuj tumlal tnayaj q'ij tu'n wokxe tuj tkab'in ttxa'n pe'n. Xi techan ju ttzi ja lu, ex ax echb'in te ik tza'nx echb'in kye qe txqantl ttzi ja.

29Qe tal cuart ex qe pared tkub' kyxol qe tal cuart, tuk'ix tal cuart mas ma', junx ta' echb'in kye ik tza'n qe txqantl. Aju ja jatum nno'kx b'e tuj tu'n tokpun tujxi, ex aju tal cuart mas ma', attoq tventaniyil tkyaqil ti'jele, ex aju echb'in te tu'n tkyaqil, attoq 25 metro tnuqb'il ex kab'laj metro tuk' mey tuj t-ẍkyin.

30Qe twitz ja, kab'laj var tuk' mey kynuqb'il ex kab' var tuk' mey kywitz.

31Aju tal cuart mas ma' tkub' jatum nno'kx b'e tu'n tokpun tuj tkab'in ttxa'n pe'n. Ex toktoq tilb'ilal tqan xa'j kyi'j qe pared tkub' kyxol qe tal cuart. Ex attoq wajxaq grad tu'n qjax b'et tu'n qjapun ttzi tlamel.

Aju tkab'in ttxa'n pe'n ex aju ttzi ja tkub' tuj tjawitz q'ij

32Te tib'ajxi inx q'i'ne tu'n xinaq tuj tkab'in ttxa'n pe'n jatum ta' ttzi ja tuj tumlal tjawitz q'ij, ex xi techan ttzi ja jatum tu'n qokx tuj tkab'in ttxa'n pe'n, ex aju echb'in te junx ta' ik tza'n qe txqantl.

33Aqeju tal cuart ex qe pared kykub' kyxol qe tal cuart ex juntl tal cuart mas ma', junx ta' echb'in kye ik tza'n qe txqantl. Aju ja jatum nno'kx b'e tu'n tokpun tujxi tkab'in ttxa'n pe'n tuk'ix tal cuart mas ma', attoq tventaniyil tkyaqil ti'jele, ex aju echb'in te tu'n tkyaqil, 25 metro tnuqb'il ex kab'laj metro tuk' mey tuj t-ẍkyin.

34Aju tal cuart mas ma' tkub' jatum nno'kx b'e tu'n tokpun tuj tkab'in ttxa'n pe'n. Ex qe pared kykub' kyxol qe tal cuart toktoq qe tilb'ilal tqan xa'j ti'j junjun pak'. Ex attoq wajxaq grad tu'n qjax b'et tu'n qjapun ttzi tlamel.

Aju tkab'in ttxa'n pe'n ex aju ttzi ja tkub' tuj tumlal tb'anq'ab' q'ij

35Ex inx q'i'ne tu'n xinaq jatum tkub'sa'n ttzi ja tuj tumlal tb'anq'ab' q'ij, xi techan ju ttzi ja jatum tu'n qokx tuj tkab'in ttxa'n pe'n, ex aju echb'in te junx ta' ik tza'nx qe txqantl;

36ax ikx attoq qe tal cuart, kyuk'ix qe pared kykub' kyxol qe tal cuart, ex juntl tal cuart mas ma', ex attoq kyventaniyil tkyaqil ti'jele. Aju ja jatum nno'kx b'e tu'n tokpun tuj tkab'in ttxa'n pe'n, attoq 25 metro tnuqb'il ex kab'laj metro tuk' mey tuj t-ẍkyin.

37Aju tal cuart mas ma' tkub' tnejel jatum nno'kx b'e tu'n tokpun tuj tkab'in ttxa'n pe'n. Ex qe pared kykub' kyxol qe tal cuart toktoq tilb'ilal tqan xa'j ti'j junjun pak'. Attoq wajxaq grad tu'n qjax b'et tu'n qjapun ttzi tlamel.

Qe ja junx kykub' tuk'il ttzi ja tuj tumlal tb'anq'ab' q'ij

38Ax ikx attoq jun cuart tkub'sa'ntoq twitz tal cuart mas ma' jatum nno'kx b'e tu'n tokpun tuj tkab'in ttxa'n pe'n. Tujtzun cuart lu in b'aj tx'jet kyi'j qe alumaj tu'n kyxi q'ot te oyaj patun in kub'.

39Tuj ju cuart mas ma' attoq kyaje mes, kab'e junjun pak ttzi ja, kyib'ajtzun qe mes lu in che kub' b'yo'n qe alumaj tu'n kyxi q'ot te oyaj patun in kub', ex qa tu'n kyxi q'ot te chojb'il tu'n tlaj kyil xjal ex tu'n tlaj kypaltil.

40Ax ikx at kyaje mes kykub' twitz tal cuart mas ma', kab'e junjun pak' ttzi ja tkub' tuj tumlal tb'anq'ab' q'ij.

41Kyja'tzun kyaje mes at tujxi ex kyaje mes at ti'jxi ttzi ja: wajxaq mes tu'n tkyaqil. Kyib'ajtzun qe mes lu in che kub' b'yo'ntoq qe alumaj.

42Qe kyaje mes in che ajb'entoq tu'n kykub' patun qe alumaj kyib'aj, b'animaj qe ti'j ab'j xpe'limaj; ex aju echb'in kye 75 centímetro kynuqb'il ex 75 centímetro kywitz, ex 50 centímetro kywa'l, ex kyib'ajtzun qe jlu in che kub' q'o'n qe makb'il in che ajb'en tu'n kykub' b'yet qe alumaj te oyaj patun in kub'.

43Tx'apo'n qe xok twitzile cuart te tujxi te qaq centímetro kyqan. Kyib'ajtzun qe mes lu in kub' q'o'n kychib'jal qe alumaj in che ajb'en te oyaj.

44Tuj ju tkab'in ttxa'n pe'n attoq kab'e tal cuart, jun, junx tkub' tuk'il ju ttzi ja at tujxi aju tkub' jawni, atzun juntl, junx tkub' tuk'il ju ttzi ja at tujxi aju tkub' kub'ni, ex atzunju cuart kyja' xi'yni twitz jawni.

45Tzaj tma'n xinaq weye: Aju cuart kyja' xi'yni twitz tuj tumlal tnayaj q'ij, atzun cuart kye qe pal in che ajb'en tuj tja Dios,

46ex atzun ju cuart kyja' xi'yni twitz tuj tumlal tb'anq'ab' q'ij, atzun cuart kye qe pal in che ajb'en tu'n kykwentin ti'j altar. Aqe jlu tiyjil Sadoc, ex o'kxku aqe aj Leví jaku che pon laq'e' twitz Qman tu'n kyajb'en te.

Aju tkab'in ttxa'n pe'n ex aju tja Dios

47Te tib'ajxi xi techan xinaq tkab'in ttxa'n pe'n, a jlu cuadrad ttentoq ex attoq 50 metro junjun pak' ttxlaj. Aju altar tkub'toq twitz tja Dios.

48Inx q'i'ne tu'n xinaq tuj tal cuart tkub' ttzi tja Dios, ex xi techan kypimil qe pared junjun pak' ttzi' ja, teyle junjun attoq kab'e metro tuk'il mey kypimil. Attoq wuq metro twitz tlamel, ex qe pared jatum tok tmarkil tlamel attoq jun metro tuk'il mey tpimil junjun.

49Aju tal cuart tkub' twitz tja Dios attoq laj metro tnuqb'il ex qaq metro twitz, ex attoq laj grad tu'n tjax qb'etin tu'n qjapun ttzi' tal cuart lu. Ex attoq kab'e tqan ja tkub' twitz tja Dios; jun tkub' tuj jun pak', ex juntl tkub' tuj juntl pak'.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help