Isaías 59 - Mam Huehuetenango New Ortography

Kub' kycastiw aj Israel tu'n tlaj il o kyb'incha

1Aju tipumal Qman minti' ma tz'ajtz ti'j, atx tipumal tu'n kyklete tu'n; minti' ma tz'ok te mib'an b'in, b'a'n te Qman b'in.

2Ex tu'nju mya b'a'n o kyb'inchaye o tz'el tpa'n tib' Dios kyi'je; tu'nju il o kyb'inchaye ma tz'ok tmaqsi'n Dios twitz; tu'ntzun jlu minti' in che tzaj b'i'ne tu'n.

3Tz'il ti'j kyq'ab'e tu'n kychk'el xjal kub' kyb'yo'ne, tz'il kyi'j qe tal kyq'ab'e tu'n nimku mya b'a'n in b'ant kyu'ne; in kyma'ne nik'aj yol tu'n kytzi'ye, ax ikx in kyma'ne nimku mya b'a'n.

4Ok kyxi'ye tuj jusgad q'malte til juntl, minti' in che yoline axix tok, mi a'l jun in xtisin tuj tumelxix. Mas nno'k qe' kyk'u'je ti'j ju nik'aj yol ex kyi'j qe yol mya ax tok. In kub' kyximane mya b'a'n tuj kyanmiye ex axtzunju mya b'a'n in kub' kyb'incha'ne.

5Aju kyximb'etze mya b'a'n ik tten ik tza'n tjos q'anti'; qa ma txi tchyo'n xjal qe jos lu kymel, ex qa at jun ma kub' b'etz'ante kye, che eletz qe tal lob'aj kyuj, aqeju in che kyim xjal kyu'n. Mer ik tza'n in che chmone ti'j tchemaj xin;

6ex kyi'j qe tchemaj xin lu mlay che b'ant xb'alun kyi'j; mi a'l jun jaku tz'ok xb'aluminte aju in che chmone ti'j. Kykyaqil kyb'inchb'ene puro mya b'a'n ex o'kx in b'ant kyu'ne tu'n tkub' kyb'yo'ne jun xjal;

7in che ajb'en kyqane tu'n kyxi ojqelane tu'n kyb'inchanteye mya b'a'n ex nno'k tilil kyu'ne tu'n tkub' kyb'yo'ne jun xjal minti' til. O'kx tok kyximb'etze tu'n kyb'inchanteye mya b'a'n ex jatum in che ik' b'ete in kub' xitj tkyaqil kyu'ne ex in che naj xjal kyu'ne.

8Minti' ch'in kymojb'ab'l kyib'e kyuk'il txqantl, tkyaqil aju in b'ant kyu'ne mya tuj tumel. Aju b'e q'i'n kyu'ne ẍo'k ti'j; qe xjal in che b'et tuj b'e lu minti' ch'in in che ten tuj txub'txaj.

9Kyja'tzun, aju kolb'il qe ma tz'el laq'e' qi'j ex aju tzoqpib'l minti' nnu'l laq'e' qi'j; in qo ayontoq ti'j spik'un, ex o'kx qlolj at, in qo ayontoq ti'j spik'un ex tuj qxopin in qo b'et.

10In qo b'et noq xmakan nno'k qu'n ik tza'n qe moẍ noq xmakan in che b'et twitz ja, mer ik tza'n minti' tb'aq' qwitz; in qo jaw tolj te chilkuq'ij, mer ik tza'n qonik'an in qo b'et, b'a'n ta' qximlal, ex mer ik tza'n kyimni qo'.

11Qkyaqil in qo wu'yin ik tza'n qe txkup oso, in qo q'ututun, ik tza'n qe paloma; in qo ayon ti'j kolb'il qe, ex minti' nnu'l; in qo ayon ti'j tzoqpib'l qe, ex najchaq ta'.

12Qman Dios, nimxix mya b'a'n ma qb'inchaye twitza ex ax qile in q'mante aj il qo'ye; b'a'n qu'ne alkye qe qile ex ojtzqi'n qu'ne aqeju mya b'a'n o qb'inchaye.

13Qman, ma qo oke mib'an qo nimane ex ma tz'el qpa'n qib'e ti'ja, minti' o qajb'eye tu'n qok lpe'ye ti'ja aya Qdiose, o qo yoline ti'j tu'n tkub' qyajla'ne qe xjal ex ma tz'el qpa'n qib'e ti'ja, b'aj qnak'u'ne ti'j tu'n qsb'une kyi'j txqantl.

14Ya minti' in xi b'incha'n kyi'j xjal tuj jusgad, minti' in kyb'incha'n aju tz'aqlxix, ya minti'tl in che yolin xjal ti'j ju yol axix tok; ok kyxi' xtisil minti' in kyq'o'n amb'il tu'n tb'ant ti'j jun ti'xti tuj tumelxix.

15Ma kub' naj aju yol axix tok, ex alkye nne'l tpa'n tib' ti'j mya b'a'n, nne'l elq'a'n aju at te. Ma til Qman jlu ex mya b'a'n ma tz'ela tuj twitz, tu'nju minti' in xi b'incha'n kyi'j xjal tuj tumelxix.

16Jaw lab'in Qman tej tke'yinte mi a'l jun tu'n tonin kyi'j qeju in che yajlanjtz, kyja'tzun e klet tu'nx tipumal ex tu'nju tz'aqlxixte, ex axte o kamb'an.

17Tzaj tyek'un qa tz'aqlxix te, ik tten jlu ik tza'n jun chikyet k'uxb'il nno'k tq'o'n soldad, tzaj tq'o'n ju kolb'il, ik tten jlu ik tza'n jun pasb'il k'uxb'il, ex o xelin tu'n aju mya b'a'n o kyb'incha xjal, mer ik tza'n jun soldad nno'k tq'o'n t-xb'alun te q'ojb'il, ex tzaj nim tq'oj.

18Kxel tq'o'n Qman chojb'il te teyle junjun ik tza'nx tb'inchb'en, kb'el tq'o'n kycastiw qe aj q'oj ti'j. Kxel tq'o'n chojb'il kye qeju in che ik'un ti'j ik tza'nx kyb'inchb'en, kyuk'ix qe tnam ate' ttzi'yile mar.

19Kykyaqil xjal kxel kyniman Qman, ktzajelx qe' tuj tjawitz q'ij ex tu'n tpon b'aj tuj telex q'ij, kxel kyniman Qman ok tok kyke'yin tajwalil, porke tzul te Qman tuk'il tipumal ik tza'n jun nima otoq ch'iy, yukun tu'n jun kyq'iq' nimxix tipun.

20Tzul tu'n ttzoqpet tnam Sión kyuk'ix qe tiyjil Jacob, aqeju k'ajetz ti'j kyanmi ti'j kyb'inchb'en mya b'a'n. Ate Qman in q'mante jlu.

21In tma'n Qman kyja': Kb'antel ti'j jun yol wu'ne kyuk'ile, aju Nxewe ex qe xnaq'tzb'il o txi nq'o'ne kyeye, mlay che el wi'ne kyeye ex mi kye qe kyiyjile te jumajx.