Levítico 4 - Mam Huehuetenango New Ortography

Qe chojb'il ti'j il

1Tzaj yolin Qman tuk'il Moisés ex tma:

2Q'manxa jlu kye aj Israel: Qa at jun xjal ma b'inchan il, ex qa ma tzik' kyib'aj qe nmandamyente tu'nju minti' b'a'n tu'n qa mya b'a'n, ex qa otoq tb'incha jun ti'xti q'ma'maj tu'n mi'n tb'inchante, atzun jlu kb'antel tu'n:

3Qa a tnejel pal ma b'inchan il, ex tu'n jlu in tzaj ti'n mya b'a'n kyib'aj tnam xjal, il ti'j tu'n ttzaj tq'o'n weye jun tal tor minti' tpaltil, te chojb'il il otoq tb'incha.

4Ktzajel ti'n nwitze ttzi ja xb'alun te mojb'ab'l tib'il; atzun kb'el tq'o'n tq'ab' tib'aj twi' tal tor, ex k'okex tqesin tjaq' tqul alumaj nwitze.

5Te tib'ajxi, axju tnejel pal kxel q'inte ch'in tchk'el tal tor tu'n tpon ti'n tuj ja xb'alun te mojb'ab'l tib'il;

6atzun kb'elex tmu'n twi' tal tq'ab' tuj chik' ex kb'el ttx'ito'n wuq maj nwitze tumlal xb'alun tkub' tuj tmij njaye.

7Ax ikx k'okel t-su'n ch'in chik' kyi'j qe tkach altar te patb'il storak at tk'ok'jal, aju tkub'sa'n nwitze tuj ja xb'alun te mojb'ab'l tib'il, ex tkyaqiltzunju chik' kyjel ten kb'elex tqo'n t-xe tqan altar te patb'il chojb'il, aju tkub'sa'n twitz ja xb'alun te mojb'ab'l tib'il.

8K'elel ti'n ti'j tal tor te chojb'il il tkyaqil sebo toksa'n kyi'j qe tuj tk'u'j,

9kyuk'ix qe kab'e tchenaq', tuk'ix sebo toksa'n ttzal ti'j ex sebo toksa'n ti'j ttx'otx'; a jlu k'elel ti'n junx kyuk'il qe tchenaq',

10ik tza'nx nne'l q'it ti'j tal tor, in xi q'ot te oyaj te mojb'ab'l tib'il wuk'ile. Ex ax te pal kb'el patunte tib'aj altar te patb'il chojb'il.

11Atzunju ttz'umal tal tor tuk'ix tkyaqil tchib'jal, tuk'ix twi', kyuk'ix qe tqan, kyuk'ix qe tuj tk'u'j ex ttxa',

12ex qa tkyaqilku t-ximlal tal tor, k'elex ti'n tuj jun lugar saq ti'jxi campament, tuj lugar jatum nne'x qet tza'j, ex tib'ajtzun tza'j lu, kb'el tq'o'n si' ex k'okel tq'o'n tq'aq'al.

13Qatzun kykyaqil aj Israel ma che b'inchan il ex qa ma che ik' kyib'aj qe nmandamyente, tu'nju minti' b'a'n kyu'n qa mya b'a'n aju otoq kyb'incha, ex qa ma kyb'incha jun ti'xti q'ma'maj tu'n mi'n kyb'inchante, ex qa mi jun ma tz'el tnik' ti'j qa otoq che b'inchan il; maske ikju, at kyil ti'j.

14Oktzun tel kynik' ti'j il otoq kyb'incha, il ti'j tu'n t-xi kyq'o'n jun tal tor te chojb'il kyil. Kxel kyi'n twitz ja xb'alun te mojb'ab'l tib'il,

15atzun qe kytijil xjal te tnam kb'el kyq'o'n kyq'ab' tib'aj twi' tal tor nwitze, ex axtzun k'okex kyqesin tjaq' tqul alumaj.

16Atzunte tnejel pal kxel ti'n ch'in tchk'el tal tor tuj ja xb'alun te mojb'ab'l tib'il,

17kb'elex tmu'n tal tq'ab' tuj chik' ex kxel ttx'ito'n wuq maj nwitze tumlal xb'alun tkub' tuj tmij njaye.

18Ax ikx k'okel t-su'n ch'in chik' kyi'j qe tkach altar tkub'sa'n nwitze tuj ja xb'alun te mojb'ab'l tib'il. Ex tkyaqil chik' kyjel ten, kb'elex tqo'n t-xe tqan altar te patb'il chojb'il, aju tkub'sa'n twitz ja xb'alun te mojb'ab'l tib'il.

19Ax ikx k'elel ti'n tkyaqil t-sebyil tal tor, ex kb'el tpatun tib'aj altar.

20Ax kb'antel ti'j tal tor lu ik tza'n in b'ant ti'j tal tor in xi q'ot te chojb'il il; kyja'tzun tten kchjetel kyil xjal tu'n pal, ex knajsetel kyil.

21K'elex ti'n tal tor ti'jxi campament ex kb'el tpatun, ikx ktemb'il tu'n ik tza'nx otoq tb'incha ti'j tnejel tal tor, porke chojb'il kyil tnam xjal alumaj lu.

22Qatzun jun nejenel ma b'inchan il, ex qa ma tzik' kyib'aj qe nmandamyente, aqine Tdios, tu'nju minti' b'a'n tu'n qa mya b'a'n, ex otoq tb'incha jun ti'xti q'ma'maj tu'n mi'n tb'inchante, at til ti'j jlu.

23Oktzun tel tnik' ti'j aju il otoq tb'incha, il ti'j tu'n t-xi ti'n jun tman chip minti' tpaltil te chojb'il til.

24Kb'el tq'o'n tq'ab' tib'aj twi' tman chip, ex k'okex tqesin tjaq' tqul alumaj nwitze tuj lugar jatum in che kub' b'yo'n qe alumaj patun in che kub', porke chojb'il il jlu.

25Atzunte pal ktzajel ti'n tu'n twi' tal tq'ab' ch'in tchk'el alumaj otoq txi q'ot te chojb'il il, ex k'okel t-su'n kyi'j qe tkach altar te patb'il chojb'il, ex tkyaqilju chik' kjel ten kb'elex tqo'n t-xe tqan altar,

26ex kb'el tpatun pal tkyaqil t-sebyil alumaj tib'aj altar, ik tza'n in tenb'a t-sebyil alumaj in xi q'ot te chojb'il te mojb'ab'l tib'il wuk'ile. Kyja'tzun kchjetel til nejenel tu'n pal, ex knajseteltzun til.

27Qatzun noq elajx jun xjal ma b'inchan il, ex qa ma tzik' kyib'aj qe nmandamyente tu'nju minti' b'a'n tu'n qa otoq tb'incha jun ti'xti q'ma'maj tu'n mi'n tb'inchante, ax at til ti'j.

28Oktzun tel tnik' ti'j il otoq tb'incha, il ti'j tu'n ttzaj ti'n jun ttxu chip minti' tpaltil te chojb'il il otoq tb'incha.

29Kb'eltzun tq'o'n tq'ab' tib'aj twi' ttxu chip, aju kxel tq'o'n te chojb'il til, ex k'okex tqesin tjaq' tqul alumaj tuj lugar jatum in kub' patit chojb'il.

30Atzunte pal ktzajel ti'n ch'in chik' tu'n twi' tal tq'ab' ex k'okel t-su'n kyi'j qe tkach altar te patb'il chojb'il, ex tkyaqil chik' kjel ten kb'elex tqo'n t-xe tqan altar.

31Ax ikx k'elel ti'n tkyaqil t-sebyil, ik tza'nx nne'l q'it ti'j alumaj in xi q'ot te chojb'il te mojb'ab'l tib'il wuk'ile, ex kb'el tpatun tib'aj altar te jun oyaj at tk'ok'jal in chin tzalaje ti'j. Kyja'tzun kchjetel til xjal tu'n pal, ex knajseteltzun til.

32Qatzun jun ẍne'l ma tzaj ti'n xjal te chojb'il til, il ti'j tu'n ttzaj ti'n jun ttxu ẍne'l minti' tpaltil.

33Kb'el tq'o'n tq'ab' tib'aj twi' ttxu ẍne'l, ex k'okex tqesin tjaq' tqul alumaj te chojb'il il, tuj lugar jatum in che kub' b'yo'n qe alumaj patun in che kub'.

34Atzunte pal ktzajel ti'n tu'n twi' tal tq'ab' ch'in tchk'el alumaj otoq txi q'ot te chojb'il il, ex k'okel t-su'n kyi'j qe tkach altar te patb'il chojb'il, ex tkyaqil chik' kjel ten kb'elex tqo'n t-xe' tqan altar,

35ex k'elel ti'n tkyaqil t-sebyil, ik tza'nx nne'l q'it ti'j tal tman ẍne'l in xi q'ot te jun chojb'il te mojb'ab'l tib'il wuk'ile, ex kb'el tpatun t-sebyil tib'aj altar, junx kyuk'il qe oyaj patun in che kub' nwitze. Kyja'tzun kchjetel til xjal tu'n pal, ex knajseteltzun til.