1Tej tul meltz'aj Saúl t-xilenxi tkolin tu'n tok lpe' kyi'j aj Filisteo tu'n tkub' kyi'j tu'n, pon tqanil tuk'il qa atzun ta'toq David tuj tzqij tx'otx' En-gadi.
2Jawtzun t-sk'o'n Saúl ox mil xinaq kyxol aj Israel ex xi' jyolte David, atzun e je'x qe t-soldad kywi' qe nmaq pik jatum ate' qe chip te tjaq' k'ul.
3Tuj b'e q'i'ntoq tu'n Saúl lu jun tpe'n ẍne'l tkub', ex niqayin ttxlaj attoq jun toy' pik jatum tewan tib' David kyuk'ix qe xinaq ate' tuk'il. Okx Saúl tuj toy' pik lu tu'n ttxa'n.
4Xitzun kyma'n qe xinaq te David, aqeju ate'toq tuk'il:
—Matzun ma japun ju yol tzaj tma'n Qman teya chi kyja': Kxel nq'o'ne aj q'oj ti'ja tuj tq'ab'a, b'inchama noq alkye taja tu'n tb'ant ti'j, chi Qman, che chi.
Jawtzun we' David ex cheb'axix el tqesin jun piẍ ttxa'n t-ẍjo'w Saúl,
5ex tej tb'ant jlu tu'n, tzaj tb'is tu'nju otoq tz'el tqesin jun piẍ ttxa'n t-ẍjo'w Saúl,
6ex xi tma'n kye qe xinaq ate' tuk'il:
—Miwt taq' Qman amb'il weye tu'n tok nq'o'ne nq'ab'e ti'j npatrone aju rey, tu'nju rey te, ex ax Qman o jaw sk'onte te tu'n tok te rey, chi David.
7Kyja'tzun e mayet qe xinaq tu'n David, aqeju ate'toq tuk'il, ex minti' xi tq'o'n amb'il kye tu'n kyok tzoqpaj ti'j Saúl. Etztzun Saúl tuj toy' pik ex xi ti'ntl tb'e.
8Ex tzaj lpe' David ti'j ex xi sch'in ti'j kyja':
—Tat Rey, Tat Rey.
Ajtztzun tke'yin Saúl ti'jxi, atzunte David kub' ẍmeje' ex pon takl tib'aj twitz max twitz tx'otx' te jun techal te nimb'il,
9ex tma:
—Aya Tat Rey ¿tiqu'n in xi tnimana kyyol xjal, aqeju in che q'mante teya qa in chin jyone tumel tu'n tb'ant jun mya b'a'n ti'ja wu'ne?
10Ex aya Tat Rey matzun tila tu'n twitza, maske ate Qman xkub' q'onte teya tuj nq'ab'e tuj toy' pik, ex minti' xwajb'eye tu'n tkub' nb'yo'ne, noq o'kx kukx ma kyaj anq'ina wu'ne ex nchiye tuj nximb'etze: Mlay tz'ok nq'o'ne nq'ab'e ti'j, tu'nju reyte, ex tu'n Qman jaw t-sk'o'n.
11Aya Tat Rey, ke'yintza aju q'i'n tuj nq'ab'e, jun piẍ ttxa'n t-ẍjo'wa ma tz'el nqesine, ex tiltzun cabalxwitlo xkub'a wu'ne. Tu'ntzun jlu jaku tz'el tnik'a ti'j, misikyer ch'in in chin ximane tu'n nb'inchanteye jun mya b'a'n ti'ja, minti' ma jaw wi'n wib'e tu'n nq'ojine ti'ja, ex minti' wile ma nb'inchaye twitza; atzun teya, Tat Rey, in jyo'na wi'je tu'n nkub' tb'yo'na.
12Awt Qman txi b'inchante qi'j qkab'il ex awt Qman q'onte t-xel teya, Tat Rey, ti'j ju ma tb'inchaya wi'je, atzun weye mlay tz'ok nq'o'ne nq'ab'e ti'ja.
13At jun tal twitz yol in kyma'n ojtxi xjal kyja': O'kx qe xjal mya b'a'n in che ximan ti'j tu'n kyb'inchante jun mya b'a'n, atzun weye mlay tz'ok nq'o'ne nq'ab'e ti'ja, Tat Rey.
14¿Al i'j setz lpe'ya aya Rey kye aj Israel? ¿Al lepcho'ka tu'n tkub' ti'j tu'na? Wi'je tzaj lpe'ya, ik ntene tuj twitza ik tza'n jun kyimni tx'yan ex qa ik tza'n jun ky'aq.
15Kyja'tzun, awt Qman tz'ok te jwes ex awt txi b'inchante qi'j qkab'il, ex awt Qman b'aj xpich'unte wile ex awt q'mante qa minti' wile, ex awt kolin wi'je tuj tq'ab'a Tat Rey, chi David.
16Tejtzun tb'aj tma'n David qe yol lu, tma Saúl:
—¿Apetzuna nky'ajale David in yolina wuk'ile?
Jawtzun oq' Saúl,
17ex xi tma'n te David:
—Ax tok mas b'a'n teya tmod nwitze, ma tb'inchaya b'a'n weye te t-xel ju mya b'a'n ma b'ant ti'ja wu'ne.
18Ma tzaj tyek'una ja'lo qa at tb'is tk'u'ja tu'n tb'inchanteya b'a'n weye, tu'nju otoq chin kub' q'o'ne tuj tq'ab'a tu'n Qman, ex minti' ẍin kub' tb'yo'na.
19Ax tok ok tok noj jun xjal ti'j aj q'oj ti'j, minti' in xi ttzoqpi'n tu'n mi'n tkub' tb'yo'n, kyja'tzun awt Qman q'onte t-xel teya ti'j ju b'a'n ma tb'inchaya weye ja'lo.
20Ja'lo ma tz'el nnik'e ti'j qa aya k'okel te rey, ex ok toka te rey kyib'aj aj Israel segurxix ktel tkawb'ila.
21Q'mantza jun yol weye axix tok twitz Qman, qa mi'n che kub' tb'yo'na qe wiyjile ex mi'n kub' tyupina nb'iye kyxol wermaniye, chi Saúl.
22Xitzun tma'n David jun yol axix tok te Saúl, ex te tib'ajxi jlu ajtz Saúl tu'n tul tja, ax ikx te David kyuk'ix qe xjal uk'in tu'n e je'x tu'n kypon tuj lugar te kykolb'il kyib'.
Who We AreWhat We EelieveWhat We Do
2025 by iamachristian.org,Inc All rights reserved.
