Romanos 5 - Mam Huehuetenango New Ortography

Nimku in tzaj tq'o'n Dios qe, tu'nju ma b'ant qten tuk'il

1Kyja'tzun ma qo ok te tz'aqlxix tu'n Dios noq tu'n qokslab'l, ex ma b'ant qten tuk'il Dios noq tu'n Qajaw Jesucrist.

2Ma tzaj tq'o'n Dios t-xtalb'il qe noq tu'n Jesucrist, porke ma qo okslan ti'j, ex wa'l qo'xix tuj t-xtalb'il, ex in qo tzalaj tu'nju q'uql qk'u'j ti'j tu'n qten tuk'il Dios tuj tajwalil.

3Ex mya noq o'kx jlu; ax ikx in qo tzalaj tuj yajb'il qe, porke b'a'n qu'n, aju yajb'il qe in tq'o'n qpasens tu'n tik'x qu'n;

4ex tu'n qpasens, kyuw qten tu'n tik'x qu'n; ex tu'nju nnik'x qu'n, mas in qe' qk'u'j ti'j Dios;

5ex tu'nju q'uql qk'u'j ti'j Dios, mlay qo el tuj qch'ixwi; porke in qna'n tuj qanmi aju tk'ujlalil Dios qi'j tu'nju Xewb'aj Xjan tzaj tq'o'n qe.

6Ex tej minti'toq qipun tu'n qklet qu'nx qib', kyja'tzun kyim Crist tu'n qlaj tujxix tq'ijlalil, porke aj il qo'.

7Porke mlaylo txi tq'on tib' jun xjal tu'n tkyim tu'n tlaj jun xjal tz'aqlxix; ex qatzunlo qa at jun xjal jaku taq' tib' tu'n tkyim tu'n tlaj jun xjal b'a'n.

8Pero in tzaj tyek'un Dios qa at tk'ujlalil qi'j, tu'nju o kyim Crist te qxel tej aj ilxtoq qo'.

9Ik tza'n ma qo ok q'o'n te tz'aqlxix tu'n Dios tu'nju kyim Crist, kyja'tzun mas in qe'xix qk'u'j ti'j, qo kletel tu'n ok ttzaj kycastiw xjal tu'n Dios.

10Ma b'ant qten tuk'il Dios tu'nju tkyimlen Tk'wa'l tej aj q'ojtoq qo' ti'j, kyja'tzun mas in qe'xix qk'u'j ti'j qa ok qo kletel tu'n, tu'nju b'anin qten tuk'il Dios ex tu'nju jatz anq'in Jesucrist ex itz' ja'lo.

11Ex mya o'kx jlu; ax ikx nim in qo tzalaj ti'j Dios tu'n Qajaw Jesucrist, porke tu'n Crist ma b'ant qten tuk'il Dios.

Aju tb'incha Adán ex aju tb'incha Crist

12Kyja'tzun, ik tza'n noq tu'n jun xinaq okx il kyxol kykyaqil xjal, ex tu'nju il tzaj kamik, kyja'tzun ilxix ti'j tu'n kykyim kykyaqil xjal tu'nju kykyaqil e b'inchan il.

13Porke na'nxtoq tq'onjtz ley, attoq il kyxol xjal, ex mlay q'manjtz qa at kyil xjal na'nxtoq tul ley.

14Maske ikju, pero ate kamik kukx kykyim xjal tu'n; ttzajlenx ti'j Adán ul ti'j Moisés e kyim xjal maske mya ikx tten kyil ik tza'n til Adán, porke ate Adán ik' tib'aj jun mandamyent tzaj tq'o'n Dios te. Ate Adán jun techal ti'j Crist, aju attoq tulel.

15Pero aju toyaj Dios ma tzaj tq'o'n qe mya ik tten ik tza'n til Adán. Porke noq tu'n til junx xjal kykyaqil xjal in che kyim; ex mas nim aju t-xtalb'il Dios in tzaj tq'o'n qe, porke noq kukx ma tzaj tq'o'n kolb'il kye nimku xjal noq tu'n t-xtalb'il junx xjal, a Jesucrist.

16Ex mya ik tten toyaj Dios ik tza'n til Adán o b'ant, porke noq tu'n jun il tb'incha Adán kub' kysentens xjal tu'n kynaj; pero aju toyaj Dios tzaj tq'o'n, in che ok xjal te tz'aqlxix tu'n maske nim il otoq kyb'incha.

17Porke noq tu'n jun il tb'incha jun xjal in che kyim kykyaqil xjal; ax ikx noq tu'n jun xjal, a Jesucrist, ok qo anq'il ex ok qo kawil aqo' ma qk'am nimxix t-xtalb'il Dios, ex ma qo ok te tz'aqlxix tu'n; jun oyaj jlu ma tzaj q'o'n qe.

18Kyja'tzun, ik tza'n e kub' q'o'n kykyaqil xjal tjaq' sentens tu'n kynaj noq tu'n til jun xjal, ax ikxtzun noq tu'n jun xjal tb'incha aju tz'aqlxix, jaku che ok kykyaqil xjal te tz'aqlxix tu'n Dios ex tu'n tten kychwinqlal.

19Porke ik tza'n e ok nimku xjal aj il noq tu'n tlaj jun xinaq minti' xi tniman tyol Dios, ax ikxtzun nimku xjal ok che okel te tz'aqlxix tu'n Dios noq tu'n jun xinaq xi tniman tyol Dios.

20Tzaj tq'o'n Dios tley tu'n telxix kynik' xjal ti'j qa aj il qe twitz Dios, ex ik tza'n o chmet-xix kyil xjal, ax ikxtzun mas nimxix t-xtalb'il Dios tzaj tq'o'n.

21Ik tza'n e kyaj xjal tjaq' tipumal il ex e kyim tu'n, ax ikxtzun te Dios t-xtalb'il at tipumal tu'n qok te tz'aqlxix tu'n, ex tu'n tten qchwinqlal te jumajx noq tu'n Jesucrist aju Qajaw.