Josué 11 - Mam Huehuetenango New Ortography

Kub' ti'j Jabín tu'n Josué, kyuk'ix qe mojl kyyol tuk'il

1Tej tb'inte Jabín aju rey te tnam Hazor tkyaqilju otoq b'aj, xi t-sama'n qe t-sanjel tu'n tb'ant ti'j jun kyyol tuk'il Jobab aju rey te tnam Madón, ex kyuk'il qe rey te tnam Simrón ex te tnam Acsaf,

2kyuk'il kykyaqil qe rey ate' tuj tiwitz tx'otx' tuj tb'anq'ab' q'ij, kyuk'il qeju ate' tuj chq'ajlaj ttzi nima Jordán ex tjaq' lagun Cineret, kyuk'il qeju ate' tuj chq'ajlaj, ex kyuk'il qeju ate' tuj tx'otx' tuj telex q'ij tumlal tnam Dor,

3kyuk'il qe aj Canaán tumlal tjawitz q'ij ex telex q'ij, kyuk'il aj Amorreo, aj Heteo, aj Ferezeo, aj Jebuseo aqeju ate' kywi witz, ex qe aj Heveo aqeju ate' t-xe witz Hermón tuj tx'otx' Mizpa.

4Kykyaqiltzun qe rey lu e tzaj, kyuk'ix qe kysoldad, kyuk'ix nimxix chej q'i'n kyu'n ex kyuk'ix qe carwaj in che ajb'en tuj q'oj. Nimxix kyajlal qe soldad, minti' o b'ant kyajlanjtz, ik kyajlal ik tza'n ttxa tza'n at ttzi mar.

5Kykyaqil qe jlu o b'ant ti'j jun kyyol, ex atzun b'aj kychmon kyib' ttzi a' Merom tu'ntzun kyok tzoqpaj kyi'j aj Israel.

6Atzunte Qman tzaj tma'n te Josué: Mi'n xob'a kywitz. Wu'ne che b'el tz'aq tuj kyq'ab'e tloqju nchi'j ex che b'el kyb'yo'ne kykyaqil. Atzun teya b'ix b'aj tqesina tb'otx'il kyqan qe kychej, ex b'ix tz'ok tq'o'na kyq'aq'al qe carwaj in che ajb'en tuj q'oj.

7Atzunte Josué kyuk'ix kykyaqil qe t-soldad noq minab'en e ok tzoqpaj kyi'j ttzi a' Merom.

8Ate Qman xi q'onte kye tuj kyq'ab' aj Israel, e ok tzoqpaj kyi'j ex e je'x lpe' kyi'j tejxi kypon tuj nintz tnam Sidón ex tuj lugar Misrefot-maim, ex atzun tuj tumlal tjawitz q'ij e pon max tuj tchq'ajlajil tx'otx' Mizpa. Misikyer jun kye qe xjal lu o kyaj anq'in.

9O japun tu'n Josué ik tza'nx otoq tma Qman te, b'aj tqesin tb'otx'il kyqan kychej qe aj q'oj, ex e b'aj tpatun qe kycarwaj in che ajb'en tuj q'oj.

10Te tib'ajxi ajtz meltz'aj Josué ex kub' ti'j tnam Hazor tu'n. Aju tnam lu mas at toklen kywitz txqantl tnam. Ex kub' tb'yo'n Josué aju rey at tuj tnam,

11kyuk'ix kykyaqil qe xjal najlqe tuj tnam. Tkyaqil o naj kyu'n te jumajx ex kub' kypatun tnam.

12Ax ikx o tb'incha Josué kyi'j txqantl tnam aqeju otoq moje' kyyol tuk'il Hazor; e tzyet tu'n ex e kub' tb'yo'n qe rey ate' kyuj, ex e kub' t-xitun te jumajx ik tza'nx otoq kyaj tma'n Moisés aju tmajen Qman.

13Ex minti' kub' kypatun qe aj Israel qe tnam b'inchamaj kyib'aj kytx'aqan tnam kywi' tal witz, o'kxku tnam Hazor kub' kypatun.

14Kub' kyb'yo'n tu'n spad kykyaqil qe xjal najlqe kyuj qe tnam lu, misikyer jun xjal o kyaj anq'in. Atzun qe alumaj, kyuk'ix kykyaqil ti'xti at kyuj qe tnam lu, tzaj kyi'n tu'n tok te kye.

O japun tu'n Josué qe orden kyaj tma'n Moisés te

15Ate Qman xi q'onte qe orden te Moisés, ex atzunte Moisés xi q'onte te Josué, ex tkyaqil o japun tu'n Josué; misikyer jun yol kyaj naj tu'n ti'j tkyaqilju otoq tzaj tma'n Qman te Moisés.

16O che tzyet kykyaqil lugar lu tu'n Josué: Aju tiwitz tx'otx', tkyaqil tx'otx' Néguev, tkyaqil tx'otx' Gosén, tuk'ix tx'otx' tib'aj mlaj ex chq'ajlaj ttzi nima Jordán, tuk'ix tkyaqil tiwitz tx'otx' ex qe chq'ajlaj kye aj Israel.

17Tzajnix qe' jatum ta' witz Halac niqayin ttxlaj lugar Seir, ex max tuj ju lugar Baal-gad aju tkub'sa'n tuj chq'ajlaj Líbano t-xe witz Hermón; e tzyet qe rey te tx'otx' lu tu'n Josué ex e kub' tb'yo'n kykyaqil,

18ex nim tyemp o q'ojin Josué kyuk'il qe rey lu.

19Noq junx tnam o b'ant ti'j kyyol kyuk'il aj Israel; atzun qe xjal aj Heveo aqeju najl tuj tnam Gabaón. Kykyaqil txqantl tnam ok q'oj kyi'j ex e tzyet,

20porke ate Qman kub' kyuwsante kyanmi qe aj q'oj tu'n tjaw kyi'n kyib' kyi'j aj Israel, tu'ntzun kynaj te jumajx kyu'n aj Israel, ex tu'n mi'n ttzaj tz'e'y kyk'u'j aj Israel kyi'j, ik tza'nx otoq tma Qman te Moisés.

21Ax tuj tyemp lu kub' kyi'j kykyaqil aj Anac tu'n Josué, aqeju najl twi witz Hebrón, tuj tnam Debir, tuj tnam Anab ex tuj tkyaqil tiwitz tx'otx' te Judá ex te Israel. B'i'x e naj tu'n ex kub' t-xitun qe kytanmi.

22Kyja'tzun misikyer jun tiyjil nintz xjal Anac kyaj anq'in tuj tkyaqil tx'otx' kye aj Israel. O'kx e kyaj ten qe tiyjil Anac tuj tnam Gaza, tuj tnam Gat ex tuj tnam Asdod.

23Kyja'tzun o tzyet tkyaqil tx'otx' tu'n Josué ik tza'nx otoq tma Qman te Moisés. Ax ikx kub' t-sipan Josué tx'otx' kyxol kyiyjil aj Israel tu'ntzun tok te kyetzb'il. Te tib'ajxi jlu we' q'oj ex e kyaj ten tnam xjal tuj txub'txaj.