1Kxel nq'o'ne chjonte te Qman Dios tu'n tkyaqil wanmiye; kxel nq'o'ne chjonte te tu'n tkyaqil nk'u'je, tu'nju xjan tb'i.
2Kxel nq'o'ne chjonte te Qman tu'n tkyaqil wanmiye; mlay tzik' tna'l wu'ne tkyaqilju t-xtalb'il in tzaj tq'o'n weye.
3Ate Qman in kub' najsante tkyaqil wile, in chin b'anixe tu'n tuj tkyaqil nyab'ile.
4Ate Qman in klonte weye te kamik ex txolin wi'je tu'n tk'ujlalil ex tu'n tq'aq'b'il tk'u'j.
5In tzaj tq'o'n nimku b'a'n weye tu'n toktl wipune, ik tza'n tipun jun ku'xun, ex ik tza'n tipun jun t'iw.
6In tb'incha'n Qman aju tz'aqlxix, ex tuj tumelxix in xi tb'incha'n kyi'j qeju in che yajlanjtz.
7Xi tchik'b'a'n te Moisés alkye t-ximb'etz tu'n tb'ant tu'n, ex xi tyek'un kye aj Israel qe tb'inchb'en nim kyipumal.
8In q'aq'an tk'u'j Qman qi'j ex in tz'e'y tk'u'j qi'j; nim tpasens qi'j ex nim tk'ujlalil.
9Mya kukx in qo ok tik'le'n, ex minti' in ten tq'oj te jumajx.
10Minti' in kub' tq'o'n qcastiw ik tza'n kyajlal qil ex qe qb'inchb'en mya b'a'n.
11Ik tza'n te kya'j leq'ch tjaw tib'aj tx'otx', ax ikx te Dios nim tk'ujlalil kyi'j qeju in che niman te.
12Ik tza'n tjawitz q'ij ex telex q'ij najchaq kyxol, ax ikxtzun qe qil najchaq ma tz'el tlaq'b'a'n Dios qi'j.
13Ik tza'n jun mamb'aj in tzaj tz'e'y tk'u'j kyi'j tk'wa'l, ax ikx te Qman in tzaj tz'e'y tk'u'j kyi'j qeju in che niman te.
14Porke ojtzqi'n tu'n alkye b'anin qo' ti'j: b'a'n tu'n tquqil tx'otx' qo'.
15Aju tanq'ib'l xjal ik tten ik tza'n k'ul noq ch'in in ten; ex ik tza'n jun b'ech tuj kojb'il jurat in tzaj poq'l;
16ok nnik' kyq'iq' tib'aj, b'i'x in naj tu'n ex mlay kyil xjal juntl maj.
17Atzunte Qman tk'ujlalil kukx tten te jumajx kyi'j qe xjal in che niman te, ex kukx tb'inchante aju tz'aqlxix kye kykyaqil k'loj xjal ojtxi ex qeju che ul itz'j te tib'ajxi,
18kye qeju in japun tyol kyu'n, aju kyaj b'ant ti'j tu'n kyuk'il kyxe'chel, ex minti' nnik' tna'l kyu'n tu'n t-xi kyniman qe tmandamyent.
19Ma kub' tq'o'n Qman tq'uqb'il te tkawb'il tuj kya'j, ex in kawin tib'aj tkyaqil.
20Kyq'onxe chjonte te Qman aqeye anjel at nim kyipune ex in kyb'incha'ne aju in tzaj q'ma'n kyeye, ex tokxix kywi'ye ti'j tyol tu'n t-xi kynimane.
21Kyq'onxe chjonte te Qman aqeye ate'ye tuj kya'j nim kyajlale ex in che ajb'ene te, ex in b'ant aju tajb'il kyu'ne.
22Kyq'onxe chjonte te Qman kykyaqile b'incha'n qeye tu'n, ate'ye tuj tkyaqil lugar te tkawb'il.
Kxel nq'o'ne chjonte te Qman tu'n tkyaqil wanmiye.
Who We AreWhat We EelieveWhat We Do
2025 by iamachristian.org,Inc All rights reserved.
