Números 9 - Mam Huehuetenango New Ortography

Tu'n tik'set Xjan Q'ij

1Tuj tnejel xjaw te tkab'in ab'q'i kyetzlen aj Israel tuj Egipto, tzaj yolin Qman tuk'il Moisés tuj tzqij tx'otx' t-xe witz Sinaí ex tma:

2Il ti'j tu'n tkub' kyik'sa'n aj Israel Xjan Q'ij tujxix tq'ijlalil.

3Ktzyetel kyu'n te qale tuj kyajlaj tajlal xjaw lu, ik tza'nx b'animaj ti'j, ex tu'n tb'ant tkyaqil ti'j ik tza'nx in kyma'n qe xnaq'tzb'il ex qe ley o txi nma'ne teya, chi Qman te Moisés.

4Xitzun tma'n Moisés kye aj Israel tu'n tkub' kyik'sa'n Xjan Q'ij,

5ex kub' kyik'sa'n te qale tuj kyajlaj tajlal tnejel xjaw, tuj tzqij tx'otx' t-xe witz Sinaí. B'inchet tkyaqil kyu'n ik tza'nx otoq tma Qman te Moisés.

6Ex ate'toq junjun xinaq otoq b'aj kytz'ilsan kyib' tu'nju otoq tz'ok kymako'n jun kyimni, ex kyja'tzun minti' tumel tu'n tkub' kyik'san Xjan Q'ij tujx q'ij lu. E je'xtzun tuk'il Moisés ex Aarón tujx q'ij lu,

7ex xi kyma'n kyja':

—Tz'il qo'ye tu'nju ma tz'ok qmako'ne jun kyimni. ¿Maj mi'ntzun txi qq'o'ne qoyaje te Qman tuj q'ij lu junx kyuk'il txqantl aj Israel?

8Atzunte Moisés xi ttzaq'we'n:

—Che ayone nej alkye ktzajel tma'n Qman kyi'je.

9Tzaj yolin Qman tuk'il Moisés ex tma:

10Q'manxa kye aj Israel jlu: Qa at junjun kyeye ex qa junjun kyiyjile, tz'il ate' tu'nju otoq tz'ok kymako'n jun kyimni, ex qa mi a'l tu'nju ate' tuj jun kyb'e najchaq,

11b'a'n tu'n tkub' kyik'sa'n Xjan Q'ij te qale tuj tkyajlajin tajlal tkab'in xjaw. Kxel kychyo'n tal tman ẍne'l tuk'il itzaj k'a ex pan minti' t-samel tuj tu'n tjaw mal tk'u'j,

12ex mi'n kyaj kyq'o'n ch'in chib'j te juntl q'ij ex mi jun tb'aqil kb'el kytoqin. Kb'el kyik'sa'n Xjan Q'ij lu ik tza'nx tkyaqil ley o txi nma'ne.

13Qatzun at jun xjal mya ttz'ilsan tib' ex ax ta' tuj tja ex minti' ma kub' tik'sa'n Xjan Q'ij, k'elex lajet xjal lu, tu'ntzun mi'n ttentl kyxol t-xjalil, tu'nju minti' otoq tzaj tq'o'n toyaj weye tuj q'ij b'animaj ti'j. At til xjal ti'j jlu.

14Qatzun at jun stranjer xjal najl kyxole taj tu'n tkub' tik'sa'n Xjan Q'ij te nimb'il weye, il ti'j tu'n tkub' tik'sa'n ik tza'nx tkyaqil xnaq'tzb'il ex ley o txi nma'ne. Ax ley ktel kyxol stranjer xjal ik tza'nx kye aj Israel.

Kub' ten muj tib'aj ja xb'alun te mojb'ab'l tib'il Éxodo 40.34-38

15Tuj q'ij tej tjaw b'incha'n ja xb'alun te mojb'ab'l tib'il, b'i'x o kub' ten muj tlugaril jatum tkub' kax k'ub'l tley Dios. Ok qok yupj, aju muj nno'k ke'yin ik tza'n q'aq', ex kukx tten ok tjawil q'ij.

16Kukx o ten tkyaqil maj ikju; te q'ijl in kub' ten muj tib'aj tja Dios, ex te qonik'an nno'k ke'yin muj ik tza'n q'aq'.

17Ex oktzun tjaw laq'e' muj tib'aj ja xb'alun te mojb'ab'l tib'il in che ik'tzun laq'e' aj Israel, ex jatum in we' muj, axtzun in che kub' ten aj Israel.

18Okxi ttzaj tma'n Qman tu'n kyik' laq'e' aj Israel, in che ik'tzun, ex ok ttzaj tma'n jatum tu'n kywe', axtzun in che we'. Noq jte' q'ij in kub' ten muj tib'aj ja xb'alun te mojb'ab'l tib'il, ax ikx kye aj Israel axtzun in che kub' ten.

19Ex ok twe' muj nim q'ij tib'aj ja xb'alun te mojb'ab'l tib'il, ax ikx kye aj Israel in xi kyniman tyol Qman, ex axtzun in che kub' ten.

20Ex at maj nik'xi q'ij in we' muj tib'aj ja xb'alun te mojb'ab'l tib'il. Ax Qman in q'mante kye tu'n kywe', ex ax in q'mante tu'n kyik' laq'e'.

21At maj o'kx jun qonik'an in we' muj, atzunte prim in jaw laq'e' ex in kub'tzun b'e kyu'n aj Israel. Qa q'ijl ex qa qonik'an, ok tjaw laq'e' muj in che ik'tzun laq'e'.

22Qatzun kab'e q'ij, qa jun xjaw ex qa jun ab'q'i ma kub' ten muj tib'aj ja xb'alun te mojb'ab'l tib'il, ax ikx kye aj Israel ax in che ten ex minti' in che ik' laq'e'. Ex oktzun tjaw laq'e' muj, in kub'tzun b'e kyu'n.

23Okxi ttzaj tma'n Qman tu'n kykub' ten tuj jun lugar, axtzun in che kub' ten, ex okxi ttzaj tma'n Qman tu'n kyik' laq'e', in che ik'tzun laq'e'. Xi kyniman tyol Qman ik tza'nx otoq tzaj tma'n Qman te Moisés.