Deuteronomio 20 - Mam Huehuetenango New Ortography

Qe ley ok tok q'oj

1Ok kyexe tuj q'oj kyi'j qe aj q'oj kyi'je, qa ma kyile q'i'n chej kyu'n, kyuk'ix carwaj in che ajb'en tuj q'oj, ex qa mas nim kyajlal soldad ik tza'n kyeye, mi'n che xob'e kywitz, porke ate Qman Dios ktel kyuk'ile, aju etz q'inte kyeye tuj Egipto.

2Oktzun tpon or tu'n ttzyet q'oj, kpol laq'e' pal tu'n tyolin kyuk'il soldad aj Israel,

3ex kxel tma'n kye kyja': Kyb'intze aqeye aj Israel, ja'lo che q'ojele kyi'j aj q'oj kyi'je. Mi'n b'aj kyk'u'je ex mi'n che xob'e; mi'n che tzaj lu'lune ex mi'n che jaw sek'paje,

4porke ate Qman Dios at kyuk'ile; ate kq'ojel kyi'j qe aj q'oj te kyxele, ex kyja'tzun aqeye che kamb'al. Atzun jlu kxel tma'n pal.

5Ax ikx kxel kyma'n qe nejenel kyja': Qa at jun kyeye ma b'ant jun tja ak'aj ex na'nx tokx ten najal tuj, e taj tja; mya yajku kyim tuj q'oj ex jaku juntl tz'okx ten najal tuj tja.

6Qa at jun kyeye ma ku'x tawa'n uva ex na'nx tnik'b'en ti'j, e taj tja; mya yajku kyim tuj q'oj ex jaku juntl jaw chmonte twitz t-uva.

7Qa at jun kyeye ma b'ant ti'j tu'n tmoje' ex na'nx tmoje', e taj tja; mya yajku kyim tuj q'oj ex jaku juntl moje' tuk'il txin attoq tmojeb'el tuk'il. Atzun jlu kxel kyma'n qe nejenel.

8Te tib'ajxi ok kyma'tl qe nejenel kyja': Qa at jun in xob' ex mya kyuw tk'u'j tuj q'oj, e taj tja tu'ntzun mi'n tb'aj kyk'u'j qe tuk'il tu'n.

9Oktzun kyb'aj yolin qe nejenel, k'okeltzun q'ot kyoklen qe capitán tu'n kykub' nej kywitz junjun k'loj soldad.

10Oktzun kypon laq'e'ye ti'j jun tnam tu'n kyok tzoqpaje ti'j, tnejel kxel kyma'ne kye qa jaku kub' tuj kywitz tu'n kykyaj tjaq' kykawb'ile.

11Qatzun ma kub' tuj kywitz qe xjal najl tuj tnam, ex qa ma kyaq' amb'il tu'n kyokxe tuj tnam, oktzun che okel te kymajene ex che ajb'el kyeye.

12Qatzun kyk'i' ex qa ma kyma tu'n tok q'oj, b'ixtzun b'aj kytxolin kyib'e ti'jele tnam ex b'ix che ok tzoqpaje kyi'j.

13Oktzun kykub' tz'aq tu'n Qman Dios tuj kyq'ab'e, che b'el kyb'yo'ne tu'n spad kykyaqil qe xinaq najl tuj tnam.

14Atzun qe xu'j, qe k'wa'l, qe wakẍ, ex tkyaqilju at tuj tnam, te kyeye che okel; che nik'b'ele ti'j tkyaqilju k'elel kyi'ne kye aj q'oj kyi'je, aju ktzajel tq'o'n Qman Dios kyeye.

15Kyja'tzun che temb'il kykyaqil qe tnam kyu'ne, aqeju ate' najchaq kyi'je, aqeju mya ax ate' kyuj qe nasyon jatum che tele.

16Atzun qe tnam kye nasyon che tzajel tq'o'n Qman Dios tu'n kyok te kyetzb'ile, mi jun kyjel anq'in kyu'ne kyuj;

17noq o'kx tu'n kynaj kyu'ne te jumajx kykyaqil qe xjal lu: Qe aj Heteo, qe aj Amorreo, qe aj Cananeo, qe aj Ferezeo, qe aj Heveo ex qe aj Jebuseo, ik tza'nx o tma Qman,

18tu'ntzun mi'n kytzaj xnaq'tza'ne kyu'n tu'n kyb'inchanteye aju ik'b'ilxix in b'ant kyu'n te nimb'il kye kydios, ex tu'n mi'n kyb'inchane il twitz Qman Dios.

19Qatzun nim q'ij che tele ti'jele jun tnam tu'n ttzyet kyu'ne, mi'n jaw kytx'emine qe tze' b'a'n tlonjtz kywitz ate' ti'jele tnam, ex jaku tz'ajb'en kywitz tu'n kylo'ne kyi'j, ex aqe jlu, tze' qe, mya xjal qe tu'n kyok tzoqpaj kyi'je.

20Atzun qe tze' ojtzqi'n kyu'ne mib'an tlo'njtz kywitz, b'a'n tu'n kyjaw kytx'emine, qa tu'n kyajb'en kyu'ne te kyxwe'tzb'ile ti'j tnam aju che okel tzoqpaje ti'j, okxi ttzyet kyu'ne.