Jeremías 52 - Mam Huehuetenango New Ortography

Tej tkawin Sedequías tuj Judá 2 Reyes 24.18-20; 2 Crónicas 36.11-16

1Toktoq Sedequías twi' 21 ab'q'i tej tok te rey, ex junlaj ab'q'i o kawin tuj Jerusalén. Aju ttxu', Hamutal tb'i aju aj Libna, ex tme'jel juntl xjal Jeremías tb'i,

2Aqeju tb'inchb'en Sedequías mya b'a'n e ela tuj twitz Qman, ik tza'n qe tb'inchb'en rey Joacim.

3Kyja'tzun tzaj tq'oj Qman kyi'j aj Jerusalén ex kyi'j aj Judá ex e ex tlajo'n tu'ntzun mi kytentl twitz.

Tej tkub' ti'j tnam Jerusalén 2 Reyes 24.20—25.7; Jeremías 39.1-7

Jawtzun ti'n tib' rey Sedequías ti'j rey te Babilonia,

4kyja'tzun, tuj tlajin q'ij te tlajin xjaw tuj tb'elajin ab'q'i toklen Sedequías te rey, tzaj rey Nabucodonosor kyuk'il kykyaqil t-soldad, b'aj kytxolb'an kyib' ti'jele tnam Jerusalén, ex jaw kyb'incha'n kyxwetzb'il ti'jele muro tok ti'j tnam, tu'ntzun kyok tzoqpaj ti'j.

5Kukxtoq kytxolb'an kyib' soldad ti'jele tnam tej tjapun tjunlajin ab'q'i toklen Sedequías te rey.

6Tuj b'elaj tajlal tkyajin xjaw tujx ab'q'i lu, tzaj mas we'yaj tuj tnam ex ya minti'tl kywa xjal.

7Okxtzun kyxoptz'i'n aj q'oj jun toy' muro tok ti'jele tnam, ex maske kytxolb'antoq kyib' aj Babilonia ti'jele tnam, pero te qonik'an ex oq rey Sedequías kyuk'il kykyaqil t-soldad, ttzi' jun tlamel tkub'sa'n t-xol kab'e muro, tuj b'e nne'x tuj tqan tawal rey, ex atzun b'e xi kyi'n, aju in ku'pun tuj chq'ajlaj ttzi nima Jordán.

8Ex aqeju soldad aj Babilonia e je'x lpe' ti'j rey Sedequías, ex max kub' ti'j kyu'n tuj tchq'ajlajil tnam Jericó. Atzun qe t-soldad Sedequías kyaj kolin kyu'n, ex e b'aj sputj.

9Tzyettzun rey Sedequías kyu'n aj q'oj ex xi kyi'n twitz rey te Babilonia max tuj tnam Ribla tuj kytx'otx' aj Hamat. Atzun kub' t-sentens Sedequías tu'n rey Nabucodonosor,

10ex twitzx e kub' b'yo'n qe tk'wa'l kyuk'ix kykyaqil xjal ma' kyoklen tuj Judá.

11Atzunte Sedequías e jatz q'i'n qe tb'aq' twitz tu'n Nabucodonosor aju rey te Babilonia, b'aj k'alo'n tu'n caden, xi q'i'n tuj Babilonia, ex atzun okx q'o'n tuj pres max tejxi tkyim.

Tej tkub' xitun tja Dios 2 Reyes 25.8-21; 2 Crónicas 36.17-21; Jeremías 39.8-10

12Tuj tlajin q'ij te tjwe'yin xjaw ex tuj tb'elajlajin ab'q'i toklen Nabucodonosor te rey tuj Babilonia, ate Nabuzaradán aju at toklen ttxlaj rey te Babilonia ex nejenel kye t-soldad rey, pon tuj Jerusalén,

13ex ok tq'o'n tq'aq'al tja Dios, tuk'ix tja rey ex kykyaqil ja tuj tnam, ax ikx ok tq'o'n tq'aq'al kyja xjal ma' kyoklen,

14atzun kye soldad uk'in tu'n kub' kyxitun muro tok ti'jele tnam Jerusalén.

15E je'x ti'n Nabuzaradán aju nejenel kye soldad junjun xjal mas meb'a qe, kyuk'ix xjal otoq che kyaj klet tuj Jerusalén, kyuk'ix qeju otoq txi kyq'on kyib' tuj tkwent rey te Babilonia, ex junjuntl xjal b'a'n che b'inchan tkyaqil txkaj aq'untl, tu'n kypon ti'n tuj Babilonia.

16O'kx e kyaj tq'o'n Nabuzaradán junjun xjal mas tal meb'a, tu'n tok kykwentin tqan uva ex tu'n kyaq'nan tuj kojb'il.

17B'aj kyb'uchin aj Babilonia kykyaqil qe makb'il q'an k'uxb'il kytx'otx'il: Qe tqan ja, qe tq'uqb'il tkub'il a' ex ju pil matij, aqeju ate' twitz tja Dios, ex xi kyi'n tkyaqil q'an k'uxb'il lu tu'n tpon tuj Babilonia.

18Ax ikx xi kyi'n qe k'il, qe palet, qe matzb'il kywi mech, qe laq, qe pak' ex tkyaqil makb'il q'an k'uxb'il ttx'otx'il in che ajb'en tuj k'ulb'il.

19Atzunte nejenel kye soldad xi ti'n tkyaqil ti'xti q'an pwaq ex saq pwaq kytx'otx'il; e je'x ti'n qe palangan, qe ẍla'k, qe laq, qe tkub'il tza'j, qe kandil, qe pak', ex qe copa tkub'il oyaj ta'l twitz uva.

20Atzun qeju kab'e tqan ja, tuk'ix matij pil tkub'il a' ex qeju kab'laj tilb'ilal tor q'an k'uxb'il kytx'otx'il in che ajb'en te tq'uqb'il pil, ex qeju tq'uqb'il tkub'il a', aqeju otoq txi tma'n Salomón tu'n tb'aj kyb'incha'n tu'n kyajb'en tuj tja Dios, minti' o b'ant ttantearj tajlal q'an k'uxb'il lu.

21Aqeju kab'e tqan ja, b'elaj var twa'l junjun ex qaq var tk'itz; katl kyuj ex te kyaje q'ab' tpimil ju q'an k'uxb'il.

22Teyle junjun tqan ja tkub' jun adorn q'an k'uxb'il xawk'in tten tuj twi', te kab' var tuk' mey twa'l, ex kyok tilb'ilal karnad ẍoq' ti'jele, q'an k'uxb'il kytx'otx'il. Kykab'il tqan ja lu junx b'inchb'en kye.

23Jun syent tilb'ilal karnad ẍoq' txolin tten tok ti'jele adorn tkub' twi tqan ja, ex noq 96 at tuj q'ancha'l.

E je'x q'i'n xjal Judiy tuj juntl nasyon najchaq

24Ax ikx tzaj tzyu'n Seraías aju tnejel pal tu'n nejenel kye soldad aj Babilonia, tuk'ix Sofonías tzaj tzyu'n, aju tkab'in tnejel pal, kyuk'ix ox xq'uqil ttzi tja Dios.

25Kyxol qe xjal ate'toq tuj tnam, xi ttzyu'n aju nejenel kye kysoldad xjal Judiy, kyuk'ix wuq xinaq q'ol tconsej rey, aqeju ax otoq che kyaj ten tuj tnam, tuk'ix ju chmol xjal tu'n kyok te soldad ex 60 xinaq ate'toq tuj tnam.

26E je'xtzun ti'n Nabuzaradán kykyaqil xjal lu tuk'il rey te Babilonia max tuj tnam Ribla.

27Ex atzun tma rey te Babilonia tu'n kykub' b'yo'n qe xjal lu tuj tnam Ribla tuj kytx'otx' aj Hamat.

Kyja'tzun tten e ex q'i'n aj Judá tuj kytanmi tu'n kyxi q'i'n tuj juntl nasyon najchaq.

28Aju kyajlal xjal e je'x ti'n Nabucodonosor, atzun jlu: Tuj twuqin ab'q'i toklen te rey, e je'x ti'n 3,023 xjal aj Judá;

29tuj twajxaqlajin ab'q'i toklen te rey, e je'x ti'n 832 aj Jerusalén,

30ex tuj 23 ab'q'i toklen te rey, e je'x ti'n Nabuzaradán 745 xjal aj Judá. Tu'n kykyaqil xjal japun jun kyajlal te 4,600.

Tzoqpet Joaquín ex tk'am nimb'ilte tuj Babilonia 2 Reyes 25.27-30

31Tuj 25 tajlal tkab'lajin xjaw tuj 37 ab'q'i tokxlen presin Joaquín aju rey te Judá, ok Evil-merodac te rey tuj Babilonia, tb'incha xtalb'il te Joaquín ex etz ti'n tuj pres.

32O tb'incha b'a'n te ex mas ma' toklen ok tq'o'n kywitz txqantl rey ate' tuk'il tuj Babilonia.

33Kyja'tzun tten, xi tma'n tu'n tel ch'expu'n t-xb'alun Joaquín, aju toksa'ntoq tu'n tej tokxtoq tuj pres, ex ax o wa'n junx tuk'il rey tuj tkyaqil q'ij te tanq'ib'l.

34Ax ikx o tk'am Joaquín ch'in pwaq tkyaqil q'ij tu'n rey te Babilonia tuj tkyaqil tanq'ib'l tejxi tkyim.