1 Juan 2 - Mam Huehuetenango New Ortography

Ate Crist yolil qi'j twitz Dios

1Aqeye tal nk'wa'le, in xi ntz'ib'ane tkyaqil jlu kyeye tu'ntzun mi'n kyb'inchane il. Pero qa at jun ma b'inchan il, at jun yolil q'ij tuk'il Qman Dios, ate Jesucrist aju tz'aqlxix.

2Ok Jesucrist te chojb'il qil; mya o'kx tu'n tlaj qil, ax ikx tu'n tlaj kyil kykyaqil xjal.

3Qa ma che japun qe tmandamyent Dios qu'n, tu'ntzunju in qe'xix qk'u'j ti'j qa ojtzqi'n Dios qu'n.

4Ex qa at jun xjal ma q'mante: Ojtzqi'n Dios wu'ne qa chi, ex qa minti' in che japun qe tmandamyent Dios tu'n, nik'al yol te, ex aju yol axix tok minti' tuj tanmi.

5Ex alkyeju in japun tyol Dios tu'n, ax tok at tk'u'j ti'j Dios ex ma tz'aqet-xix tk'ujlalil. Kyja'tzun in qe'xix qk'u'j ti'j ato' junx tuk'il.

6Alkye in q'mante qa ax ta' tuk'il Dios, il ti'j tu'n tb'et b'a'n ik tza'n o b'et Crist.

Aju ak'aj mandamyent

7Erman, mya ak'aj mandamyent aju in xi ntz'ib'ane kyeye; noq o'kx aju ojtxi mandamyent aju at kyuk'ile atxix t-xe tnejel. Aju ojtxi mandamyent, atzunju yol o kyb'iye atxix t-xe tnejel.

8Maske ojtxi mandamyent in xi ntz'ib'ane kyeye, pero ak'ajx ta', ax tok ma japun tu'n Crist, ax ikx kyeye tu'n tjapun kyu'ne, porke aju qlolj ch'ix tik', ex aju spik'un ax tok ma tzul qoptz'aj.

9Qa at jun in q'mante qa at tuj spik'un ex qa nne'l tik'un terman, ax ta' tuj qlolj.

10Alkye jun xjal in tk'ujla'n terman ax ta' tuj spik'un, ex minti' jun mya b'a'n tuj tanmi tu'n tjaw tolj ti'j.

11Ex qa at jun nne'l tik'un terman, ax ta' tuj qlolj ex in b'et tuj qlolj, ex minti' nne'l tnik' ti'j tza'n t-xi', porke ma tz'ok te moẍ tu'n qlolj.

12In xi ntz'ib'ane jlu kyeye, aqeye tal nk'wa'le, porke o najset kyile tu'nju okslal qeye ti'j Jesucrist.

13In xi ntz'ib'ane jlu kyeye, aqeye mamb'aj, porke ojtzqi'n Crist kyu'ne, aju at atxix t-xe tnejel. In xi ntz'ib'ane jlu kyeye, aqeye ku'xun, porke ma kub' ti'j tajaw il kyu'ne. In xi ntz'ib'ane jlu kyeye, aqeye tal nk'wa'le, porke ojtzqi'n Qman Dios kyu'ne.

14In xi ntz'ib'ane jlu kyeye, aqeye mamb'aj, porke ojtzqi'n kyu'ne aju at atxix t-xe tnejel. In xi ntz'ib'ane jlu kyeye, aqeye ku'xun, tu'nju at kyipune, ex ma kyk'ame tyol Dios tuj kyanmiye, ex ma kub' ti'j tajaw il kyu'ne.

15Mi'n kyk'ujlaye aju achb'il te twitz tx'otx', mi jun ti'xti mya b'a'n at twitz tx'otx'. Qa at jun xjal in tk'ujla'n aju achb'il te twitz tx'otx', minti' tk'ujlalil tuj tanmi ti'j Qman Dios.

16Ex tkyaqilju at twitz tx'otx', aju tajb'il qchib'jal mya b'a'n, ex tkyaqilju mya b'a'n nno'k qke'yin ex in pon qk'u'j ti'j, ex aju qnimb'il qib' tuj qchwinqlal, myatzun te Qman Dios jlu, noq o'kx te twitz tx'otx'.

17Kb'ajel ju twitz tx'otx' tuk'ix ju kyajb'il xjal mya b'a'n; atzunju xjal in tb'incha'n tajb'il Dios kyjel ten te jumajx.

Aju yol axix tok ex aju nik'aj yol

18Aqeye tal nk'wa'le, atzunju mankb'il tq'ijlalil ja'lo; ik tza'n o kyb'iye, tzul aju aj q'oj ti'j Crist, ikxtzun ja'lo nimku aj q'oj ti'j Crist ma che jaw jlet; kyja'tzun nne'l qnik' ti'j qa atzun mankb'il tq'ijlalil ja'lo.

19Qxol ma che ex; pero mya quk'il qe; ex noqwit quk'il qe, axwitlo ma che kyaj ten quk'il. Ex ma che ex tu'ntzun tyek'unjtz qa mya kykyaqil qe quk'il qe.

20Atzun kyeye ma tz'ok q'o'n kyoklene tu'n Xewb'aj Xjan, ex kykyaqile ojtzqi'n ju yol axix tok kyu'ne.

21Minti' in xi ntz'ib'ane kyeye tu'nju minti'wt b'a'n kyu'ne aju yol axix tok, noq o'kx tu'nju ojtzqi'n kyu'ne; ex b'a'n kyu'ne mya ti'j ju yol axix tok in tzaj ju nik'aj yol.

22¿Alkyetzunju nik'al yol? ¿Myapetzunju in tma'n qa mya ate Jesús ju Crist, aju at toklen tu'n Dios? Atzun jlu aj q'oj ti'j Crist, porke nne'l tik'un xjal Qman Dios tuk'ix Tk'wa'l.

23Aju xjal ik'un Tk'wa'l Dios tu'n, minti' Qman Dios tuk'il; ex alkye jun xjal in tchik'b'a'n qa ax tok okslal ti'j Tk'wa'l Dios, ax ikx at Qman Dios tuk'il.

24Aju yol o kyb'iye atxix t-xe tnejel, axwit kyaj ten tuj kyanmiye. Qa ma kyaj ten ju yol tuj kyanmiye, aju o kyb'iye atxix t-xe tnejel, ax ikx che kyjel tene tuk'il Qman Dios ex tuk'il Tk'wa'l.

25Ex atzun jlu o tzaj tma'n Jesucrist qe tu'n ttzaj tq'o'n aju qchwinqlal te jumajx.

26A jlu in xi ntz'ib'ane kyeye tu'n tel kynik'e kyi'j qeju kyajb'il tu'n kysb'un kyeye.

27Aju Xewb'aj Xjan ma kyk'ame tu'n Jesucrist ax ta' tuj kyanmiye, ex mya il ti'j tu'n kyxnaq'tzanjtze tu'n juntl; porke aju Xewb'aj Xjan ma kyk'ame tu'n Jesucrist, in che xnaq'tzanjtze tu'n tuj tkyaqil, ax tok tyol ex mya nik'al yol te. Kyja'tzun, ax che kyaj tene tuk'il Crist, ik tza'n ma che xnaq'tzanjtze tu'n.

28Ja'lotzun, aqeye tal nk'wa'l, ax che kyaj tene tuk'il Crist, tu'ntzun tqe'xix qk'u'j ti'j ok tyek'unte tib', ex tu'n mi'n qch'ixwi twitz ok tul.

29B'a'n kyu'ne qa tz'aqlxix te Crist, ax ikx tz'elx kynik'e ti'j, aju xjal in tb'incha'n aju tz'aqlxix, tk'wa'l Dios te.