Proverbios 19 - Mam Huehuetenango New Ortography

1Maske meb'a te xjal pero qa in b'et tuj tumel, atzun mas b'a'n twitz jun xjal minti' tnab'l ex si'mil yol.

2Mya b'a'n nne'l jun aq'untl qa mi xkub' ten xjal ximal ti'j nej; aju xjal taj tu'n tb'ant jun ti'xti jurat naj in tzpet ti'j.

3Tu'nju minti' tnab'l xjal nne'l tzpet ti'j tb'e, ex in tma'n qa tu'n Qman otoq tz'el tzpet.

4Aju xjal q'inun in knet nim tamiw, atzunju xjal meb'a in kyaj kolin kyu'n qe tamiw.

5Aju testiw in tma'n yol mya ax tok, mlayx tzik'x ti'j tu'n mi'n tkub' tcastiw; ex aju xjal nik'al yol mlayx klet.

6Aju xjal b'a'n q'on kotzb'aj, kykyaqil xjal in che jyon ti'j, ex aju xjal b'a'n q'on oyaj, kykyaqil xjal in che ok te tamiw.

7Aju xjal meb'a nne'l ik'un kyu'nx qe terman, pyortzun qe tamiw in che el laq'e' ti'j.

8Aju xjal taj tu'n tok tnab'l in tk'ujlan tib', ex aju xjal in xi tk'ujla'n xnaq'tzb'il, b'a'n k'elel te te.

9Aju testiw in tma'n yol mya ax tok mlayx tzik'x ti'j tu'n mi'n tkub' tcastiw; ex aju xjal nik'al yol noq kamik in ayon ti'j.

10Mya b'a'n tu'n tanq'in jun xjal tuj achb'il qa minti' tnab'l, ax ikx mya b'a'n tu'n tkawin jun majen kyib'aj qe xjal ma' kyoklen.

11Tu'nju at tnab'l xjal mya jurat in jaw q'ojl, ex jun nimb'il te qa ma kub' tnajsa'n jun mya b'a'n otoq b'inchanjtz ti'j.

12Aju tq'oj rey in tzaj ik tten ik tza'n tq'ajq'ajel twi' jun b'alun in tzanun, ex aju xtalb'il in tq'o'n ik tten ik tza'n tq'ab' che'w in kub' tib'aj k'ul.

13Jun k'wa'lb'aj minti' tnab'l, jun b'is jlu te tman. Aju xu'j jawni q'ojl ik tten ik tza'n jun tz'uj minti' in we'.

14Jun ja ex ju q'inumab'l, jun etzb'il jlu kyu'n qe mamb'aj; atzun jun xu'j at tnab'l, tu'n Qman in tzaj tq'o'n te t-xu'jil jun xjal.

15Aju xjal ky'aj noq watl in tzaj ti'j, ex aju xjal lu ok k'ik'ex weyaj tu'n.

16Aju xjal in japun tmandamyent Qman tu'n nno'k tkwentin tib'; atzunju xjal minti' nno'k tq'o'n tkwent ti'j alkye in b'ant tu'n, ktzajel kamik ti'j.

17Aju xjal in xi tq'o'n tkotz jun xjal meb'a, mer ik tza'n tch'ex Qman in xi tq'o'n, ex tu'nx Qman k'ajel tq'o'n t-xel te.

18Kawinx tk'wa'la akux atx amb'il tu'n tkawinjtz, qatzun mi ma txi tkawina, jaku naj k'wa'l.

19Aju xjal nim in q'ojin kb'el tcastiw; qatzun mi xkub' tcastiw, mas k'okel ten b'inchal mya b'a'n.

20B'inxa qe consej ex nimanxa aju kxel kawinte teya; kyja'tzun jaku tz'ok tnab'la.

21Nimku in kub' t-ximan xjal tu'n tb'ant tu'n, ex o'kx in b'ant aju te Dios t-ximb'etz.

22Aju qajb'il ti'j jun xjal, o'kx tu'n tten tk'ujlalil; mas b'a'n jun xjal meb'a twitz jun xjal nik'al yol.

23Aju xjal in xob' twitz Qman, tzul q'o'n tchwinqlal; ok k'anq'il tuj tzalajb'il ex mlay tzaj mya b'a'n ti'j.

24Aju xjal ky'aj in xi tlamo'n tq'ab' tuj laq tu'n twa'n, ex minti'tl nno'k tilil tu'n tu'n tpon kanun tuj ttzi'.

25Ok tkub' tcastiw jun xjal b'a'n xmayin, atzun k'okel tnab'l ju xjal minti' ch'in b'a'n tu'n; atzunju xjal at tnab'l, k'okel mastl tojtzqib'l ok tkub' kawin.

26Aju xjal nno'k ten elq'al ti'j tman ex nne'x tlajo'n ttxu' tuj tja, atzun jun k'wa'lb'aj mya b'a'n ex ch'ixb'ajilxix tb'inchb'en.

27Nk'wa'l, qa mi ma txi tnimana aju kawb'il teya k'elel tpa'n tib'a kyi'j qe yol te ojtzqib'l.

28Tu'nju testiw nik'al yol minti' in xi b'inchet kyi'j xjal tuj tumelxix; aju xjal b'inchal mya b'a'n, o'kx in yolin ti'j yol mya b'a'n.

29Ma b'ant tten castiw kb'el kyib'aj qe xjal b'a'n che xmayin; ax ikx ma b'ant tten tu'n t-xi jato'n asyal ttzal kyi'j xjal minti' kynab'l.