Job 39 - Mam Huehuetenango New Ortography

1¿B'a'npe tu'na alkye q'ij in che alin qe chip te tjaq' k'ul? ¿Ope tila ok in kub' kyal qe ttxu masat?

2¿B'a'npe tu'na jte' xjaw in japun kyu'n tu'n tkub' kyal?

3In che kub' b'une' ex in kub'tzun kyal.

4Ok kych'iy qe kyal ex ok tok kyipun in kyaj kykolin kytxu' ex minti'tl in che ul meltz'aj.

5¿Alkye el tzoqpinte te bur te tjaq' k'ul? ¿Alkye o tz'el qitpunte te?

6Aqine inx yek'unte tnajb'il tuj tzqij tx'otx' ex tuj chq'ajlaj minti' awal in tzaj ch'iy tuj.

7Tk'i' ti'j tq'ajq'ajel in jaw tuj tnam kyu'n xjal, ex mi tu'n t-xi tniman tq'ajq'ajel twi' lajol chej.

8In b'et tik' kywi' tal witz in jyon twa, in jyon ti'j noq alkye txkaj cha'x k'ul tu'n t-xi twa'n.

9¿Chipetzuna qa jaku tajb'e tor te tjaq' k'ul tu'n tajb'en teya ex tu'n tjawil tq'ij tuj tpe'na?

10¿Jakupe k'alet yuw ti'j tqul tu'na ex tu'n tok tq'o'na jwers ti'j tu'n tch'okin ex qa tu'n t-xi lpe' ti'ja tu'n tb'aj parejit twitz tx'otx'?

11¿Jakupe tz'ok qe' tk'u'ja ti'j tu'nju at nim tipun ex tu'n tkyaj tq'o'na tu'n tb'inchante taq'una?

12¿Chipetzuna qa jaku tz'ajb'en tu'na tu'n tjaw chmet twitz tawala ex tu'n tok tchmo'na twitz tawala jatum nne'l b'ajut?

13Ex lu jun nintz chyu'j avestrúz tb'i, in che yukch qe tq'ab' tuk'il tzalajb'il mer ik tza'n tq'ab' garza,

14in che kyaj tq'o'n qe tjos tjaq' ttxa tz'a'n tu'ntzun kymeq't tu'n tkyaqal q'ij.

15Minti' in ximan ti'j qa tu'n kyb'aj pax qe tjos tjaq' tqan jun xjal ex qa tjaq' tqan jun jil.

16Puro jawni kyi'j qe tal, mer ik tza'n mya tal qe in che el tuj twitz, ex minti' in tzaj tb'is ti'j qa minti' ma tz'el b'a'n taq'unb'en.

17In b'ant jlu tu'n, tu'nju minti' xi nq'o'ne tojtzqib'l ex tnab'l.

18Ex ok in jaw we' ex ok tok ten qelel, nno'k ten tz'e'l kyi'j qe chej ex kyi'j qeju kyjax kyib'aj, ex mas kyuw ojqelan kywitz.

19Baqa aya o q'onte tipumal chej, ex ¿tu'npetzuna ok tq'o'na ttzmal tqul puro mejor ke'yin?

20¿Baqa tu'na in b'ant tt'ikpaj ik tza'n ẍplon ok t-sjorin tuj ttxa'n puro xob'ajilxix?

21In jaw t-skatin tx'otx' tu'n tipun tuj chq'ajlaj ex minti' t-xob'il tu'n t-xi' ojqelan tuj q'oj.

22In jaw tze'n ti'j ju xob'tzal ex minti' in tzaj tchi ti'j; minti' in tzaj b'aj tk'u'j twitz spad,

23maske in swok'in aju tkub'il tplech xjal tjax tib'aj ex nne'l ky'ech ti'j lans ex kyi'j qe lans ch'in kyqan.

24Tu'nju in ojqelan wen, minti' tilwi tuj twitz tu'n tpon naj tuj juntl lugar ex ok tq'ajt chun ya mlay kub' we' mastl.

25Ok tb'inte tq'ajq'ajel chun, in tzaj sjorin ttxa'n; in tna'n naj t-xewil ok tok q'oj najchaq wen, ex in tb'i'n tq'ajq'ajel twi nejenel kye soldad ex ju sich' in jaw.

26¿Apetzuna at nim tnab'la tu'n t-xi t-xnaq'tza'na tu'n tb'ant tlipan ju q'anjan ex tu'n t-xi lipan tuj tnayaj q'ij?

27¿Tu'npetzuna xi tma'na te t'iw tu'n tb'inchante tq'u' kywi' nmaq witz?

28Aju t'iw najl tuj tk'u'j xaq twitz pik ex in b'aj tb'incha'n jun kolb'il tib' twi' jun ttz'u'pil pik;

29maxtzun ma jawni in tzaj tke'yin tkanb'.

30Qe tal puro chik' kywa in b'aj, ex jatum ta' jun kyimni, atzun ta' t'iw.