Jeremías 12 - Mam Huehuetenango New Ortography

Xi yolin Jeremías tuk'il Dios

1Tz'aqlxix teya Nman tu'n wok tene yolil tuk'ila, ex maske ikju, waje txi nqanine junjun nxjele teya: ¿Tiqu'n b'a'n nne'l tkyaqil kye qe xjal b'inchal mya b'a'n? ¿Tiqu'n tuj txub'txaj in che anq'in qe xjal in che ximan tu'n kyb'inchante mya b'a'n kyi'j kyuk'il?

2Tu'na ma che ok ik tza'n jun wi' tze' in ku'x awa'n, in xi' tlok', in ch'iy ex nno'k twitz. Aqeju xjal lu noq tu'n kytzi' in tzaj kyna'n tb'iya, atzunju kyanmi najchaq ta' ti'ja.

3Atzun teya Nman, ojtzqi'n qine tu'na; in chin tke'yina ex b'a'n tu'na alkyechaq nximb'etze ti'ja. Q'inxa qe xjal lu ik tza'n in che'x q'i'n qe ẍne'l tuj b'iyb'il kye, che tpa'n ela alkye q'ij tu'n kykyim tu'na.

4¿Jte'tltzun q'ij ktel tx'otx' te tzqij ex tu'n tten k'ul te tzqij tuj kojb'il? Ma che kyim qe jil ex qe chyu'j tu'n tlaj kyb'inchb'en xjal mya b'a'n, aqeju najl tuj tx'otx' lu, porke in kyma'n: Mi'n til Jeremías alkye kb'ajel qi'j, che chi.

Aju tzaq'web'l tu'n Dios

5Qa nimxix in sikta ok tjaw ojqelina kyuk'il xjal, ¿tza'ntzun tten tu'n t-xkye'ya tu'n tqelina kyuk'il xjal kyjax kyib'aj chej? Qa in jaw tolja tuj chq'ajlaj, ¿titzun kb'antel tu'na tu'n tb'eta tjaq' chk'ul ttzi nima Jordán?

6Axpe qe termaniya ex qe xjal at t-xilena kyuk'il ma jaw kyi'n kyib' tu'n kyq'ojin ti'ja, in che sch'in ti'ja tuk'il kyq'oj. Mi'n tz'ok qe' tk'u'ja kyi'j, maske che tzaj yolin teya tuk'il yol puro b'a'n.

Tzaj tb'is Qman ti'j ju otoq tzaj kyi'j tnam xjal etzan tu'n

7Ma che kyaj nkoline qe xjal etzan wu'ne, ma kyaj nkoline wetzb'ile. Aju tnam o nk'ujlaye ma txi nq'o'ne tuj kyq'ab' aj q'oj.

8Aju tnam ok te wetzb'ile, ja'lo ik tten te weye ik tza'n jun b'alun te tjaq' chk'ul, in tzanun wi'je; kyja'tzun ma tz'el wik'une.

9Aju tnam etzan wu'ne ik tten ik tza'n jun chyu'j tb'anilxix ke'yin ttzmal, aju in che ok tzoqpaj txqantl chyu'j ti'j. Kytzaje kykyaqile aqeye txkup te tjaq' k'ul, kychmon ok kyib'e tu'n kychyo'ne ti'j.

10Ma b'aj naj tqan n-uvaye kyu'n nimku nejenel kye aj q'oj, ma b'aj kywab'an aju kojb'il etzan wu'ne, aju ntx'otx'e tb'anilxix ma tz'ok kyu'n te jun tzqij tx'otx',

11ax tok ma kyaj kyq'o'n te jun tzqij tx'otx' ex ma kyaj ten tuj b'is. Tkyaqil tx'otx' ma tz'ok te tzqij tx'otx' ex mi a'l jun in tzaj tb'is ti'j.

12Kywi' kykyaqil tal witz tuj tzqij tx'otx' e tzaj aj q'oj xitul tkyaqil, porke aqine Dios tu'n nspadiye che najel kykyaqil tnam ex mi jun ktel tuj txub'txaj.

13Ku'x kyawa'n triw, ex aju twitz jaw kyi'n puro ch'i'x, tkyaqil kyaq'unb'en noqx gan. Tzaj kych'ixwi tu'nju misikyer twitz awal ma chmet kyu'n tu'n tlaj nimxix ntx'u'jile.

Aju yol tzaj ttziyan Qman kye tnam kyvesin kyib' kyuk'il aj Israel

14Chitzun Qman in tma'n kyi'j qe tnam b'inchal mya b'a'n, aqeju kyvesin kyib' kyuk'il aj Israel, ex aqeju ma che el q'inte kytx'otx' aju tzaj tq'o'n Qman te kyetzb'il: Aqine chin elex q'inte kye tuj kytx'otx' ex che eletz wi'ne aj Judá kyxol.

15Ex kyetzlenxi wi'ne, tzul q'aq'an nk'u'je kyi'j ex che ul wi'ne juntl maj tujx kytx'otx' ex tujx kytanmi.

16Ax tok, aqe jlu e je'x xnaq'tzante kye qe xjal etzan wu'ne tu'n t-xi kyma'n jun yol axix tok twitz tilb'ilal Baal, ex qa ax tok ma txi kyoksla'n kyokslab'l qe xjal etzan wu'ne, ex qa ma tz'ajb'en nb'iye kyu'n ok t-xi kyma'n jun kyyol axix tok, ex qa ma kyma kyja': Kxel qtziyane jun yol axix tok twitz Qman, ex b'a'n ax tu'n kyten kyxol qe xjal etzan wu'ne.

17Qatzun at jun nasyon minti' ma chinx tniman, kjawitz nb'aqo'ne ik tza'n jun wi' tze', ex b'i'x knajel wu'ne. Aqine Dios in chin q'mante jlu.