Santiago 5 - Mam Huehuetenango New Ortography

Aju b'is ktzajel kyi'j q'inun

1Kyb'intze jlu aqeye q'inun. Che oq'e ex che wu'yine tu'n tlaj ju kyb'ise tzul.

2Aju kyq'inumab'le ma q'ay, ex aju kyxb'alune tb'anilxix ma b'aj twa'n pok'.

3Aju q'an pwaq tuk'ix saq pwaq at kyuk'ile ma akomix ti'j, ex aju akom k'okel te testiw kyi'je qa mya b'a'n qeye, ex kb'ajel twa'n akom kychib'jale ik tza'n tu'n q'aq'. Ma b'aj kychmo'ne kyq'inumab'le tuj mankb'il q'ij, ex atzun mankb'il tq'ijlalil ja'lo.

4Aqeju majen jaw chmonte twitz kyawale in che sch'in tu'n tlaj e kub' kysb'u'ne, minti' chjet twi kyk'u'j kyu'ne; ex ju tq'ajq'ajel kywi' qeju jaw chmonte twitz kyawale ma kanun tuj t-ẍkyin Qajaw, aju Tajaw tkyaqil.

5Ma che anq'ine tuj achb'il twitz tx'otx' ex ma che achine; ma kyk'a'cha kyk'u'je ik tza'n qe alumaj in che k'a'chanjtz tu'n kykub' b'yo'n, ikx kyeye ch'ix tul kanun q'ij tu'n kykub' b'yo'ne.

6Qe xjal minti' kypaltil, kub' kyq'o'ne kysentens ex kub' kyb'yo'ne, ex minti' e q'ajt kywitze.

Tu'n tten qpasens ex tu'n qna'n Dios

7Kyja'tzun erman ten kypasense, che ayone okxi tul Qajaw. Kyximankuye ti'j ju aq'nal in ayon ti'j ju twitz awal tb'anilxix, at tpasens tu'n tayon alkye q'ij tu'n tul kanun ttzi jb'alil ax ikx alkye q'ij tu'n tjaw jb'al.

8Ax ikx kyeye ten kypasense ex kykyuwsam kyanmiye, porke in laq'ex ttzaj tq'ijlalil tu'n tul Qajaw.

9Erman, mi'n che yoline mya b'a'n ti'j juntl kyxolxe, tu'n mi'n kyoke tuj xjel; porke Dios aju Jwes, lu at ttzi ja,.

10Aqeye wermaniye, kyna'ntze kyi'j qe t-sanjel Dios e yolin ojtxi, porke sama'n qe tu'n Qman; kyna'ntze nik'pun ik'x kyu'n, ex o ten kypasens.

11In qma'n, at tzalajb'il kye qeju nnik'x kyu'n. O kyb'iye ti'j Job, o ten nim tpasens, ex o kyb'iye aju tb'incha Qman te te mankb'ilxi; porke ate Qman nim in q'aq'an tk'u'j ex in tz'e'y tk'u'j qi'j.

12Pero aju mas ilxix ti'j erman, mi'n tzaj kyna'ne tb'i Dios ti'j jun kyyole, mi'n tzaj kyna'ne kya'j, ex mi'n tzaj kyna'ne tx'otx', ex mi'n tzaj kyna'ne juntl; noq o'kx tu'n kymanteye ok, ex ax tok ok; ex qa tu'n kymanteye mi'n, ex ax tok mi'n, tu'ntzun mi'n kykyaje tjaq' sentens tu'n Dios.

13Qa at jun in b'isun kyxole, b'a'n tu'n tna'n Dios. Ex qa at jun in tzalaj, b'a'n tu'n tb'itzan.

14Qa at jun yab' kyxole, b'a'n tu'n kytzaj txket qe anciano kyxol okslal, ex tu'n kyna'n Dios ti'j yab' ex tu'n tok kyq'o'n aseyt ti'j, tu'nju at kyoklen tu'n Qajaw.

15Qa q'uqlxix kyk'u'je ti'j Dios ok kyna'ne Dios, kb'anixel ju yab' ex kjawil wab'an tu'n Qajaw; ex qa at il otoq tb'incha, knajsetel til.

16Kyja'tzun, kypa'n jatz kyile kyxolxe, ex che na'ne Dios kyi'je kyxolxe tu'ntzun kyb'anixe. Aju tna'j Dios ju xjal tz'aqlxix at nim tipumal ex nim in tb'incha'n.

17Ate Elías t-sanjel Dios, ik ttzajlen ik tza'n qe; ex o na'n Dios kyuwxix tu'n mi'n ttzaj jb'al, ex minti' tzaj jb'al twitz tx'otx' tuj ox ab'q'i tuk'il qaq xjaw.

18Ex juntl maj o na'n Dios, ex tzajtzun jb'al twitz kya'j, ex tzajtzun twitz tawal tx'otx'.

19Erman, qa at jun kyxole ma tz'el txalpuj ti'j ju yol ax tok, ex qa ma tz'ajtz meltz'aj tu'n juntl erman,

20tz'elx kynik'e ti'j jlu, qa at jun erman ma tz'ajtz meltz'aj jun aj il tu'n, tu'n tkyaj tq'o'n ju tb'e mya b'a'n, ok kletel tanmi xjal tu'n tu'n mi'n tkyim, ex tkyaqil til xjal knajsetel.