1 Corinto 3 - Mam Huehuetenango New Ortography

Junx in qo aq'nane in qo ajb'ene te Dios

1Kyja'tzun erman, minti' in chin yoline kyuk'ile ik tza'n in chin yoline kyuk'il okslal in kyb'incha'n tajb'il T-xew Dios; noq o'kx in chin yoline kyuk'ile ik tza'n na'nx t-xi kynimane T-xew Dios; ik tza'n tal k'wa'lx qeye tuj kyokslab'le ti'j Crist.

2Aju xnaq'tzb'il xi nq'o'ne kyeye noq ch'in tnab'l; ik kytene ik tza'n jun tal k'wa'l noq ta'l imj in xi' tu'n ex mya wab'j, tu'nju na'nxtoq tb'ant kywa'ne. Ax ikx ja'lo na'nx t-xi wab'j kyu'ne,

3tu'nju kukx t-xi kynimane aju kyexe kyajb'ile, kukx ttzaj tlo'ch kyk'u'je kyi'j txqantl, kukx kyq'ojine ex atx pab'l tib' kyxole. ¿Myapetzun ax kyajb'ile in xi kynimane, ex in che anq'ine ik tza'n qe xjal mya okslal qe?

4Ex ok in tma'n jun: Te Pablo qine, ex ok in tma'n juntl: Te Apolos qine, ¿myapetzun ax kyajb'ile in kyb'incha'ne ikju ik tza'n kye xjal in kyb'incha'n?

5¿Titzun woklene? ¿Ex titzun toklen Apolos? Ajb'el qo'ye te Dios, noq tu'n qyole ma che okslane ti'j Qajaw ik tza'nx ju qoklene tzaj tq'o'n Dios.

6Wu'ne ku'x wawa'ne iyaj, atzunte Apolos ok ten a'lilte, ex atzunte Dios ch'isal te.

7Kyja'tzun, aju awalte minti' toklen, tuk'ix ju a'lilte minti' toklen; noq o'kx Dios at toklen; porke atzun ch'isal te.

8Aju awalte tuk'ix ju a'lilte junx ta' kyoklen; ex teyle junjun ok tk'ma' chojb'il te ti'j ju taq'unb'en.

9Porke junx in qo aq'nane, in qo ajb'ene te Dios; atzun kyeye tawal Dios qeye.

Ax ikx jun ja qeye b'incha'n qeye tu'n Dios.

10Aju t-xtalb'il Dios tzaj tq'o'n weye tu'n tkub' nq'o'ne simyent ik tza'n jun b'inchal ja nim tnab'l, ex juntl in jaw b'inchante ju ja tib'aj simyent; teyle junjun tu'n tok tq'o'n tkwent ti'j tza'n tten tu'n tjaw tb'incha'n.

11Ex mi a'l jun xjal jaku b'ant tu'n tu'n tkub' tq'o'n juntl simyent, noq o'kx aju simyent ma kub' nq'o'ne, atzun Jesucrist.

12Qa at jun xjal ma jaw tb'incha'n q'an pwaq tib'aj ju simyent lu, ex qa saq pwaq, ex qa tal ab'j in che qoptz'aj, ex qa tze', ex qa ch'im, ex qa tqan kjo'n,

13kq'ancha'lil taq'unb'en teyle junjun, ex k'elel tuj q'ancha'l tuj tq'ijlalil jwisi, porke tu'n q'aq' k-yek'etel noq alkyex taq'unb'en junjun.

14Qa at jun xjal ma kyaj ten taq'unb'en aju jaw tb'incha'n tib'aj simyent, ok tk'ma' chojb'il te.

15Qa at jun xjal ma kub' tz'e'y taq'unb'en, b'i'xtzun knajel taq'unb'en, ex ate xjal kkletel, ik tza'n tuj q'aq' otoq tz'etz.

16¿Minti'petzun b'i'n kyu'ne qa tja Dios qeye ex najl T-xew Dios tuj kyanmiye?

17Qa at jun xjal ma kub' xitunte tja Dios, ax Dios kb'el xitunte xjal, porke aju tja Dios xjante, ex aqeye tja Dios.

18Kuchiwt mi jun tu'n t-sb'un tib'. Qa at jun kyxole in ximan ti'j qa at tnab'l ik tza'n kye xjal tuj tq'ijlalil ja'lo, q'o'nk tib' ik tza'n minti' ch'in b'a'n tu'n, tu'ntzun tok te aj nab'lxix.

19Porke aju kynab'l xjal minti' ttxolil nne'l tuj twitz Dios; porke in tma'n tuj Tu'jil: In che tzyet qe aj nab'l tu'n Dios maske jawni kywitz.

20Ex juntl maj in tma'n: B'a'n tu'n Qman, minti' tajb'en aju kyximb'etz qe aj nab'l, chi tuj Tu'jil.

21Kyja'tzun, mi jun tu'n tmante qa at jun tmajen Dios mas b'a'n twitz juntl, porke kyeye tkyaqil,

22qa a Pablo, ex qa a Apolos, ex qa a Pedro, ex qa tkyaqilju at, ex qa aju chwinqlal, ex qa ju kamik, ex qa aju at ja'lo, ex qa aju tzul, kyetzune tkyaqil;

23ex aqeye te Crist qeye, atzunte Crist te Dios te.