Deuteronomio 18 - Mam Huehuetenango New Ortography

Aju at kyoklen aj Leví ti'j

1Qe pal aj Leví, aqe jlu kykyaqil qe tiyjil Leví, minti' kyoklen ti'j etzb'il ik tza'n kye txqantl aj Israel. O'kx che anq'il kyi'j qe chojb'il ex qe oyaj che xel q'ot te Qman.

2Mi'n kyk'am kyetzb'il ik tza'n kye txqantl kyerman, porke ate Qman k'okel te kyetzb'il, ik tza'nx o tma Qman kye.

3Aju at kyoklen qe pal ti'j kyi'j qe tor ex qe ẍne'l che xel kyq'o'n xjal te chojb'il, atzun qe jlu: Jun tq'ab', tuk'ix chib'j tjaq' tb'aqil ttzi', ex tpans.

4Ax ikx k'okel te kye, tnejel twitz triw, tnejel ta'l twitz uva, tnejel chib'j aseyt, ex aju tnejel lan k'elel matzet kyi'j qe ẍne'l;

5porke o che jaw t-sk'o'n Qman Dios kyxol kykyaqil k'loj kyiyjil aj Israel tu'n kyajb'en te jumajx tuj k'ulb'il te, kyuk'ix qe kyk'wa'l.

6Qa at jun aj Leví ma tz'etz tuj jun tnam kyxole, ex qa ma pon tu'n tkyaqil tgan tuj lugar otoq jaw t-sk'o'n Qman,

7jaku tz'ajb'en te pal tuj tb'i Qman, ik tza'nx in che ajb'en te Qman kykyaqil qe txqantl tuk'il ax aj Leví qe,

8ex ok tk'ma' twa ik tza'nx kye txqantl in kyk'mo'n, ex part aju ok tk'ma' ti'j tetzb'il.

Mayb'il kye tu'n mi'n kyb'inchante aju costumr ik'b'ilxix

9Ok kyokxe tuj tx'otx' ktzajel tq'o'n Qman Dios kyeye, mi'n tz'el kykano'ne aju costumr ik'b'ilxix in kyb'incha'n qe nasyon ma chixin.

10Mi jun kyeye txi q'onte jun tk'wa'l te chojb'il tu'n tkub' patit tuj q'aq', mi jun tu'n tb'ant tq'ijin, mi jun tz'ok tq'o'n tib' q'malte alkye tzul te tib'ajxi, mi jun tu'n tb'ant tky'a'n,

11mi jun tu'n tb'ant mañ tu'n, mi jun tu'n t-xi tqanin jun t-xjel kye aj q'ij ex mi kye qeju in tzaj kytxko'n kyanmi kyimni, ex mi jun tu'n t-xi tqanin jun t-xjel kye kyimni.

12Porke ik'un tu'n Qman aju xjal in tb'incha'n tkyaqil jlu, ex tu'ntzunju ik'b'ilxix in kyb'incha'n qe nasyon lu, che elex tlajo'n Qman Dios kywitze.

13Che okxe tz'aqlxix twitz Qman Dios.

14Aqeju nasyon lu, aqeju che okele te tajwil kytx'otx', in xi kyb'i'n kyyol qe chman ex qe aj q'ij; atzun kyeye minti' tzoqpi'n qeye ti'j tu'n Qman Dios tu'n tb'ant jlu kyu'ne.

Aju t-sanjel Dios at tulel

15Kjawil t-sk'o'n Qman Dios jun t-sanjel kyxole ik tza'nx qine, ex kxel kynimane tyol.

16Atzun jlu xi kyqanine te Qman Dios tuj q'ij tej tok kychmon kyib'e kykyaqile t-xe witz Horeb, tej kymanteye kyja': Qk'i'ye qo b'ine juntl maj tq'ajq'ajel twi Qman Dios, mi tu'n tqile aju nintz q'aq' lu, tu'ntzun mi'n qkyime, che chiye.

17Tzajtzun tma'n Qman weye: B'a'n aju yol ma kyma aj Israel.

18Ax kyxol kyerman kjawil nsk'o'ne jun nsanjele ik tza'nx aya, ex kxel tma'n kye tkyaqil nyole kxel nma'ne te.

19Qatzun at jun xjal minti' ma txi tb'i'n tyol nsanjele, aju k-yolil kyuk'il te nxele, k'okel te xjal lu tuj xjel wu'ne.

20Aju sanjel tu'nx tib' in yolin jun yol ex in tman qa wu'ne otoq txi nsama'ne, ex minti' otoq txi nma'ne jun yol te, ex qa in tma'n qa otoq tzaj sama'n kyu'n junxitl dios, il ti'j kb'el b'yet, chi Qman.

21Qatzun ma kymaye kyja': ¿Tza'ntzun tten k'elel qnik'e ti'j qa mya tyol Qman in yolin ti'j? qa che chiye, il ti'j tu'n tok kykwente ti'j jlu:

22Qa minti' ma japun aju yol otoq tma sanjel tuj tb'i Qman, atzun k'elel kynik'e ti'j mya a Qman otoq q'mante te, noq tu'nx otoq tz'ok tq'o'n tib' te t-sanjel Dios tu'n tnimb'il tib'; tu'ntzun jlu mi'n che xob'e twitz.