Levítico 27 - Mam Huehuetenango New Ortography

Tu'n kyxjanset qe xjal ex qe ti'xti te Dios

1Tzaj yolin Qman tuk'il Moisés ex tma:

2Q'manxa jlu kye aj Israel: Qa at jun xjal ma txi ttziyan tu'n ttzaj tq'o'n juntl xjal te weye, ex qa te tib'ajxi mi'n japun tu'n, il ti'j tu'n ttzaj tchjo'n kolpib'l te xjal ex atzun jlu kxel tchjo'n:

3Ti'j jun xinaq te winqin ab'q'i asta 60, k'elel ti'na 50 saq pwaq te kolpib'l te, ik tza'nx pwaq in ajb'en tuj tja Dios;

4qatzun xu'j, 30 saq pwaq k'elel ti'na te kolpib'l te.

5Atzun kyi'j qe xjal ma te jwe' ab'q'i asta winqin, winqin saq pwaq k'elel ti'na ti'j jun xinaq ex laj saq pwaq ti'j xu'j, te kolpib'l te.

6Atzun kye tal k'wa'l ma te jun xjaw asta jwe' ab'q'i, k'elel ti'na jwe' saq pwaq te kolpib'l te jun tal q'a ex ox saq pwaq ti'j jun tal txin.

7Atzun kyi'j qe xjal mas te 60 ab'q'i, k'elel ti'na olaj saq pwaq ti'j jun xinaq ex laj saq pwaq ti'j jun xu'j.

8Qatzun meb'a te xjal aju otoq txi ttziyan, ex qa mlay chjet tu'n aju chojb'il b'anin ti'j, che xeltzun q'it qe jlu twitz pal tu'n tkub' tq'o'n jun ak'aj chojb'il, noq jte' jaku chjet tu'n xjal otoq txi tziyante yol.

9Ex qatzun alumaj ktzajel kyq'o'n weye, aqeju b'a'n ttzaj kyq'o'n te chojb'il, kykyaqil alumaj che tzajel q'o'n weye b'i'x che xjansetel,

10ex mlay b'aj ch'expet tuk'il juntl alumaj; mi'n tzaj kyq'o'n jun b'a'n te t-xel jun ploj, mi jun ploj te t-xel jun b'a'n; qatzun ma b'aj kych'expu'n, kykab'il alumaj che xjansetel.

11Qatzun alumaj tz'il, aju mlay tzaj kyq'o'n te chojb'il weye, kxel q'it ju alumaj lu tuk'il pal

12tu'ntzun ttzaj tma'n jte' twi', qa b'a'n alumaj ex qa mya b'a'n. Aju ktzajel tma'n pal, atzun twi'ju.

13Qa taj tu'n tkyaj tko'pin alumaj, b'a'n tu'n t-xi tchjo'n twi' ik tza'nx b'animaj ti'j, ex il ti'j kxel tq'o'n tjwe'yin tib'aj.

14Qa at jun ma txi ttziyan tu'n ttzaj tq'o'n tja tu'n t-xjanset te weye, ate pal kq'malte jte' twi', ik tza'nx b'inchb'en te, ex aju ktzajel tma'n pal, atzun twi'ju.

15Qatzun taj xjal tu'n tkyaj tko'pin tja, b'a'ntzun tu'n t-xi tchjo'n twi' ik tza'nx b'animaj ti'j, ex il ti'j kxel tq'o'n tjwe'yin tib'aj, ex aju ja k'okel juntl maj te te.

16Qa at jun ma txi ttziyan tu'n ttzaj tq'o'n jun piẍ ttx'otx' tu'n t-xjanset te weye, kxel tantyarit twi tx'otx' noq nik'pun iyaj in xi ti'n tx'otx', 50 saq pwaq twi' jun piẍ tx'otx' noq jatum in pon b'aj kab'e quintal iyaj sebad ok tku'x awat.

17Qa ma xjansanjtz tx'otx' te weye tuj ab'q'i te tzoqpib'l, kukx ktel twi' ik tza'n otoq b'ant ti'j;

18ex qa ma xjansanjtz tb'ajlenxi ab'q'i te tzoqpib'l, kxe'ltzun ttantyarin pal aju saq pwaq at tu'n t-xi q'ot, ex tu'n tel q'it ch'intl twi', noq jte' ab'q'i atx taj tu'n tkanun ab'q'i te tzoqpib'l.

19Qa taj xjal tu'n tkyaj tko'pin ttx'otx', b'a'n tu'n t-xi tchjo'n twi' ik tza'nx b'animaj ti'j, ex il ti'j kxel tq'o'n tjwe'yin tib'aj, ex k'okeltzun tx'otx' juntl maj te te.

20Qatzun mi ma kyaj tko'pin xjal ttx'otx', ex qa ma txi k'ayit te juntl, ya mlay b'ant tu'n tkyaj tko'pin.

21Oktzun ttzoqpet tx'otx' tuj ab'q'i te tzoqpib'l, axtzun kyjel ten tx'otx' xjansamaj tu'n tajb'en te weye, te kyetzb'il pal k'okel.

22Qa at jun xjal ma txi ttziyan tu'n ttzaj tq'o'n jun piẍ tx'otx' tu'n t-xjanset te weye, ex laq'o'n otoq tz'el tx'otx' tu'n, mya ti'j tetzb'il,

23ate pal, tuk'ix xjal, kxel kytantyarin twi tx'otx' okxi tul kanun ab'q'i te tzoqpib'l, atzunte xjal tujx q'ij lu kxel tchjo'n twi tx'otx' ik tza'nx otoq b'ant ti'j, ex kxjanseteltzun te weye.

24Tuj ab'q'i te tzoqpib'l k'okel tx'otx' juntl maj teju k'ayil, aju mer tajwilxix.

25Tkyaqil aju twi' kxel ttantyarina, kxel ttantyarina ik tza'nx pwaq in ajb'en tuj tja Dios. Aju saq pwaq ch'ixmi mey ons talil.

26Atzun nej kyal alumaj weye qe tu'nju a nej kyal, ex mlay b'ant tu'n tb'aj kyxjansa'ne juntl maj. Qa jun tal tor ex qa jun tal tman ẍne'l, weye qe.

27Qatzun jun alumaj tz'il, b'a'n tu'n tkyaj ko'pit ik tza'nx twi' otoq tz'ok q'o'n ex il ti'j tu'n t-xi q'ot tjwe'yin tib'aj. Qatzun mi'n ma kyaj ko'pin, kxel k'ayit ik tza'nx twi' otoq b'ant ti'j.

28Qa at jun xjal ma txi ttziyan tu'n ttzaj tq'o'n te jumajx noq alkyexku at tuk'il tu'n t-xjanset te weye, qa jun xjal, qa jun alumaj ex qa tx'otx' aju otoq kyaj q'o'n te tetzb'il, mlay b'ant tu'n t-xi k'ayit ex mi tu'n tkyaj ko'pit, kykyaqil qe jlu che okel te xjanxix ex weye qe.

29Ax ikx mlay tz'etz tko'pin xjal juntl xjal qa otoq b'ant ti'j tu'n tkyim; ilxix ti'j tu'n tkyim.

30Aju tlaji'n ti'j kywitz awal in tzaj tuj tx'otx', qa triw ex qa twitz tze' b'a'n tlonjtz twitz, weye qe jlu ex xjansamaj te weye.

31Qa at jun xjal taj tu'n tkyaj tko'pin aju tlaji'n, il ti'j tu'n t-xi tchjo'n twi', tuk'ix tjwe'yin tib'aj.

32Ktzajel q'ot te weye junjun ti'j lajchaq alumaj, qa wakẍ ex qa ẍne'l, atzun tlaji'n jlu,

33ex mi'n jaw kysk'o'n aju mas b'a'n ex mi aju mya b'a'n, ex mi'n b'aj kych'expu'n. Qatzun ma b'aj kych'expu'n, tu'n jlu aju tnejel alumaj tuk'ix ju otoq txi q'o'n te t-xel, kykab'il che xjansetel ex mlay b'ant tu'n kykyaj ko'pit. Chi Qman te Moisés.

34Atzun qe mandamyent lu tzaj tma'n Qman te Moisés twi witz Sinaí tu'n t-xi tma'n kye aj Israel.