1Mi'n kub' kyb'incha'ne qe tilb'ilal tu'n tok kydiosine; mi'n jaw kywalb'a'ne qe ab'j tuj kytanmiye tu'n tok kyq'o'ne te xjan, ex mi'n jatz kyk'ochine kywitz ab'j tu'n tkyaj ten jun tilb'ilal kywitz tu'n kykub' ẍmeje'ye kywitz, porke aqine Kymane ex Kydiose.
2Mi'n che aq'nane kyuj q'ij te ojlab'l; tenx tchiylal njaye kyeye. Aqine Kymane.
3Qa ma che ok lpe'ye kyi'j qe nleye, qa ma che'x kynimane qe nmandamyente ex qa ma che japun kyu'ne,
4ktzajel nsama'ne jb'al kyib'aje tujxix tq'ijlalil, tu'ntzun ttzaj tq'o'n tx'otx' twitz kyawale ex qe tze' tuj kojb'il ktzajel kyq'o'n kywitz.
5Ok tel b'aj kyb'aju'ne triw, ya otoq tzul tq'ijlalil tu'n tjaw chmet twitz uva, ex ok tjaw b'aj kychmo'ne twitz uva, ya otoq tzul tq'ijlalil tu'n tok awat awal. Che wa'le okxi tnoj kyk'u'je, ex tuj txub'txaj che anq'ile tuj kytanmiye.
6Tuj txub'txaj che tele tuj kytanmiye ex mi a'l jun k'okel sek'punte kyeye ok kytane; che elex nlajo'ne qe txkup mya b'a'n ate' tuj kytx'otx'e ex mlay txi nq'o'ne amb'il kye xjal tu'n kytzaj q'ojlel kyi'je.
7Che elel oq aj q'oj kyi'je ex che b'el kyb'yo'ne tu'n spad;
8tu'n jwe' kyeye kyb'aj che elel oq jun syent aj q'oj, ex tu'n jun syent kyeye kyb'aj che elel oq laj mil aj q'oj; tu'n spad che najel kyu'ne qe aj q'oj kyi'je.
9Tu'n tzalajb'il che tzajel nke'yine ex kchmetel nim kyb'aje wu'ne, ex kkyuwsetel nyole kyuk'ile, aju o txi ntziyane kyeye.
10Nim q'ij che wa'le ti'j triw otoq b'aj k'u't tuj ab'q'i otoq b'aj, ex aju kjel ten k'elex kyi'ne tu'ntzun tokx k'u't ak'aj triw.
11Chin najale kyxole ex mlay che el wik'une.
12Ax chin b'etele kyxole ex aqine chin okele te Kydiose, atzun kyeye che okele te jun tnam etzan wu'ne.
13Aqine Kymane ex Kydiose aju etz q'inte kyeye tuj Egipto tu'ntzun mi'n kytentle te kymajen, kub' ntoqine yuw tkub' kyib'aje, ex o nb'inchaye tu'n kyb'ete minti' kyxob'ile.
Aju ktzajel kyi'j qe mib'an che niman te Dios Deuteronomio 28.15-6814Qatzun minti' ma chinx kynimane ex qa minti' ma che japun kykyaqil qe nmandamyente lu kyu'ne,
15qa ma che el kyik'une qe nleye ex qa ma tz'ok kyq'o'ne qe nxnaq'tzb'ile te minti' kyajb'en ex qa minti' ma che japun kyu'ne, ex qa minti' ma japun kyu'ne aju o kyaj b'ant ti'j wu'ne kyuk'ile,
16ax ikxtzun weye ok nb'incha'ye qe jlu kyi'je: Ktzajel nsama'ne xob'tzab'l kyib'aje kyuk'ix qe yab'il cheb'a in che naj xjal kyu'n, tuk'ix nim kyaq ktzajel kyi'je, che b'elex julix tb'aq' kywitze ex kb'ajel tipun kyximlal. Noq gan che awale, ex aqe aj q'oj kyi'je che wa'l ti'j twitz kyawale.
17Ktzajel nq'oje kyi'je ex kb'el kyi'je kyu'n qe aj q'oj kyi'je; aqeju in che ik'un kyeye che kawil kyib'aje, ex aqeye che elel oqe maske mi a'l lepchix t-xi' kyi'je.
18Qatzun minti'x ma chinx kynimane, kytzajlenxi qe jlu kyib'aje, kb'eltzun nq'o'ntle wuq maj kycastiwoye tu'n tlaj kyile.
19Knajel wu'ne aju kynimb'il kyib'e; ok nb'incha'ye tu'n mi'n ttzaj jb'al twitz kya'j, ex tu'n mi'n ttzaj tq'o'n tx'otx' kyawale.
20Noqx gan kb'ajel kynajsa'n kyipune, ex mlay tzaj tq'o'n tx'otx' twitz kyawale ex mi qe tze' mlay tzaj kyq'o'n kywitz.
21Qa kukx ma jaw kyi'n kyib'e wi'je ex qa minti' ma chinx kynimane, kb'el nq'o'ntle wuq maj kycastiwoye ik tza'nx kyile.
22Che tzajel nsama'ne qe txkup te tjaq' k'ul kyi'je, che xel q'i'n kyk'wa'le kyu'n, che najel kyalune kyu'n, ex nik'xi kyb'aje kyjel kyq'o'n tu'ntzun mi jun tu'n tb'et tuj b'e.
23Qatzun minti'x ma txi kyb'incha'n kytene tu'n tkyaqil jlu, ex qa kukx ma jaw kyi'n kyib'e wi'je,
24ax ikx weye kjawil wi'n wib'e kyi'je ex kb'el nq'o'ntle wuq maj kycastiwoye tu'n tlaj kyile.
25Che xel nsama'ne qe xjal q'ojlel kyi'je tu'n t-xelin kyi'je, tu'nju minti' ma japun kyu'ne aju yol otoq kyaj b'ant ti'j wu'ne kyuk'ile. Ok tok kychmon kyib'e kyuj kytanmiye, kxel nsama'ne yab'il kyib'aje ex che b'el tz'aqe tuj kyq'ab' qe aj q'oj kyi'je.
26Ok tel wi'ne kywaye; cabalx jun jorni tu'n ttzq'aj kywa laj ja xjal tuj, malo'n kxe'l kywaye ex mlay noj kyk'u'je tu'n.
27Qa mi'n ma chinx kynimane ttzajlenxi jlu kyi'je, ex qa kukx ma jaw kyi'n kyib'e wi'je,
28ax ikx weye kjawil wi'n wib'e kyi'je, ex tuk'il nq'oje kb'el nq'o'ntle wuq maj kycastiwoye tu'n tlaj kyile.
29Kxe'ltzun kychyo'ne kyk'wa'le, qe q'a ex qe txin.
30Che b'el nxitune qe lugar jatum in che k'ulune kywi' qe witz ex che b'el npa'ne qe ky-altare te patb'il storak; che b'el npalb'a'ne kyximlale, ya kyimniqe, kyib'aj qe tilb'ilal mya itz', aqeju k'okel kydiosine, ex che elel wik'une;
31knajel kytanmiye wu'ne, che b'el nxitune kyja kydiose, ex mlay chin tzalaje ti'j tk'ok'jal chojb'il ktzajel kyq'o'ntle weye.
32Knajel tx'otx' wu'ne ex ok kyul aj q'oj kyi'je najal tuj, che jawil lab'in ti'j.
33Atzun kyeye che b'ajel nsputune kyuj qe nasyon ex chin okel lpe'ye kyi'je tu'n kykub' nb'yo'ne tu'n spad; k'okel kytx'otx'e te tzqij wu'ne, che najel kytanmi wu'ne ex noq kytx'aqan che kyjel ten.
34K'ojlaltzun tx'otx' tuj tkyaqil tyemp ok minti' awal k'okel tuj akux ate'ye tuj kytx'otx' aj q'oj kyi'je; maxitzun k'ojlal tx'otx' te t-xel minti'toq in ojlan nej.
35Tuj tkyaqil tyemp ok mi'n tz'ok awal tuj, k'ojlal tx'otx' te kyxel qe q'ij te ojlab'l, aju minti' xi kyq'o'ne tej najl qeye tuj.
36Atzun qeju che kyjel anq'in, ktzajel nimxix t-xob'il kyi'j wu'ne tuj kytx'otx' aj q'oj kyi'j, ex noq tu'n tq'ajq'ajel jun t-xaq tze' ktzajel tz'aq che elel oq; che elel oq mer ik tza'n lajo'n qe tu'n jun xjal q'i'n spad tu'n, ex che b'el tz'aq maske mi a'l jun lajol kye;
37che jawil tolj jun ti'j juntl, mer ik tza'n in che el oq tuj q'oj, maske mi a'l lajol kye. Mi a'l jun kye jaku kub' we' twitz aj q'oj ti'j.
38Che najel kyuj qe nasyon, che b'el b'aj kyu'n aj q'oj kyi'j tujx kytanmi,
39ex aqeju che kyjel anq'in tuj kytx'otx' aj q'oj kyi'je, che najel tu'n tlaj kyb'inchb'en mya b'a'n ex junx kyuk'il kyman che najel tu'n tlaj kyb'inchb'en mya b'a'n.
40Qatzun ma jatz kypa'n kyil ex qa ma jatz kypa'n kyil kyman tu'nju minti' otoq japun nyole kyu'n ex tu'nju otoq jaw kyi'n kyib' wi'je,
41(ex ikx weye otoq jaw wi'n wib'e kyi'j ex otoq che'x wi'ne tuj kytx'otx' aj q'oj kyi'j); qatzun ma kub' kymansin kyanmi mya b'a'n, ex qa ma tz'el kynik' ti'j kyil,
42ktzajeltzun nna'ne aju yol kyaj b'ant ti'j wu'ne tuk'il Jacob, tuk'il Isaac ex tuk'il Abraham, ax ikx ktzajel nna'ne kytx'otx'.
43Otoq kyaj kykolin kytx'otx' ex otoq ojlan tx'otx' te kyxel qe q'ij te ojlab'l, akux mya najlqe twitz; atzun kye, kxel kychjo'n kyb'inchb'en mya b'a'n, tu'nju otoq tz'el kyik'un qe nxnaq'tzb'ile ex qe nleye.
44Maske ikju, ok kyten tuj kytx'otx' aj q'oj kyi'j, mlay che el wik'une ex mlay tzaj nlo'che kyi'j tu'n kyb'aj naj kykyaqil, ex mlay tz'ajtz jolpaj ti'j yol kyaj b'ant ti'j wu'ne kyuk'il kyxe'chel, porke aqine Kyman ex Kydios.
45Noq o'kx ktzajel nna'ne aju yol kyaj b'ant ti'j wu'ne kyuk'il kyxe'chel tej kyetz wi'ne tuj Egipto kywitz qe nasyon tu'n woke te Kydios. Aqine Kyman, chi Dios te Moisés.
46Atzun qe ley lu, kyuk'ix qe mandamyent ex qe xnaq'tzb'il tzaj tq'o'n Qman te Moisés twi witz Sinaí, tu'n t-xi tma'n kye aj Israel.
Who We AreWhat We EelieveWhat We Do
2025 by iamachristian.org,Inc All rights reserved.
