2 Reyes 22 - Mam Huehuetenango New Ortography

Tej tkawin Josías tuj Judá 2 Crónicas 34.1-2

1Toktoq Josías twi' wajxaq ab'q'i tej tok te rey, ex o kawin 31 ab'q'i tuj Jerusalén. Aju ttxu' Josías Jedida tb'i, aju aj Boscat ex tme'jel Adaía.

2B'a'n e ela qe tb'inchb'en Josías tuj twitz Qman, ex ok lpe' ti'j tkyaqil tmod David aju qtzan t-xe'chel, ex minti' el tpa'n tib' ti'j.

Tej tknet libro te ley 2 Crónicas 34.8-33

3Tuj twajxaqlajin ab'q'i ttzyetlen tkawin rey Josías, xi sama'n Safán tu'n tuj tja Qman. Ate Safán tky'ajal Azalías ex tal tchman Mesulam, ex tok te aj tz'ib'al. Ex xi tma'n Josías te:

4—Txi'ya tuk'il Hilcías aju tnejel pal, ex q'manxa te tu'n tb'aj tchmon pwaq in pon q'i'n tuj tja Dios, aju nne'l kyi'n qe chmol pwaq in che kub' ten ttzi tja Dios,

5ex e t-xi tq'o'n tuj kyq'ab' qe nejenel te aq'untl ti'j tja Dios, tu'ntzun t-xi kychjo'n twi kyk'u'j qeju in che aq'nan tu'n t-xi b'inchet tja Dios,

6ex qa twi kyk'u'j qe calpinter, qe albañil ex kye txqantl aq'nal; ax ikx b'a'n tu'n tlaq'et tze' kyu'n, ex qe xaq xpe'limaj kyi'j, tu'n tajb'en tu'n t-xi b'inchet tja Dios, chi Josías.

7Ex q'manxa te tu'n mi'n tqaninjtz tajlal pwaq kxel q'o'n kye, ex kykyaqil in che aq'nan tuj tumelxix.

8Xi tma'n Hilcías aju tnejel pal, te Safán aju aj tz'ib'al, qa otoq knet ju libro te ley tu'n tuj tja Dios; ex xi tq'o'n libro tuj tq'ab'; atzunte Safán jaw t-sch'i'n.

9Te tib'ajxitzun jlu xi' Safán tx'olb'alte te rey ti'j libro, ex xi tma'n te:

—Tat Rey, qe tmajena o b'aj kychmo'n pwaq at tuj tja Dios, ex o txi kyq'o'n kye qe nejenel ti'j aq'untl tu'n t-xi b'inchet tja Dios.

10Ax ikx xi tma'ntl Safán te rey qa otoq tzaj tq'o'n pal Hilcías jun libro te, ex jaw t-sch'i'n Safán twitz rey.

11Tejtzun tb'inte rey aju in tma'n tuj libro te ley, el t-sb'it'un t-xb'alun tok ti'j, tu'n tb'is,

12ex xi tma'n te Hilcías, te Ahicam aju tky'ajal Safán, te Acbor aju tky'ajal Micaías, te Safán aju aj tz'ib'al, ex te Asaías aju ma' toklen ttxlaj rey, chi kyja':

13—Kyxi'ye te nxele ex te kyxel kykyaqil tnam xjal aj Judá, tu'n t-xi kyqanine te Qman ti'j tnab'l yol tz'ib'an tuj libro ma knet; ex nimxixlo tq'oj Qman ma tzaj qi'j, tu'nju minti' xi kyniman qe qxe'chel aju yol in tma'n tuj libro, ex minti' o japun kyu'n tkyaqilju yol tz'ib'an tuj.

14E je'xtzun Hilcías, tuk'ix Ahicam, Acbor, Safán, ex Asaías, tu'n kypon tuk'il xu'j Hulda aju t-sanjel Dios. Ate Hulda t-xu'jil Salum aju tal Ticva, ex tal tchman Harhas, ex ate Salum kwentil te k'ub'l xb'alun tuj tja Dios. Atzun najl Hulda tuj tkab'in piẍ tnam Jerusalén. Ex tej kyxi' yolin te,

15tzaj ttzaq'we'n kyja':

—Atzun tzaq'web'l jlu tu'n Qman aju Kydios aj Israel: Kymanxe te xjal saj samante kyeye qanilte wuk'ile,

16chi Qman in tma'n: Ktzajel nsama'ne jun mya b'a'n tib'aj lugar lu ex kyib'aj qe xjal najl tuj, ik tza'nx tkyaqilju q'ma'maj tuj libro aju ma jaw t-sch'i'n rey te Judá,

17porke ma tz'el kypa'n kyib' wi'je, ex ma kub' kypatun storak kywitz junxitl dios; ex tu'n tkyaqilju kyb'inchb'en mya b'a'n ma kyb'incha ma tzaj nq'oje kyu'n; kyja'tzun ma tzaj nimxix ntx'u'jile ti'j tnam lu, ex mlayx tzik'x ti'j wu'ne, chi Qman.

18Kymanxe te rey te Judá, aju ma tzaj samante kyeye qanilte te Qman: Ate Qman aju Kydios aj Israel in tma'n kyja': Tu'nju ma txi tq'o'n twi'ya ti'j ju ma tb'iya,

19ex tu'nju ma tz'ajtz ti'j tanmiya, ex ma kub' tmansin tib'a tej xtb'iya tqanil wu'ne tu'n kynaj qe xjal tuj tnam lu ex tu'n tkub' kycastiw wu'ne, ex tu'nju ma tz'el t-sb'it'un t-xb'aluna ex ma tz'ok tena oq'el nwitze, kyja'tzun ikx weye ma tzaj nb'i'ne tyola. Aqine Tmana in xi nma'ne jlu teya:

20Tu'n tlaj tkyaqil jlu, tuj txub'txaj kymela ex kpola kyuk'il qtzan tchmana, ex mlay tila aju mya b'a'n ktzajel nq'o'ne tib'aj lugar lu, chi Dios, chi xu'j Hulda.

E ajtz meltz'aj qe t-sanjel rey, ex xi kytx'olb'a'n tqanil te rey, aju otoq tma xu'j Hulda.