Deuteronomio 2 - Mam Huehuetenango New Ortography

Qe ab'q'i tej kyten aj Israel tuj tzqij tx'otx'

1Te tib'ajxitzun, kub' b'e qu'n tu'n qpon max tuj tzqij tx'otx' tuj tb'eyil mar Kyaq Ke'yin, ik tza'nx otoq tma Qman weye, ex eltzun nim q'ij qu'n in qo b'etje' ttzi'yile tiwitz tx'otx' Seir.

2Tmatzun Qman weye kyja':

3Ma tz'el nim q'ij noq in che b'etje'ye ttzi'yile tiwitz tx'otx' lu. Kyxi'ye ja'lo tuj tumlal tb'anq'ab' q'ij.

4Q'manxa kye t-xjalila kyja': Kyja' che elexe tuj kytx'otx' tiyjil Esaú, aqeju najl tuj Seir ex at kyxilene kyuk'il. Qe xjal lu in che xob' kywitze; ex ten kykwente kyi'je,

5mi'n che ok tzoqpaje kyi'j ex mlay txi nq'o'ne jun piẍ kytx'otx' te kyeye. Tkyaqil tiwitz tx'otx' Seir, kye tiyjil Esaú. Wu'ne xi nq'o'ne kye te kyetzb'il.

6Kychjome kywaye kyuk'il, aju kxel kywa'ne, ax ikx kyk'aye a', kychjonxe kye, chi Qman tma.

7O che kub' ky'iwla'ne tu'n Qman Dios ti'j tkyaqilju o kyb'inchaye ex ax o ten kyuk'ile. Tuj 40 ab'q'i o che ok kwentine tu'n tuj tkyaqil kyb'eye tuj nintz tzqij tx'otx', ex minti' jun minti'wt o kanun kyeye.

8Tej qb'et tuj tb'eyil Arabá, aju in tzaj tuj Elat ex tuj Ezión-geber, a o qo tzaj ttxa'nile kytx'otx' qe xjal at kyxilen quk'il, aqeju tiyjil Esaú, aqeju najl tuj tx'otx' Seir, ex a o qo tzaj tuj b'e nnu'l tuj tzqij tx'otx' kye aj Moab.

9Tzajtzun tma'n Qman weye kyja': Mi'n kyb'inchaye jun mya b'a'n kyi'j aj Moab ex mi'n che ok tzoqpaje kyi'j ex tiyjil Lot qe, ex mlay txi nq'o'ne jun piẍ kytx'otx' te kyeye. Wu'ne o txi nq'o'ne aju tx'otx' Ar te kyetzb'il.

10(Tuj tx'otx' lu e najan qe aj Emit ojtxi; nim kyipun, nim kyajlal, ex ma' kywa'l, ik tza'nx qe tiyjil Anac.

11Tuj kywitz txqantl xjal qa aj Refait qe tu'n tlaj ma' kywa'l, atzun qe aj Moab in kyma'n qa aj Emit qe.

12Atzun tuj tx'otx' Seir e najan qe aj Horeo ojtxi, ex e kub' b'aj b'yo'n kyu'n qe tiyjil Esaú, e ok te tajwil kytx'otx' ex ax e kyaj ten najal tuj, ik tza'n b'ant kyu'n qe aj Israel ti'j tx'otx' tzaj tq'o'n Qman kye.)

13Tmatzun Qman kyja': Che we'ktze ex kyik'xe max jlajxi tq'ab' xaq Zered. Atzun qe o ik'x tuj tq'ab' xaq lu.

14Atxix tej qetz tuj tx'otx' Cades-barnea tejxi qik'x tuj tq'ab' xaq Zered, otoq b'ant 38 ab'q'i. Tej kyel 38 ab'q'i lu, kykyaqil qe xinaq aj Israel, aqeju at kynab'l tu'n kyq'ojin, otoq che b'aj kyim tuj campament ik tza'nx otoq tzaj tkyuwsa'n Qman.

15Tzaj castiw lu kyib'aj tu'n Qman, tejxi kyb'aj kyim.

16Tejtzun kyb'aj kyim kykyaqil qe xinaq at kynab'l tu'n kyq'ojin,

17tzaj tma'n Qman weye kyja':

18Kyik'xe ja'lo tuj kytx'otx' aj Moab ex kyxi'ye tumlal tnam Ar.

19Ok tok kyk'ulb'an kyib'e kyuk'il aj Amón aqeju tiyjil Lot, mi'n tz'ok kyb'incha'ne jun mya b'a'n kyi'j ex mi'n che ok tzoqpaje kyi'j; mlay txi nq'o'ne jun piẍ kytx'otx' te kyeye, tu'nju o txi nq'o'ne kye tu'n tok te kyetzb'il, chi Qman.

20(Ax ikx aju tx'otx' lu, tuj kywitz xjal qa kytx'otx' qe aj Refaittok, porke tuj tq'ijlalil ojtxi, atzun e najan qe aj Refait tuj, aqeju ok q'o'n kyb'i aj Zomzomeo kyu'n aj Amón.

21Nim kyajlal qe xjal lu, nim kyipun ex ma' kywa'l ik tza'n qe tiyjil Anac; ex e kub' b'aj b'yo'n kyu'n qe aj Amón tu'n tipumal Qman, ex atzun kye aj Amón e kyaj ten najal te jumajx tuj tx'otx' lu.

22Ik e tenb'a qe jlu ik tza'n o tb'incha Qman kyi'j aj Horeo tej kykub' b'yo'n tuj Seir kyu'n qe tiyjil Esaú, ex atzun kye tiyjil Esaú e kyaj ten najal tuj kytx'otx' ex ax ate' ja'lo.

23Ax o b'aj kyi'j aj Heveo, aqeju najltoq kyuj aldey niqayin ttxlaj tnam Gaza, tej kykub' b'yo'n kyu'n qe aj Filisteo, aqeju e tzaj tuj Creta ex ax e kyaj ten najal tuj kytx'otx'.)

24Tzajtzun tma'n Qman kyja': Chux qeye, kyq'onkuye b'e ex kyik'xe tuj tq'ab' xaq Arnón. Kxel nq'o'ne Sehón tuj kyq'ab'e, aju aj Amorreo ex rey te tnam Hesbón; ax ikx ttx'otx' kxel nq'o'ne kyeye. Kyok tzoqpaje ti'j ex kyetzan ela ttx'otx'.

25Texju q'ij ja'lo, kykyaqil qe tnam ate' twitz tx'otx' ktzajel kyxob'il wu'ne kywitze. Oktzun kyb'inte tqanil kyi'je che okel ten lu'lul tu'n kychiylale, ex ktzajel b'aj kyk'u'j kywitze, chi Qman.

Kub' ti'j rey Sehón kyu'n aj Israel Números 21.21-30

26Max tuj tzqij tx'otx' Cademot e tzaj nsama'ne junjun sanjel, tu'n kyul yolil tuk'il Sehón aju rey te tnam Hesbón, tu'n tb'ant ti'j jun qyol tuj txub'txaj tuk'il ex tu'n t-xi kyma'n te kyja':

27Qajb'ile tu'n qik'xe tuj ttx'otx'a, ex o'kx qo b'etele tuj ninb'e; mi'n txi qi'ne jun tq'ab' b'e.

28Jaku txi qchjo'ne tkyaqil qwaye k'ajb'el junjun q'ij, ax ikx aju a' kxel qk'a'ne kxel qchjo'ne. Noq o'kx in qo kub'sane teya tu'n ttzaj tq'o'na amb'il tu'n qik'x b'ete tuj ttx'otx'a,

29ik tza'n o tzaj q'o'n amb'il qeye kyu'n qe tiyjil Esaú aqeju najl tuj tx'otx' Seir, ax ikx kyu'n aj Moab aqeju najl tuj tx'otx' Ar. O'kx qajb'ile tu'n ttzaj tq'o'na amb'il qeye okxi qik'xe jlajxi nima Jordán, tu'ntzun qpone tuj tx'otx' ktzajel q'o'n qeye tu'n Qmane aju Qdiose.

30Atzunte rey Sehón minti' o tajb'e tu'n qik'tz tuj ttx'otx', porke ate Qman Dios kub' kyuwsante tanmi tu'ntzun ttzaj tq'o'n tuj qq'ab', ik tza'n in kyile ja'lo.

31Ex tzaj tma'n Qman weye: B'i'x ja'lo kxel nq'o'ne rey Sehón tuj kyq'ab'e tuk'ix tkyaqil ttx'otx'; kyokx naje tuj tu'ntzun kyoke te tajwil, chi Qman.

32Etztzun naj Sehón q'ojlel qi'j, kyuk'ix kykyaqil qe t-soldad, tu'ntzun kyok tzoqpaj qi'j tuj tnam Jahaza;

33ex e tzaj tq'o'n Qman Dios tuj qq'ab', ex kub' qb'yo'n aju rey kyuk'ix qe tky'ajal ex kykyaqil qe t-soldad.

34Kykyaqil qe tnam in kawintoq kyib'aj e b'aj naj qu'n; ax ikx e kub' qb'yo'n qe xinaq, qe xu'j ex qe k'wa'l; mi jun kyaj anq'in qu'n.

35O'kx tzaj qi'n te qe, kykyaqil qe wakẍ ex qe ti'xti wi'yilxix e knet qu'n kyuj qe tnam otoq kub' kyi'j qu'n.

36Xi'x qe' tuj tnam Aroer, aju tkub' niqayin ttzi nima Arnón, tuk'ix tnam tkub' tuj chq'ajlaj, ex pon b'aj max tuj Galaad, mi jun tnam ten tipun tu'n tq'ojin quk'il, porke tu'n Qman Dios tzaj tq'o'n tu'n kykub' tz'aq kykyaqil tuj qq'ab'.

37Qe tx'otx' minti' o ok tzoqpaj kyi'j, atzun qe jlu: Aju kytx'otx' aj Amón tuk'ix tkyaqil tx'otx' ttzi nima Jaboc, ax ikx qe tnam ate' tuj tiwitz tx'otx', ex txqantl lugar otoq tzaj tma'n Qman Dios qe tu'n mi'n qok tzoqpaj kyi'j.