1Tmatzun Salomón kyja':
Aya Nman Dios, o tmaya qa atzun tu'n ttena tuj txqan q'eq muj.
2Ex ma jaw nb'incha'ne jun tjaya tu'n ttena tuj, jun lugar jatum tu'n ttena tuj te jumajx.
3Ajtztzun meltz'aj twitz rey kyuk'il kykyaqil xjal aj Israel, aqeju wa'lqe'toq, e kub' tky'iwla'n,
4ex tma: Nimanxwit tb'i Qman aju Kydios aj Israel, porke ma japun aju tyol tzaj ttziyan te David aju qtzan nmane, tej tzaj tma'n te kyja':
5Atxix tuj q'ij tej kyetz wi'ne qe aj Israel tuj Egipto, aqeju etzan wu'ne, minti' jun tnam otoq jaw nsk'o'ne kyxol kykyaqil k'loj kyiyjil aj Israel tu'n tjaw b'inchet jun njaye jatum tu'n ttzaj na'n nb'iye tuj, ex mi jun xinaq na'nxtoq tjaw nsk'o'ne tu'n tok te nejenel kye tnam xjal aj Israel aju tnam etzan wu'ne;
6atzun ja'lo ma jaw nsk'o'ne tnam Jerusalén tu'n ttzaj na'n nb'iye tuj, ex ma jaw nsk'o'ne David tu'n tkawin kyib'aj aj Israel aqeju etzan wu'ne, chi Qman.
7O tajb'e David aju qtzan nmane tu'n tjaw tb'incha'n jun ja te nimb'il tb'i Qman aju Kydios aj Israel,
8ex tzaj tma'n Qman te kyja': Aju t-ximb'etza tu'n tjaw tb'incha'na jun njaye b'a'n jlu,
9ex mya aya kjawil b'inchante; aju tky'ajala tzul itz'j, atzunju kjawil b'inchante jun njaye, chi Qman.
10Ex matzun japun tyol Qman aju tzaj ttziyan. Ma chin oke te rey te t-xel David aju qtzan nmane, tu'n nkawine kyib'aj aj Israel ik tza'nx o tma, ex ma jaw nb'incha'ne jun ja te nimb'il tb'i Qman aju Kydios aj Israel.
11Ax ikx ma tz'okx nq'o'ne tuj ja lu aju kax jatum k'u'n tyol Qman kyaj b'ant ti'j tu'n kyuk'il aj Israel.
12Ex kub' ten Salomón twitz altar te Qman, kywitz kykyaqil xjal aj Israel, ex xi tnuqpi'n tq'ab'.
13Tjaxtoq tib'aj jun wa'lb'il b'inchamaj tu'n ti'j q'an k'uxb'il, kab' var tuk' mey tnuqb'il, ex kab' var tuk' mey twitz, ex jun var tuk' mey twa'l, ex otoq kub' tq'o'n tuj tmij ttxa'n pe'n twitz tja Dios. Kub'tzun ẍmeje' kywitz kykyaqil xjal aj Israel, ex jaw tyek'un tq'ab' twitz kya'j
14ex tma: Aya Qman aju Kydios aj Israel: Minti' juntl Dios tuj kya'j ex mi twitz tx'otx' jaku pon ik tza'n teya; in japun tyola aju in tzaj ttziyana ex in tzaj tq'o'na t-xtalb'ila kye qe xjal in che ajb'en teya tu'n tkyaqil kyk'u'j;
15porke ma japun tu'na aju yol tzaj ttziyana te David aju qtzan nmane, tu'na tzaj tma'na jlu, ex tu'nxa ma b'inchet, ik tza'n ma b'ant tuj q'ij ja'lo.
16Kyja'tzun aya Nman aju Kydios aj Israel, ax ikx b'a'n tu'n tjapun tu'na aju tzaj ttziyana te tmajena David aju qtzan nmane. Chitzuna te: Ax kyxol tiyjila kukx che jawil nsk'o'ne qe xjal tu'n kyok te rey kyib'aj aj Israel, qa ma che b'et tuj tumelxix nwitze ex qa ma japun nleye kyu'n, ik tza'n teya ma japun tu'na, chitzuna te David.
17Kyja'tzun, aya Kydios aj Israel, japunx tu'na aju tyola tzaj ttziyana te qtzan nmane David aju ajb'el teya.
18Nman Dios, ¿axpelo tok jaku najana twitz tx'otx' kyuk'il xjal? Minti'lpe in kanun kya'j ma'xix wen tu'n ttena tuj, pyortzunlo te ja lu, aju ma jaw nb'incha'ne.
19Kyja'tzun aya Nman Dios, tzaq'wentza nkub'sb'ile ex nqanb'etze; b'intza tq'ajq'ajel nwi'ye ex nna'j Diose teya ja'lo, aqine tmajena.
20Kukx ke'yintza ja lu q'ijl ex qonik'an, atzunju lugar o tmaya tu'n ttena tuj. B'intza nna'j Diose tuj lugar lu, aqine tmajena.
21B'intza nqanb'etze ex kyqanb'etz xjal aj Israel ok ttzaj qna'ne tb'iya tuj lugar lu. B'intza max tuj kya'j tuj lugar jatum najliya, ex najsama qile.
22Qa at jun xjal ma tb'incha jun mya b'a'n ti'j tuk'il, ex qa ma tz'ok q'o'n il ti'j tu'n t-xi tma'n jun yol axix tok, ok tul twitz t-altara tuj tjaya
23b'intza max tuj kya'j ex b'inchanxa kyi'j qe tmajena, q'onkuya t-sentens xjal at til, tu'nju otoq tb'incha mya b'a'n, ex atzunju xjal minti' til, b'inchanxa ti'j tu'n tklet, porke minti' otoq tb'incha mya b'a'n.
24Qa ma kub' kyi'j aj Israel, aqeju etzan tu'na, kyu'n aj q'oj kyi'j, tu'nju otoq che b'inchan il twitza, ex qa ma tz'ajtz ti'j kyanmi, qa ma jaw kynimsa'n tb'iya ex qa ma che kub'san twitza tuj ja lu,
25che tb'intza max tuj kya'j, najsankuya kyil ex b'inchama tu'n kyul meltz'aj juntl maj tuj tx'otx' xi tq'o'na kye ex kye kyxe'chel.
26Qa ma tzaj jun nintz koresma ex minti' ma tzaj jb'al tu'n tlaj otoq che b'inchan qe xjal il twitza, ex qa ma che ok ten kub'sal twitza tuj lugar lu, ex qa ma jaw kynimsa'n tb'iya, ex qa ma tz'el kypa'n kyib' ti'j kyil tu'n tlaj kycastiw otoq tzaj tu'na,
27che tb'intza max tuj kya'j ex najsama kyil qe tmajena, aqeju xjal aj Israel etzan tu'na, ex yek'unxa aju b'e b'a'n kye tu'ntzun kyb'et tuj. Samantztzuna jb'al tib'aj tx'otx' aju xi tq'o'na te kyetzb'il qe xjal etzan tu'na.
28Ok ttzaj we'yaj tuj tnam, ex qa tx'u'j yab'il, ex qa ma che tzqij qe awal tu'n ta'w kyaq, ex qa ma naj awal tu'n soj ex qa kyu'n ẍplon; ex qa ma b'aj kytxolb'an kyib' qe aj q'oj ti'j qtanmiye tu'n kyok tzoqpaj ti'j, ex qa ma tzaj noq alkyex juntl ti'xti mya b'a'n, ex qa yab'il,
29-30b'ix tzaj tb'i'na tkyaqil kykub'sb'il ex kyqanb'etz teya, noq tu'n alkyex jun kye ex qa kyu'n kykyaqil aj Israel, aqeju etzan tu'na. Ok kyke'yinte aju mya b'a'n ex k'ixk'oj otoq tzaj kyi'j, ex ok tjaw kyi'n kyq'ab' twitz kya'j tu'n kykub'san twitza, ok ttzaj kyke'yin tumlal ja lu, b'ix che tzaj tb'i'na max tuj kya'j tuj lugar jatum najliya, ex najsama kyil ex b'inchama kyi'j noq alkye b'a'n tuj twitza, ik tza'n tb'inchb'en teyle junjun, porke o'kx aya ojtzqilte kyximb'etz xjal ex kyanmi.
31Kyja'tzun kjawil nimsa'n tb'iya kyu'n ex kxel nimana kyu'n, akux itz'x qe twitz tx'otx' aju tzaj tq'o'na kye qxe'chele.
32Ax ikx qe stranjer xjal, aqeju mya ax e itz'j kyxol xjal etzan tu'na, qa ma che tzaj tuj juntl tnam najchaq tu'n kyul na'l tb'iya tuj ja lu, tu'nju otoq kyb'i ju tb'iya ma'xix t-xilen ex tipumala nimxix,
33b'ix che tzaj tb'i'na max tuj kya'j, max tuj lugar jatum najliya, ex b'ix tzaj tq'o'na tkyaqilju kxel kyqanin teya, tu'ntzun tel kynik' kykyaqil nasyon twitz tx'otx' ti'ja, ex tu'ntzun tnimanjtza kyu'n, ik tza'n in nimanjtza kyu'n aj Israel, aqeju etzan tu'na, ex tu'n tel kynik' ti'j qa a in tzaj na'n tb'iya tuj ja lu, aju ma jaw nb'incha'ne.
34Ok kyex qe xjal etzan tu'na q'ojlel, tu'n kyq'ojin kyi'j qe aj q'oj kyi'j, noq jax jatum che xel t-sama'na, ex qa ma tzaj na'n tb'iya kyu'n ok ttzaj kyke'yin tumlal tnam aju ma jaw t-sk'o'na, ex ok ttzaj kyke'yin tumlal ja ma jaw nb'incha'ne,
35b'ix tzaj tb'i'na max tuj kya'j aju kykub'sb'il ex kyqanb'etz, ex b'ix kolina kyi'j kywitz aj q'oj.
36Ex qa ma che b'inchan il twitza, porke mi a'l jun xjal minti'wt in b'inchan il, ex qa ma tzaj tq'oja kyi'j, ex qa ma che'x tq'o'na tuj kyq'ab' aj q'oj kyi'j tu'n kyxi q'i'n tuj juntl nasyon, qa najchaq ex qa niqayin tu'n kypon q'i'n,
37ex qa ma tz'ajtz ti'j kyanmi jatum otoq che pon q'i'n, ex qa ma che ok ten kub'sal twitza, ex qa ma tz'el kynik' ti'j qa otoq che b'inchan il ex otoq kyb'incha mya b'a'n,
38ex qa ma tz'ajtz ti'j kyanmi tu'n tkyaqil kyk'u'j tuj nasyon jatum otoq che pon q'i'n, ex qa ma che ok ten kub'sal twitza in tzaj kyke'yin tumlal tx'otx' lu aju xi tq'o'na kye kyxe'chel, ex tumlal tnam aju ma jaw t-sk'ona, ex tumlal ja ma jaw nb'incha'ne teya,
39max tuj kya'j tuj lugar jatum najliya, b'ix tzaj tb'i'na aju kykub'sb'il ex kyqanb'etz teya, ex b'ix kolina kyi'j kywitz aj q'oj, ex najsankuya kyil xjal etzan tu'na, aqeju otoq che b'inchan il twitza.
40Ja'lo Nman Dios qo tke'yintza ex b'intza qkub'sb'ile, aju kxel qma'ne teya tuj lugar lu.
41Nman Dios, we'ktza ex tzaja tu'n tula tuk'ix ju kax jatum tzaj tyek'una tipumala tuj lugar jatum tu'n tkub' tena tuj te jumajx. Qe pal in che ajb'en teya kuchiwt che b'et tuj tumel, ex qe okslal ti'ja che tzalajxwit ti'j t-xtalb'ila.
42Nman Dios, mi'n chin el tik'una, aqine rey sk'o'maj tu'na, na'ntza aju tk'ujlalila o ten ti'j David aju tmajena, chi Salomón.
Who We AreWhat We EelieveWhat We Do
2025 by iamachristian.org,Inc All rights reserved.
