Proverbios 26 - Mam Huehuetenango New Ortography

1Mya tuj tumel qa ma tzaj tq'ab' che'w tuj tq'ijlalil kyaq, ex mya tuj tumel qa ma tzaj jb'al ok tjaw chmet twitz awal, ax ikxtzun mya tuj tumel tu'n t-xi q'ot nimb'il te jun xjal minti' tnab'l.

2Ik tza'n jun tal tz'unin nne'l tzpet ex ik tza'n jun xtx'a'yil in lipan twitz kya'j, iktzun tten ju mya b'a'n in xi kyqanin xjal ti'j juntl; qa minti' til xjal mlay japun jlu.

3B'a'n tu'n tkub' mansit chej tu'n asyal, atzunte bur b'a'n tu'n tokx pren tuj ttzi', atzunju xjal minti' tnab'l, b'a'n tu'n t-xi jatet tasyal.

4Mi'n txi ttzaq'we'na tyol xjal minti' tnab'l tuk'il yol minti' tnab'l, tu'ntzun mi'n tpona ik tza'n te.

5Tzaq'wenxa ju xjal minti' tnab'l ik tza'nxju tyol, tu'ntzun mi'n tok tq'on tib' at tnab'l.

6Qa ma txi qsama'n jun xjal minti' tnab'l te qsanjel, a jlu mer ik tza'n nne'l tx'emin qe qqan ex in tzaj mya b'a'n qi'j.

7Ik tza'n jun xjal kox mya segur ate' qe tqan, ikxtzun tten ju yol te xnaq'tzb'il tu'nju xjal minti' tnab'l.

8Ik tza'n jun xjal nno'kx tk'alo'n jun ab'j tuj jun xob'l te, mya b'a'n jlu, ikxtzun tten ju xjal in xi q'onte nimb'il teju xjal minti' tnab'l.

9Ik tza'n ch'i'x in xi' tuj tq'ab' jun xjal k'al q'e'n, iktzun tten jun yol te xnaq'tzb'il tu'nju xjal minti' tnab'l.

10Ik tza'n ju xjal in xi t-xo'n plech ti'j noq alkyex jun xjal nnik' b'et, ikxtzun tten aju in xi q'onte taq'un jun xjal minti' tnab'l ex noq in b'etje'.

11Ik tza'n jun tx'yan nna'j meltz'aj lo'l t-xa'w juntl maj, iktzun tten ju xjal minti' tnab'l nna'j meltz'aj juntl maj b'inchalte mya b'a'n.

12Mas b'a'n ch'intl te xjal minti' tnab'l, twitzju xjal nno'k tq'on tib' te at tnab'l.

13Aju xjal tk'i' tz'aq'nan in tma'n kyja': Tuj cay at jun b'alun tkub'sa'n ex tuj b'e tkub'sa'n juntl.

14Ik tza'n tlamel ja in yukch kyu'n qe bisagr kyok ti'j, ikxtzun tten ju xjal ky'aj noq in tol tik' tuj tkoẍb'il.

15Aju xjal ky'aj in xi tlamo'n tq'ab' tuj laq tu'n twa'n, ex minti' nno'k tilil tu'n tu'n tpon kanun tuj ttzi'.

16Aju xjal ky'aj nno'k tq'on tib' mas at tnab'l kywitz wuq xjal b'a'n ttzaq'wenjtz yol kyu'n tuj tumelxix.

17Aju xjal nno'kx tq'on tib' tuj jun q'oj minti' toklen ti'j, junx ta' ik tza'n jun xjal in tzaj ttzyu'n jun tx'yan kyi'j twi t-ẍkyin.

18Ik tza'n jun xjal in tzaj tuj twitz in che'x t-xo'n qe plech in k'ant q'aq' kyi'j ex qe plech in che naj xjal tu'n,

19iktzun tten ju xjal in kub' t-sb'u'n tamiw, ex te tib'ajxi in tma'n: Noq jun la'jb'il jlu.

20Qa minti' si' in ku'x yupj q'aq', ex qa mi a'l jun xjal in si'min yol in b'aj q'oj.

21Aju xq'a'l at tajb'en tu'n tjaw k'ant q'aq' ti'j; aju si' at tajb'en tu'n tokx tuj q'aq'; ex tu'nju xjal jawni q'ojl in tzaj mastl q'oj.

22Aju tyol xjal si'mil yol ik tten ik tza'n jun ti'xti nno'kx tuj ttzi' puro chi' wen, ex max in ku'pun tuj tk'u'j.

23Ik tza'n jun k'il tx'otx' ttx'otx'il tok tk'a' saq pwaq, iktzun tten tyol xjal kye'yix tb'inx atzunju t-ximb'etz mya b'a'n.

24Aju xjal in ik'un ti'j juntl minti' in xi tyek'un t-ximb'etz ok tyolin, ex tuj tanmi in b'aj t-ximan mya b'a'n;

25qa ma yolin tuj mansb'ajil teya, mi'n txi tnimana porke aju t-ximb'etz nojni tu'n mya b'a'n;

26maske kub' tewan tq'oj, ex aju tb'inchb'en mya b'a'n k'elel tuj q'ancha'l kywitz kykyaqil xjal.

27Alkye jun xjal in ku'x lakunte jun jul tu'n t-xi tz'aq juntl xjal tuj, axte kb'elex tz'aq tuj; ex alkye jun in xi tolinte jun ab'j tib'aj juntl xjal, tib'ajx in tzaj tolj ab'j.

28Aju xjal nik'al yol nne'l tik'un aju axix tok, ex aju xjal mejor xmoxin tu'n t-sb'un, xitb'il in tzaj tu'n.