Eclesiastés 9 - Mam Huehuetenango New Ortography

Aju ximb'etz ti'j chwinqlal ex kamik.

1In kub' tenxixe ximal ti'j ex ma tz'el nnik'e ti'j, kyaq'unb'en qe xjal tz'aqlxix ex qe xjal at kynab'l atzun ta' tuj tq'ab' Dios. Ate xjal minti' b'a'n tu'n qa kk'ujlanjtzel ex qa k'elel ik'un.

2Kyja'tzun, aju kb'ajel ti'j jun xjal, axju kb'ajel kyi'j kykyaqil xjal; aju kb'ajel ti'j ju xjal tz'aqlxix, axju kb'ajel ti'j ju xjal mya tz'aqlxix; aju kb'ajel ti'j ju xjal b'a'n tmod, axju kb'ajel ti'j ju xjal mya b'a'n tmod; aju kb'ajel ti'j ju xjal ttx'jon tib', axju kb'ajel ti'j ju xjal mya ttx'jon tib'; aju kb'ajel ti'j ju xjal in xi q'onte chojb'il, axju kb'ajel ti'j ju minti' in xi tq'o'n chojb'il; aju kb'ajel ti'j ju xjal b'a'n, axju kb'ajel ti'j ju xjal aj il; aju kb'ajel ti'j ju xjal in xi ttziyan jun yol twitz Dios, axju kb'ajel ti'j ju xjal minti' in xi ttziyan jun yol twitz Dios.

3Atzunju mya b'a'n lu in tzaj kyib'aj kykyaqil xjal tzalu twitz tx'otx': Aju kb'ajel ti'j jun, axtzunju kb'ajel kyi'j kykyaqil. Ax ikx t-ximb'etz xjal nojni tu'n mya b'a'n akux itz'x mya tuj tumel ta' t-ximb'etz; te tib'ajxi jlu in kyimtzun.

4At mas oyb'il teju xjal akux itz'x; mas b'a'n jun tx'yan itz', twitz jun b'alun kyimni.

5Porke qe xjal itz'x qe, b'a'n kyu'n qa ok che kymel, atzun qe xjal kyimni qe, minti' b'a'n kyu'n ex minti'tl twi' kyk'u'j in kyk'mo'n, ex mi a'l jun in tzaj na'nte kye.

6Atzun in kub' naj kyk'ujlalil ex kyik'b'il ex tlo'ch kyk'u'j, minti'tl kyoklen ti'j tkyaqilju in b'ant tzalu twitz tx'otx'.

7Txi'ya ex wa'nxa twaya tuk'il tzalajb'il, tzalajxa ti'j tk'a'ya ta'l twitz uva, porke aju taq'unb'ena b'a'n ma tz'el tuj twitz Dios.

8Kukx q'on oka t-xb'aluna puro saq ke'yin ex kukx q'on jaxa perjum tuj twi'ya.

9Tzalajxa tuj tanq'ib'la tuk'il t-xu'jila k'ujla'nxix tu'na, ex tkyaqil q'ij tanq'ib'la ma tzaj tq'o'n Dios twitz tx'otx' noqx gan, ex o'kx jlu in tkamb'a'na tu'nju nimxix in aq'nana twitz tx'otx'.

10Ex tkyaqilju at tu'n tb'ant tu'na, tz'ok tililx tu'na tu'n tb'ant, ex ok tpona ma tuj kynajb'il kyimni, mi jun ti'xti kb'antel tu'na ex minti' jun tu'n t-ximana ti'j, porke ma chixin minti' nab'l ex minti' ojtzqib'l at.

Mya tuj tumel aju in b'aj kyi'j xjal

11At mastl ma wile tzalu twitz tx'otx': Mya tu'nju kyuw che qelan xjal jaku che kamb'an ti'j ojqelb'il, ex mya tu'nju kyuw kyk'u'j xjal tuj q'oj jaku che kamb'an tuj q'oj; mya tu'nju at kynab'l xjal jaku knet kyu'n, ex mya tu'nju list qe xjal jaku che ok te q'inun; mya tu'nju xnaq'tzamni qe xjal jaku kyk'am jun xtalb'il; tkyaqil jlu noq tu'n t-swert xjal.

12Ex mi jun xjal b'a'n tu'n jtoj b'a'n tpon or tu'n tkyim; ik tza'n qe kyiẍ in che tzyet tu'n xyub', ex ik tza'n qe chyu'j in che tzyet tu'n k'ob'il; ikxtzun tten xjal, maske minti' ximan tu'n, pero noq minab'en in tzaj mya b'a'n tib'aj.

13At juntl ma wile tzalu twitz tx'otx' ex ma tz'ok te jun xnaq'tzb'il ma' t-xilen te weye:

14At jun tal tnam ch'in ex mya nim xjal najl tuj, ok tzoqpaj jun rey nim tipumal ti'j ex b'aj kytxolb'an kyib' qe t-soldad rey ti'jele ex jaw kyb'incha'n kyxwe'tzb'il ti'jele tu'ntzun kyokx tuj.

15Ex tuj tnam lu najltoq jun xinaq meb'a ex at tnab'l, ex tu'nju at tnab'l o klet tnam tu'n, ya te tib'ajxi mi jun tzaj na'nte teju xinaq lu.

Mas at tajb'en nab'l twitz tkyaqil ti'xti

16Tu'ntzunju o nmaye kyja': Maske minti' in xi niman tyol jun xjal at tnab'l ex mi a'l jun in xi tq'o'n twi' ti'j ju in tma'n, pero mas b'a'n tu'n qok at qnab'l twitzju tu'n qok kyuw qk'u'j.

17Aju yol in xi q'met tuj cheb'a tu'n jun xjal at tnab'l, mas in xi b'i'n twitz tyol jun xjal in sch'in wen tok te nejenel kye qe xjal minti' kynab'l.

18Mas b'a'n ju nab'l kywitz qe ub'l in che ajb'en tuj q'oj. Noq tu'n jun xjal aj il jaku tzaj nimku mya b'a'n tu'n.