2 Crónicas 26 - Mam Huehuetenango New Ortography

Tej tkawin Uzías tuj Judá 2 Reyes 14.21-22; 15.1-7

1Tej otoq japun Uzías twi' qaqlaj ab'q'i tzajtzun q'i'n kyu'n kykyaqil tnam xjal aj Judá ex ok kyq'o'n te rey, te t-xel Amasías aju qtzan tman.

2Jaw tb'incha'n Uzías juntl maj tnam Elat ex ok te kye aj Judá tkyimlenxi qtzan tman.

3Toktoq Uzías twi' qaqlaj ab'q'i tej ttzyet tkawin ex o kawin 52 ab'q'i tuj Jerusalén. Aju ttxu', Jecolías tb'i ex ax aj Jerusalén.

4Qe tb'inchb'en Uzías b'a'n e ela tuj twitz Qman, ik tza'nx qe tb'inchb'en Amasías aju qtzan tman.

5Ok tilil tu'n tu'n tajb'en te Dios tej itz'toq Zacarías aju xnaq'tzante te tu'n tniman te Dios. Ex tej kukxtoq tajb'en te Dios, o onin Dios ti'j tuj tkyaqil.

6Xi' Uzías tu'n tq'ojin kyi'j aj Filisteo ex kub' t-xitun aju muro tok ti'j tnam Gat, aju muro tok ti'j tnam Jabnia ex aju muro tok ti'j tnam Asdod, ex e jaw tb'incha'n qe tnam tuj tx'otx' at tuj tkwent tnam Asdod ex kyuj txqantl lugar kyxol aj Filisteo.

7O onin Dios tuk'il tu'n tkub' kyi'j aj Filisteo ex aj Arabia tu'n, aqeju najlqe tuj tnam Gur-baal tb'i, ex tu'n tkub' kyi'j aj Meunitas.

8O chjet chojenj kyu'n aj Amón tuk'il Uzías, ex aju tqanil ti'j Uzías o pon max tuj tmojonil Egipto, porke aju tipumal o ch'iyxix wen.

9Ax ikx e jaw tb'incha'n qe ja ma' kywa'l twi muro tuj Jerusalén: Jun tib'aj Tlamel tnam Eskyin tb'i, juntl tib'aj Tlamel tnam Chq'ajlaj tb'i ex juntl tib'aj t-skyinil muro, ex e b'aj tkyuwsa'n wen.

10Ax ikx e jaw tb'incha'n qe ja ma' kywa'l tuj lugar tzqij tx'otx', ex e ku'x tjaqo'n nimku xoch, porke attoq nim twakẍ, tza'nx tuj chq'ajlaj t-xe witz, ax ikx kyuj qe chq'ajlaj ttzi nima. Ax ikx ate'toq qe tmajen in che aq'nan kyuj qe kojb'il ex kyjaq' qe tqan uva aju tzyu'ntoq tu'n tuj tiwitz tx'otx', ex kyjaq' qe tqan tawal, porke nim tgan ti'j tu'n taq'net tx'otx'.

11Ax ikx qe t-soldad Uzías xnaq'tzamniqe tu'n kyq'ojin, ex tuj k'lojin in che ex tuj q'oj ik tza'nx ju list b'ant tu'n Jehiel aju aj tz'ib'al te rey, ex tu'n Maasías aju at toklen ttxlaj rey, ik tza'nx ju orden tu'n Hananías, jun kyxol qe nejenel at ttxlaj rey.

12Aju kyajlal qe nejenel kye junjun k'loj kyiyjil aqeju kyuw kyk'u'j tuj q'oj, japun kab' mil tuk' qaq syent kyb'et.

13Aju kyajlal soldad ate'toq tuj kykwent tu'n tkyaqilx, attoq ox syent mil tuk'il wuqtl mil tuk' jwe' syent soldad xnaq'tzamniqe tu'n kyq'ojin ex at nimxix kyipun tu'n kyonin ti'j rey kyuj qe q'oj in che ok tu'n.

14Xi tq'o'n Uzías qe maqb'il in che ajb'en tuj q'oj kye kykyaqil t-soldad, kyuk'ix qe lans, qe pasb'il k'uxb'il, qe chikyet k'uxb'il, qe xob'l plech ex qe xob'l ab'j tu'n kyajb'en kyu'n.

15Ax ikx e kub' tb'incha'n qe máquina tuj Jerusalén tu'n kyajb'en tuj q'oj ex tu'n kyxi xo't qe plech ex qe nmaq ab'j; aqe jlu e b'ant kyu'n qe inginiero tu'n kyokx ten kyuj qe ja ma' kywa'l ex kyib'aj qe muro mas ma' kyjawsa'n. Aju tqanil ti'j Uzías el laq'e' najchaq wen, porke nim o onin Dios ti'j tu'n tten nimxix tipumal.

16Tejtzun tten nim tipumal jaw tniman tib', ex tu'ntzun jlu o naj. Minti' xi tniman tyol Qman aju Tdios, porke okx tuj tja Dios tu'n tkub' tpatun storak tib'aj altar te patb'il storak.

17Xi lpe' ju pal Azarías ti'j kyuk'ix 80 pal uk'in tu'n, in che ajb'en te Qman ex mib'an che xob',

18ok kymayo'n ex xi kyma'n te: Aya rey Uzías, minti' toklena tu'n tkub' tpatuna storak twitz Qman, noq o'kx qe pal at kyoklen tu'n tkub' kypatun storak, aqeju tiyjil Aarón, ex aqeju xjansa'maj tu'n kyb'inchante jlu. Texa tuj tja Dios porke ma tzik'a tib'aj tley Qman, ex mlay jaw nimsa'na tu'n Dios ti'j jlu.

19Q'i'ntoq jun xawk' tu'n Uzías tu'n tkub' tpatun storak, ex tej tb'inte jlu tzaj nim tq'oj kyi'j pal. Textzunju or lu tujx tja Dios, twitz altar te patb'il storak ex kywitzx qe pal, jaw jlet tx'a'k tib'aj twitz, aju tx'a'k minti' q'anb'il ti'j.

20Atzunte tnejel pal Azarías kyuk'ix txqantl qe pal, tej t-xi kyke'yin ti'j, o kyil otoq jaw jlet tx'a'k tib'aj twitz, aju tx'a'k minti' q'anb'il ti'j, jurattzun etz kyi'n naj tuj tja Dios, ex tu'nx tib' etz naj, porke tu'n Qman otoq kub' tcastiw.

21Yab'xtoq ta' rey Uzías tu'n tx'a'k minti' q'anb'il ti'j tejxi tkyim. Kyja'tzun o ten rey tuj jun ja tjunalx te, tu'nju yab'toq tu'n tx'a'k minti' q'anb'il ti'j ex ok mayo'n tu'n mi'n tokx tuj tja Dios. Ate Jotam aju tky'ajal kyaj ten te t-xel tuj tja rey, ex o kawin kyib'aj xjal.

22Aju ch'intl tx'olb'ab'en ti'j Uzías, atxix tej tqe' tkawin ex tejxi tpon b'aj, o kub' tz'ib'an tu'n Isaías aju t-sanjel Dios ex tky'ajal Amoz.

23Tejtzun tkyim Uzías, atzun ku'x maqu'n tuj jun camposant kye rey, ex mya ax kyxol qe txqantl rey aqeju qtzan t-xe'chel, tu'nju yab'toq tu'n tx'a'k minti' q'anb'il ti'j. Te tib'ajxi, aju o kawin te t-xel, atzun Jotam aju tky'ajal.